لا تنازعوا ولا تقاتلوا

استأنف مجلس برلمان المصطبة جلساته في ظل العهد الجديد لمصر التي فتح الله عليها بالخير والأمن.
الرئيس: علي بركة الله نبدأ جلساتنا بعد أن حقق الله لمصر وضعها وقيمتها وسط محيطها العربي من مسلمين ونصاري.
العضو الفلفوس: حضرات الإخوة في كل قرية ،كفر ومركز انتبهوا وخدوا بالكم لأن التعابين والعقارب بدأت تظهر من شدة حرارة الجو وانتم طبعا عارفين قصدي إيه من التعابين وأقول لكم بكل وضوح التعابين والعقارب دول همة الناس اللي ضاعت مصالحهم وانكشفوا لأنكم يا أبطال كشفتوهم وبتحاكموا دلوقتي كبراتهم والنغمة اللي بيلعبوا بيها هي الاشاعات.
العضو النمرود: عاوز أضيف أو بمعني أصح أوضح القضية اكتر وهي إن فيه شباب الثورة وفيه شيوخ الثورة وبحكم السن الشباب كله حيوية ونشاط والشيوخ كلهم حكمة وهدوء فإياكم وإياكم وإياكم أن تتنازعوا وتختلفوا وربنا قال »ولا تنازعوا فتفشلوا وتذهب ريحكم« لأن الخلاف والنزاع هو المطلوب إنه يحصل فخذوا يا أهل مصر حذركم.
العضو زعيط: إحنا لازم ولابد نفضل إيد واحدة ولا نستمع لكلام الحاقدين اللي سرقوا البلد حتة حتة قيراط قيراط وعلي العموم مش حانسمح لهم تاني يمسكوا البلد.
العضو معيط: يا جماعة إحنا لازم نفتح عيوننا قوي لأن عندهم أساليب غريبة وآخر مثل شفناه حكاية الحزب الوطني الجديدة برئاسة أهل السادات ودي حاجة غريبة خالص ومش عارف إزاي أبناء السادات يوافقوا علي كدة مع إنهم عارفين إن الحزب ده أصبح مشبوه وليه ما يعملوش حزب تاني باسم تاني أشرف وأحسن مليون مرة.
العضو نطاط الحيط: الناس خلاص واعية وفاهمة وعارفينهم بالاسم ومش حايقابلوهم ولا يسمعوا كلامهم والمهم دلوقتي إن الشباب يهدأ ويتشاور مع الشيوخ الأحرار في مصر وكلهم معروفين ونتعامل مع الوضع القائم بعقلانية وتفهم شديد لكل ما يحدث طالما إن اللي قايمين علي الحكم في هذه الفترة الحرجة ناس وطنيين مخلصين لمصر لأنهم من تراب مصر وطالما إن كل المطالب بتاعت الشعب بتحقق وأظن أن محاكمة رأس الأفعي وأذنابه خير مثال علي كدة وإن التاريخ سيشهد بكدة والله المستعان.
الرئيس: ترفع الجلسة ونستكمل الجلسة الجاية.