85 مليون معلق سياسي

استأنف مجلس برلمان المصطبة جلساته الأسبوعية بعد توقف دام لمدة أسبوع.
شيخ المجلس: لدي طلب من الإخوة الاعضاء لمناقشة الهوجة الإعلامية علي الساحة المصرية في كافة وسائل الاعلام الصحفية والتليفزيونية والاذاعية المحلية والعالمية والمجلات.
العضو الفلفوس: حضرات الزملاء إن ما نراه علي الساحة السياسية المصرية شيء غريب وعجيب وأصبح التنافس علي التصريحات والتعليقات بين كافة الشعب شيء ملفت للنظر، وده في حد ذاته شيء طيب، لكن المسألة زادت عن حدها والحكاية دي عاوزة دكتور نفساني يشرحها ويعالجها.
العضو زعيط: يا جماعة الحكاية حكاية غيرة اشمعني فلان قال كذا وكذا ويقوم يقول كلام عكسه تماماً علشان الناس تتكلم عنه وتقول شفتم فلان الصحفي وفلان القاضي السابق وفلان العلاني والترتاني قالوا إيه وكل واحد يقول عكس التاني، ودي من عيوب الثورة والثوار ويا ناس اتقوا ربنا في بلدكم.
العضو النمرود: والله يا جماعة زعيط قال الحقيقة وده اللي بيحصل بالتمام والحكاية بقت هيصة ومش عارفين مين الصح ومين الغلط ومين اللي سيئ النية أو مين سليم النية.
العضو معيط: حيلكم شوية يا جماعة لأن الناس دول كان عندهم كبت وبيخافوا من البعبع، ولما قامت الثورة انفتح باب الكلام بحرية ومفيش مانع ان الناس تبعبع وتفك شوية عن نفسها.
العضو نطاط الحيط: يا جماعة حيلكم دا الحكاية غير كده لأن محطات تليفزيون لها أهداف معينة من ورا الحكاية دي واللبيب بالاشارة يفهم علي رأي المثل فلازم ولابد اننا نغربل كل الكلام اللي بنسمعه وبنقراه ونشوف مين وراه علشان نعرف إيه القصد منه.
العضو الفلحوص: أنا عاوز أقول ان مصر فيها اليومين دول 85 مليون محلل ومعلق سياسي وقانوني واعلامي والشعب كله بشيوخه وأطفاله ورجاله ونسوانه بيتكلم في السياسة وكل واحد عكس التاني وهاتوا لي أربعة متفقين علي رأي واحد والحكاية بقت هيصة والكسبان أصحاب المحطات والجرانين وكل ده بيملكه رجال أعمال ومن صالحهم اللي بيحصل في البلد يمكن ترجع لهم تاني أحلامهم لكن أقول لهم عشم إبليس في الجنة.
العضو السهتان: والنبي انتم ناس علي نياتكم لأن كل اللي بيحصل ده في الجرانين والتليفزيونات غيرة جماعة من جماعة تانية زيها من غير ما أقول أوصاف أحسن أروح ورا الشمس وكل قناة عاوزة تبان انها مع الحق وكله بيكسب من كله والنهاية والخلاصة الكل عاوز يضرب الثورة لكن برضه أقول ودا بعدهم وحرام عليكم اللي بتعملوه في بلدكم واتفقوا علي رأي واحد اللي يجمعنا بدل ما احنا فرق وشيع وأحزاب وشلل ربنا ينتقم منكم.
شيخ المجلس: أظن اننا وضعنا ايدينا علي الحقيقة وربنا يحفظ مصر وشعبها من الفتن ما ظهر منها وما بطن فالله خير حافظاً.
الفلاح الفصيح
عثمان أبو زيد