على المصطبة

عاوزين سمك رخيص

عقد مجلس برلمان المصطبة جلسته الأسبوعية لمناقشة جدول الأعمال.
الرئيس: حضرات الزملاء تعلمون جميعاً أننا ناقشنا هذا الموضوع منذ مدة طويلة تقترب من عشر سنوات ولا حياة لمن تنادي واليوم نعرضه للمناقشة.
العضو الفلفوس: أتذكر وقتها أننا كنا نستعجب إزاي عندنا هذه السواحل اللي طولها ألف ومئتين كيلومتر وأكتر وبنستورد بعض أنواع السمك.
العضو النمرود: يا جماعة الحكومة قامت اليومين وفرت قلوعها وبدأت في تطوير البحيرات اللي عندنا في منطقة القنال وبعدها إسكندرية وبعدها دمياط ودي فرصة إن الثروة السمكية تصبح بند أساسي من إنتاج الدولة الاقتصادي.
العضو زعيط: والله أنا لما أسمع أخبار عن بلاد بره اللي بتنتج سمك أضرب كف بكف وبتصدره لنا وغيرنا وإحنا عندنا مساحات ضعف مساحات الدول التانية في عالم يا هوه عايزين هوجة في البلد اسمها صيد سمك علشان تاكل وتشبع بدل العيش والجبنة القديمة اللي قطعت قلبنا.
العضو معيط: نفسي أعيش وأشوف إن كيلو السمك البلطي بخمسة جنيه وبدل ما باكل سمكة آكل ثلاثة وأشبع أنا وأولادي وكمان الصياد يكسب وكفاية إهمال وكسل يا دولة ويا رجال أعمال.
العضو نطاط الحيط: والله حاجة غريبة الناس في العالم أتقدمت وإحنا بنرجع لورا ولكن ربنا يحفظ البلد دي من كل سوء وقامت ثورة وبيوعدونا بالخير ولازم نقف معاها لغاية النهاية.
العضو النمرود: لو حسبنا البحيرات اللي عندنا وهي السد العالي والمنزلة والبرلس ودمياط وإسكندرية وغيرها يبقي نكون إحنا أغني بلد في العالم بتنتج سمك لكن للأسف إحنا كسالي وحجم الإنتاج ضعيف والدليل علي كده ارتفاع أسعار السمك لأنه لو كان الإنتاج متوفر بكثرة كان السعر ينزل لأدني مستوي يناسب الفقير قبل الغني.
العضو بهلول: أنا أتفرج ساعات في التليفزيون علي البلاد اللي بتصطاد سمك وتصدره زي المغرب والجزاير مع إن شواطئنا وبحيراتنا ضعف مساحة هذه الدول، لكن إحنا كسالي وشاطرين نروح بلاد تانية ويمسكونا ويحاكمونا ونقعد نتوسل لهم علشان يفرجوا عننا.
الرئيس: ترفع الجلسة ويوضع الموضوع علي جدول الأعمال القادم.
الفلاح الفصيح