رسالة للمجلس العسكري

عقد مجلس برلمان المصطبة جلسته الأسبوعية لمناقشة جدول الأعمال:
الرئيس: معروض علي حضراتكم للمرة الثانية مناقشة موضوع القنوات التليفزيونية الحكومية.
العضو الفلفوس: حضرات الإخوة الأعضاء إننا نطرح هذا الموضوع للمرة الثانية حيث عرضناه في أيام الثورة في ميدان التحرير، وقلنا وقتها ليه يكون عندنا 12 قناة تليفزيونية ونسبة الفقر عندنا أربعين في المية من عدد السكان علاوة علي خمسة عشر مليون عاطل عن العمل وطالبنا أثناء وقفات الميدان بأن نوقف هذه القنوات فورا عن طريق صحيفة »الوفد« ولم نسمع حتي الآن أي كلام حول هذا الموضوع.
العضو زعيط: أنا عاوز واحد مفتح يشرح لي ليه عندنا 12 محطة تليفزيون مع إن غيرنا اللي أحسن منا حالا عندهم بالكتير محطتين.
العضو النمرود: شوف يا سيدي أنا أشرح لك الحكاية وما فيها انهم في قعدة مزاج أقصد جماعة طرة قالوا ليه مايكونش مصر فيها محطة للطبيخ فقاموا عملوا محطة للطبيخ فرد عليه واحد من جماعة طرة وقال: طيب ساعات الواحد يبقي زهقان وعاوز شوية فرفشة علي شوية هجص فقاموا وعملوا محطة للفرفشة، فقال واحد ثالث طيب أنا راجل أحب القراية والشعر فعملوا له محطة ثقافة وهكذا عملوا كل المحطات الرقص والفن ووصلوا لغاية اتناشر محطة تكاليفها في السنة تلاتة ونص مليار جنيه وعليها ديون اتناشر مليار جنيه من دم الغلابة.
العضو معيط: حيلكم شوية يا جماعة الحكاية انتم مش واخدين بالكم الحكاية هي عملية إلهاء الشعب في كلام فارغ زي الرقص والضحك الي آخره والناس تنسي الحاجات المهمة لكن يا خسارة نقبهم طلع فشوش.
العضو نطاط الحيط: أنا من هنا أطالب جماعة السلطة أن تفك كل المحطات وكفاية محطتين وبفلوس المحطات الزيادة نعمل بيها مشاريع الناس تاكل من وراها عيش بدل الفشخرة وحرام علي ولي الأمر اللي يشوف واحد جعان ويصرف الفلوس في كلام فاضي.
العضو الغلبان: أنا أناشد قائد المجلس العسكري اللي الشعب في رقبته وربنا حايحاسبه يوم القيامة اذا لم يصدر قرار بوقف هذا التبذير والناس جعانة مش لاقية رغيف العيش ولا شربة مية نضيفة ولا دوا في المستشفي ولا حتي جلابية لولادة.
الرئيس: كفاية كدة ويرفع الأمر للمجلس العسكري حفظه الله.
الفلاح الفصيح
عثمان أبوزيد