باييلا الفراخ وفوندون الشيكولاتة على "سفرة دايمة"

النهارده هنقدم لكم عزومة مكوّنة من كوكتيل المانجو والموز وسلطة خس وشوربة الجزر والشوفان وباييلا الفراخ وفوندون الشيكولاتة...
يلّا نبدأ مع بعض...
كوكتيل المانجو والموز
المقادير:
* 1/2 كوب مانجو مقطعة مكعبات
* موزة مقطعة شرائح
* كوب زبادي
* 1/2 كوب عصير برتقال ومانجو
الطريقة:
نضرب كل المكوّنات في الخلاط، ونحطّ الكوكتيل في الثلاجة، وعند التقديم ممكن نزيّنه بشرائح المانجو.

*******************
ضيفي قطع التوست المحمص وقدميها
سلطة الخس
المقادير:
* 1 حبة خس مبشورة
* 1/2 حبة كرنب أحمر مبشورة
* 2 حبة بصل أخضر مقطع قطع صغيرة
* 3 ملاعق كبيرة زيت زيتون
* 2 ملعقة كبيرة عصير ليمون
* ملعقة كبيرة شبت طازج مفروم
* ملح وفلفل أسود
* قطع توست محمص "اختياري"
* حلقات زيتون أسود
الطريقة:
1- اخلطي الخس والكرنب الأحمر والبصل الأخضر والزيتون الأسود مع بعض في طبق كبير.
2- هاتي طبق صغير، واخلطي فيه زيت الزيتون وعصير الليمون والشبت والملح والفلفل، وبعد كده ضيفي التتبيلة دي على السلطة وقلبيهم مع بعض كويس وضيفي التوست المحمص وقدميها.. وبالهنا والشفا.

*******************
ممكن تزيني الطبق بالبقدونس
شوربة الجزر والشوفان
المقادير:
* 1/2 كيلو جزر مقطع مكعبات
* 1/2 كوب شوفان
* حبة بطاطس مقطعة مكعبات
* حبة بصل مفرومة
* 2 ملعقة زبدة
* 4 أكواب شوربة فراخ
* ملح وفلفل أسود
* 2 فص ثوم مفروم
الطريقة:
1- شوّحي البصل والثوم والبطاطس والجزر في الزبدة لمدة 5 دقائق وضيفي عليهم الملح والفلفل.
2- ضيفي الشوربة، وسيبي الخليط على النار لمدة نصف ساعة، وبعد كده اضربي الخليط في الخلاط، وبعد كده رجعيه على النار مرة تانية وضيفي إليه الشوفان وسيبيه على النار لمدة 5 دقائق تقريباً، وبعد كده قدميه في أطباق التقديم وممكن تزيني الطبق بالبقدونس.. وبالهنا والشفا.

*******************
ممكن تزيني الطبق بالبقدونس المفروم
باييلا الفراخ
المقادير:
* 1/4 كيلو صدور فراخ مقطعة شرائح طولية
* ملعقة صغيرة زيت زيتون
* بصلة مقطعة شرائح
* 2 شريحة كرات
* 3 فصوص ثوم مفرومين
* 2 ثمرة طماطم مقطعة
* 1/4 ثمرة فلفل أحمر مقطعة
* 1/4 ثمرة فلفل أصفر مقطعة
* 1/4 ثمرة فلفل أخضر مقطعة
* 1/4 ثمرة فلفل برتقالي مقطعة
* كوب أرز بسمتي
* 2 كوب شوربة فراخ
* 1/2 كوب بسلة
* 1/4 كوب بقدونس طازج مفروم
* ليمونة مقطعة 4 أرباع
* حلقات زيتون أخضر
الطريقة:
1- سخني الزبدة في طاسة على نار متوسطة، وضيفي معاها البصل والكرات والثوم وقطع الفراخ وقلبيهم مع بعض لمدة 5 دقائق.
2- بعد كده ضيفي الطماطم وقطع الفلفل واستمري في التقليب لمدة 5 دقائق كمان.
3- بعد كده ضيفي الأرز والشوربة وقلبي المكونات كويس مع بعض لغاية ما يبدأوا يغلوا.
4- قللي النار شوية، وغطي الطاسة وسيبيها لمدة 10 دقائق.
5- بعد كده ضيفي البسلة وسيبيهم على نار هادية لمدة ساعة إلا ربع أو لغاية ما الأرز يستوي، بعد كده حطيها في طبق التقديم وزينيها بالبقدونس المفروم وقطع الليمون والزيتون الأخضر.. وبالهنا والشفا.

*******************
ممكن تقدمي معاها آيس كريم بالفانيليا
فوندون الشيكولاتة
المقادير:
3/4 كوب سكر
1/4 كيلو زبدة
1/4 كيلو شيكولاتة خام
بيضتين
2/3 كوب دقيق
1/2 ملعقة صغيرة بيكينج باودر
الطريقة:
1- اخلطي السكر والزبدة والشيكولاتة على حمام مائي ساخن مع التقليب المستمر، لغاية ما كل المكونات تتجانس مع بعضها، وبعد كده ارفعي الخليط من على النار.
2- بعد كده ضيفي الدقيق والبيكينج باودر، وضيفي البيض واحدة ورا واحدة مع التقليب المستمر.
3- صبي الخليط في قوالب مدهونة بالزبدة، ودخّليها الفريزر.
4- قبل التقديم على طول طلّعي القوالب ودخليها الفرن على درجة حرارة 200 وسيبيها لمدة 10 دقائق، وبعد كده طلّعيها وقدميها وممكن تقدمي معاها آيس كريم بالفانيليا.. وبالهنا والشفا.

وبكده تكون خلصت عزومتنا النهارده
أتمنى إنها تكون عجبتكم
وتجرّبوا كل الوصفات اللي قدّمناها
وتبعتوا تقولوا لي النتيجة كانت إيه
*********************
للتعرف على مزيد من الوصفات الشهية
اضغط هنا "سفرة دايمة"
*********************