على المصطبة

«خلاص.. شبعنا كلام»

«خلاص.. شبعنا كلام»
بقلم: عثمان أبو زيد
السبت , 13 أغسطس 2011 13:19
عقد مجلس برلمان المصطبة جلسته الأسبوعية لمواصلة مناقشة القضايا المطروحة علي الساحة المصرية.
شيخ المجلس: حضرات الإخوة الأعضاء قبل بداية الجلسة يجب علينا قراءة الفاتحة علي أرواح شهداء سوريا فهم إخوتنا في العروبة والمصير وبعدين نبدأ مناقشة موضوع الساعة بناء علي طلب العضو الفلفوس حول نجوم القنوات الفضائية من شيوخ وعباقرة الدساتير والثورات فليتفضل بعرض اقتراحه.
العضو الفلفوس: حضرات الإخوة في جميع الأنحاء أظن ومن الواضح أن كل قنوات التليفزيون في جميع أنحاء الجمهورية وكمان العرب ودخل معاهم كمان قنوات الخواجات وكلهم بيتكلموا عن مصر، وللأسف الشديد إن كلامهم كله تسعين في المية منه تشكيك في الوضع الحالي يعني باختصار مفيش حد من الفلاسفة المصريين عاجبه اللي بيحصل من جانب الإدارة الحالية وده شيء مؤسف.
العضو النمرود: كلام أخونا الفلفوس في السليم والحكاية بسيطة وهي إن كل واحد لقي خارج البرواز وبيشوف واحد صحبه بيطلع في التليفزيون والجرانين، فلازم ولابد يطلع هوه كمان ويقول كلام يخالف زميله علشان الناس تتكلم عنه ويبقي نجم تليفزيوني.
العضو زعيط: والله العظيم اللي بنشوفه ده حرام في حرام. بقي يعني الناس الفطاحل بتاعة القانون حايعملوا حاجة وحشة تضر بلدهم وكفاية غيرة بقى لأن اللي بيحصل ده مش في صالح مصر.
العضو معيط: عاوز أضيف مش كفاية التليفزيون، تعالوا شوفوا الجرانين والإذاعات نازلة تشريح في البلد وكأن مصر خلاص ضاعت ومفيش فايدة والثورة ضاعت.
العضو نطاط الحيط: مش فيه مثل بيقول «القافلة تسير» يبقي لا نسمع ده ولا ده ونعمل ودن من طين وودن من عجين.
العضو الفلحوص: يا جماعة الحق مش عليهم الحق علي اللي بيسمح لهم يقولوا الكلام اللي بيقولوا عليه وكل محطات التليفزيون ملك لناس الله أعلم بضمايرهم.. هل مع الثورة أم ضد الثورة لكن علي استحياء ولو عرفتهم أصحابها واحد واحد تقدروا تعرفوا نيتهم سليمة ولاّ غير سليمة.
العضو بهلول: أنا مش عارف ليه القنوات بتعمل ندوات فيها ما فيها وتطرح مواضيع ملهاش لازمة في الوقت الحالي لأن المطلوب بكل وضوح هو أن بلدنا تعبر عن الفترة المحرجة بسلام ومفيش داعي للشوشرة والاعتصامات علي الفاضي والمليان واستعراض العضلات لأن مش معقول يبقي فيه أكثر من ثلاثين تنظيم ثوري وده يؤدي للفوضي والانهيار فحرام حرام حرام اللي بتعملوه يا بتوع التليفزيونات والجرانين.
شيخ المجلس: جاني طلب موقع عليه منكم بيطالب محطات التليفزيون بوقف المهزلة الحالية لأن المرحلة خطيرة ومفيش داعي للمواعظ والإرشادات.
الفلاح الفصيح