شباب الثورة ... مبسوطة يا ستنا

قالوا عنا شباب خايب بيعمل مصايب
جيل سيس قاعد علي الشات والفيس
مع إننا رجالة ودماغنا دايما شغالة
منرضاش بالظلم والإتكالة إستحالة
فنديتنا مصر أمنا وقالت لنا
أنا أم الشموخ والعزة والكرامة
أم النخوة والشهامة
حرروني من الفساد والظلم والأستعباد
يا ولاد ده أنا أم البلاد !
هانت عليكوا أمكو خدوني في حضنكوا
قلنا عشانك نفديكي بدمنا ولو راح عمرنا
معلشي غابت شمسنا بكره يجي النهار ونحقق فيه حلمنا
إنتي فاكره هينفد صبرنا لا والله
إحنا وراكي كلنا ده إنتي يا مصر ستنا
هما شباب تونس أجدع مننا ؟
فدعينا لثورة شبابية بكل الأطياف المصرية
وقلنا ثورة حرية سلمية سلمية
ولينا مطالب مشروعة الشعب عاوز حرية
ورحيل فساد ومحاكمة كل الحرامية إلي سرقوا ثروة مصر القومية
وكانت ثورة مليونية من أسوان للإسكندرية
وقالوا في القنوات المصرية والجرايد النظامية
دول حوالي مية بيكلوا كنتاكي
وإحنا بناكل جبنة وطعمية
وقالو شباب الميدان ده عدو جبان وعنده أجندات خارجية
وطلع علينا الأمن بقنابل والرصاص
وبأيدهم وبالعصيان ضربونا
وسقط كتير مننا بين شهيد وجريح
ماتوا عشان نعيش كلنا وليهم حق عندنا
وقعدنا ننادي ونقول دي ثورة شعبية سلمية
فردوا علينا بالبلطجية بالسكاكين والخيول والجمال
زي ما تكون معركة حربية
فاتت عليها سنين ورجعنا للبدائية
وإختفي بعدها كل الأمن من الشوارع
وهرب المساجين بأمر الداخلية والكل بايع
وهاجم البلطجية أهلنا في البيوت وسرقوا ونهبوا مصرنا
فعملنا لجان مقاومة شعبية بتحمي أبويا وامي وأهلنا وكانو ضهرنا
وكانوا في حراسه ليل نهار .. وكانت ملحمة مصرية مسلمة ومسيحية
من غير سلاح ولا أمن دولة
وكلاب مسعورة تعضنا وسجن من غير حكم ولا مداولة
وإحنا شعب اتخدعنا بالضحكة علي الوش بتترسم
من قلب مليان شر وغدر وخيانة ونفوس جبانة لدم عطشانة
أه علي غدر ابن بلدي لما باع البلد قبل القسم وطلعت الشرطة اسم
عشان رئيس ظالم نشر الفساد وذل العباد
شعب 30 سنه ضاق المرار والذل والانكسار
إطلع وقول شبعنا كلام معسول
إنت ضيعتنا وسرقت منا عمرنا
لا مش هنتخدع من جديد
إنتهي يا مبارك عهد العبيد
قلت إن إحنا مواردنا محدودة طلعت ثرواتك ممدودة
بالدولار وكمان 80 مليار وسايب شعبك في جوع وجهل وحرمان
ارحل أنت وكل الفاسدين خلينا نعيش أحرار
ده دم المصريين غالي علينا أنت فرطت فيه وإحنا اولي بيه
والشعب والجيش إيد وحده مالكوش مكان وسطنا
ثورتنا نجحت بعزمنا وقوة حقنا ويوم 25 يناير إتولد الأمل تاني في قلبنا
ويارب مصر ستنا تكون رضيت عننا يلا نفرح كلنا