منى الحديدى تضرب كرسى فى الكلوب لوزير التموين

معالى وزير التموين الا تعلم سيادتكم ان الاقتراب من رغيف الخبز يتطلب التدقيق والتمحيص والتريث والدراسة قبل صدور اى قرار يخصه ؟!!! فكان يجب قبل اصدار تعليمات بتقليل حصص القمح للمخابز …او حل مشكله اومحاربة فساد داخل المنظومه ..ان يتم التنويه واعلانات لجمبع المواطنين ولا المواطن الغلبان ده حقل تجارب؟؟؟!!
حضرتك عارف يعنى ايه ست تخرج من بيتها او سايبه شغلها علشان تروح تقف فى طابور العيش ب4ساعات وممكن تلف الافران علشان تجيب عيش لاولادها ؟؟؟؟!!!! ولا راجل مسن واقف على رجله فى طابور طويل عريض علشان يجيب عيش لاسرته ؟؟؟؟!!!! ولا تلميذ سايب دروسه علشان يجيب العيش من الفرن ؟!!!! وممكن فى النهايه مايكونش فيه عيش ؟ عارف يعنى ايه ؟؟ يعنى احنا مش بنى ادمين …مش معترف بالشعب ده انه ليه حق احترام ادميته …يعنى بيداس على الغلبان …يعنى المرتاح مرتاح …واللى متهان متهان يعنى شعب جاله الضغط والسكروامراض نفسيه
حضرتك عارف رغيف العيش ده بكام ب75 قرش ده الصغير اللى يادوب 3 منه يفطروا عيل المطلوب ايه ؟!! الناس تقضى اليوم فى الشوارع علشان تجيب عيش حاف تاكله ؟!!! ولا تستريح وتجيب الرغيف ب75قرش وبجنيه وربع …وتلفه بشويه دقه وتاكل ؟!!!! طيب حضرتك بتاكل عيش منين ؟ بتقف فى الطابور ؟ طيب عندك وقت ؟ حضرتك بتنزل سوق الخضار ؟ وعجباك الاسعار ؟!!! طيب حضرتك شوفلنا اسعار الخضار واللحمه …ومش مشكله الفاكهه الناس نسيتها خلاص ماهم يادوب يقدروا يجيبوا ياكلوا سيادة الوزير نفسى اعرف المواطن المصرى الغلبان محدود الدخل بتفكر فيه ازاى ؟ حاسبهاله ازاى طيب نحيب ورقة وقلم ونحسب بياخد كام ؟ اسرته كام فرد؟ عنده كام مرض؟ بيجيب علاج بكام ؟ ولاده فى التعليم ؟ حد فيهم مريض؟ بيدفع ايجار كام ؟ بيدفع كهربا وميه وغاز كام ؟ بياكل بكام ؟ ايه نوع الاكل ؟ بياكل لحمه نضيفه ب130ج؟ بياكل فراخ؟الكيلو ب30ج؟ طيب بياكل عيش حاف ؟ ولا بيفطر رومى ولانشون وقشطه وعسل ومربى ؟ الرحمه ياسيادة الوزير المشكله مش فى العيش بس المشكله اصبحت فى الى عيشين العيشه دى بنحب بلدنا اه بندعم رئيسنا اه بنخاف على بلدنا وبنتحمل اه بس ماتجيش على الغلبان كده مفيش حد بيتظلم غير الغلبان الفقير عمرك شوفت وزير ..واقف فى طابور العيش ؟ ولا غنى وعنده اموال مش عارف عددها واقف فى طابور العيش ؟ لاء طبعا دول العيش يروح بنفسه لعندهم الرحمه بالفقير نظرة لادميته اللى ربنا كرمه عن باقى خلقه ارحمونا يرحمكم الله .