استأنف مجلس برلمان المصطبة جلساته الأسبوعية بعد إجازة عيد الأضحى المبارك وهو أول عيد فى عهد ثورة 25 يناير الشعبية. شيخ المجلس: كل عام ومصر كلها بخير فى ظل ثورتها المجيدة. العضو الفلفوس: أنا طرأت على نفوخى فكرة طلعت صح ميه فى الميه وهى ان الراديو كان فيه عبدالوهاب بيغنى ويقول أغنية «ياوابورقول لى رايح على فين» وساعتها والله جت فى راسى الوضع اللى إحنا فيه فى بلدنا لأن الكل بيهاتى ويصرخ ويندب وساعات يلطم خدوده كأن مصر خلاص ضاعت والحكاية بقت سلطة ومفيش حد عارف مين بيحكم مين ومين اللى فى إيده القرار وكأن الشعب نايم ولا رأى له اطلاقاً والقرارات بتطلع من فوق وربنا يستر. العضو النمرود: والله ياجماعة اللى أنا شايفه إن كل اللى حصل انهم شالوا واحد وانتهى الأمر عند ذلك وكل اللى خربوا البلد ونهبوها زى ماهم قاعدين مربعين إما فى بيوتهم وهم الأغلبية أو بعض قيادتهم متحفظ عليهم فى سجن خمس نجوم معيشة من مأكل وملبس ونوم واحنا قاعدين نتخانق العربية أو الحمار مين الأول فيهم ومين العربية ومين الحمار بمعنى إن مصر المحروسة هية العربية واحنا الحمير ولا مؤاخذة. شيخ المجلس: يشطب كلام العضو النمرود من المحضر لإنه زودها حبتين. العضو زعيط: ياحضرة الشيخ اللى بيحصل ده لا يبشر بالخير لأن اللى بيعملوا القوانين اليومين دول بيفصلوها على المقاس مع أن ما سمعناه قبل كده ان مجلس الشعب اللى جاى هوه اللى حايفصل القوانين على مقاس الدولة مش على مقاس حاجة تانية وده اللى بنسمعه ونقرأه فى الجرانين. العضو معيط: أنا عاوز أقول ياجماعة طولوا بالكم حبتين وننتظر لما الانتخابات تنتهى ونشوف المجلس حايعمل إيه فى الكلام اللى حايعرضوه عليه واللى عمل الثورة العظيمة احنا ولغاية دلوقتى احنا مجندين فى الثورة وفى حالة طوارئ يعنى فى أى وقت نطلع ونقول لا ثم لا وإن جيشنا العظيم واقف لحمايتنا من أى جماعة عاوزة تفرقنا وتقضى علينا ومفيش داعى دلوقتى للخوف. العضو نطاط الحيط: مشكلتنا إن فيه دايماً ناس بيتطوعوا لخدمة الناس اللى فوق علشان منصب أو علشان حتى الظهور ويبقوا نجوم فى التليفزيون والجرانين ودول اللى بيسموهم ترزية القوانين يعنى يفصلوا لأسيادهم القوانين حسب الطلب ويحطوا شوية تحابيش علشان الناس الطيبة اللى زى حالتنا تفرح وتصقف وتهتف ودول حايفضلوا موجودين على طول والمهم ان الشعب لازم يفضل مفتح عينه. العضو بهلول: الله ينور بصيرتك يازميلى والدور علينا احنا يا أبناء الوطن إن ما نسمحش لحد يلعب بينا تانى ولازم بقى نرجع لأصلنا المصرى العظيم ونفوق وبلاش كسل وكل واحد يشوف شغله وكفاية مظاهرات ويحيا الوفد. شيخ المجلس: ترفع الجلسة. ------ الفلاح الفصيح عثمان أبوزيد
