علي المصطبة

قش الرز المسكين

استأنف مجلس برلمان المصطبة جلساته في ضيافة رجل الأعمال عرفة أبوزيد بقرية روينة بمحافظة كفر الشيخ واقترح شقيقه محمد موزة أن يناقش المجلس موضوع «قش الرز»..
الرئيس: حضرات الضيوف والأعضاء لدي طلب مناقشة موضوع قش الرز اللي أصبح يشكل صداعا للحكومة والفلاح.
العضو زعيط: والله إحنا أصبحنا بلد كلام يعني مفيش حل نافع وكل يوم تصريح من هنا وتصريح من هناك وشبعنا كلام في الموضوع وعاوزين حل نهائي زي خلق الله في البلاد التانية لما يكون عندها مشكلة تلاقي الحل جاهز.
العضو النمرود: والله كلام زعيط في محله سمعنا مليون مرة إن قش الرز ممكن نعمل منه ورق وليه مانعملش كده ونوقف استيراد الورق ونعمل كمان خشب أبلكاش وليه مانعملش كده ونوقف استيراده نهائيا وليه وليه وليه لغاية ما صدعوا راسنا.
العضو معيط: فيه حاجة مهمة ناسيناها وهي ان القش ممكن يعملوه مكمورة ويستحدموها في استصلاح الأراضي الجديدة وده ممكن عمله بس احنا وعلماءنا الأفذاذ يضربوا تصاريح في الهوا وخلاص مفيش تنفيذ.
العضو الفلفوس: أنا فاكر ان احنا بحثنا الموضوع ده من 15 سنة وقلنا يومها كفاية كلام في الجرانين والتليفزيون وخلينا مرة ناس جد نقول كلام وننفذه حرام عليكم وجعتم دماغنا من الكلام.
العضو نطاط الحيط: والله انتم ناس طيبين وعلي نياتكم ومش عارفين إن لو حد عمل الأفكار بتاعتكم حاله حيقف ويوقف الاستيراد فلازم ولابد يحارب المشاريع اللي فيها مصلحة البلد علشان مصالحه تمشي ومفيش مانع شوية كلام هنا وهناك وتصاريح تليفزيونية والله أعلم فيه حد بيساعده من تحت لتحت أو مفيش إمكانيات.
العضو بهلول: والله يا جماعة البلد كلها خيرات ولكن للأسف اللي بيحبوها ايدهم مش طايلة فبيقولوا كلام وخلاص.
الحاج عرفة: لازم الحكومة يكون لها وقفة مع رجال الأعمال وتشوف حل جذري للموضوع لتنفيذ الأفكار العظيمة اللي طرحناها للمناقشة وترفع الجلسة لتناول الغدا.
*الفلاح الفصيح