»مطلوب قايمة سودة«

عقد مجلس برلمان المصطبة جلسته الأسبوعية لمتابعة أحداث الساعة التاريخية.
الرئيس: حضرات الإخوة الأعضاء خللي بالكم أنا مش رئيس مجلس الأونطة إياه إنما أنا رئيس مجلس بحق وحقيق علشان كده لازم رئيس المجلس اللي جاي يكون راجل عنده زمة وضمير وطبعاً إنتم فاهمين أنا قصدي إيه من الكلام ونبدأ الجلسة.
العضو الفلفوس: حضرات الإخوة الأعضاء عاوز أقول فيه نغمة ماشية اليومين دول تتكلم عن حركة حزب المصالح في البلد وحطوا معاه الإخوان المسلمين ومش عارف ليه حطوا الإخوان معاه وأنا شايف ان دي حركة غير شريفة لأن الإخوان إذا كنا نختلف معاهم لكنهم صنف تاني خالص وكمان فكرهم غير فكر الحزب المضروب وأعود وأقول لازم نواجه الجماعة دول أقصد حزب المصالح بالوعي وننبه المواطنين وغير كده نسيبهم لكن نتابع حركاتهم ونكشفها للشعب.
العضو زعيط: ياجماعة حيلكم شوية دول ناس خلاص اتحرقوا وما عدش لهم فايدة ولازمة لإننا مشفناش منهم يوم حلو وكان كل همهم مصالحهم تكبر وتزيد يعني اللي عنده مليون بيطلع الدورة بأربعة مليون وكان بيضحك علينا بشوية فكة.
العضو معيط: أنا والله انتخبت واحد تلات دورات شفته فيهم »3 مرات« وغير كده سلامتك يبقي إزاي أمشي وراه تاني بعد ما ربنا فضحهم.
العضو النمرود: أنا عندي ياجماعة اقتراح سليم وهو اننا في كل محافظة نعمل قايمة سودة بأسماء النواب دول ونضيف عليها أسماء المجالس المحلية ونعلقها علي أبواب الجوامع علشان الناس تعرفهم ونسميها القايمة السودة.
العضو نطاط الحيط: والله الاقتراح وجيه ومهم وبرضه الناس من جواها خلاص قرفانة منهم وأنا أنصحهم إنهم يبعدوا عن الانتخابات أياً كانت مجلس شعب أو محليات وإحنا عاوزين نخدم بحق وحقيق وكفاية علي البلد اللي شافته في أيامهم السودة.
العضو بهلول: والله أنا نفسي قبل ما أودع الدنيا أشوف مصر منورة وحلوة وكل حاجة فيها متوفرة والناس حالها ميسور ونمسح من حياتنا الأكل بالبطاقة لانها عار علي شعب مصر وعلي بلد زي مصر.
الرئيس: كفاية علينا ختام الجلسة بكلام العضو بهلول.
*الفلاح الفصيح