لا تتنازعوا

يوصل مجلس برلمان المصطبة جلساته الطارئة لمتابعة ما يجري علي الساحة الوطنية..
شيخ المجلس: حضرات الإخوة الأعضاء نحن نتابع الآن ما يجري علي الساحة السياسية في بلدنا وبما أننا أهل المصطبة فإن ما يحدث علي الساحة السياسية يهمنا بالدرجة الأولي حيث إننا نمثل أغلبية الطبقة المغلوبة علي أمرها سابقاً ولنبدأ المناقشة.
العضو الفلفوس: حضرات الإخوة والاخوات بادئ ذي بدء لازم ولابد أن نتابع ونشارك في ما يجري علي أرض المحروسة مصر لأن ده مستقبلنا ومستقبل أولادنا وأقول بكل وضوح احنا مع الأغلبية العاقلة المتعقلة ولا ننساق وراء الشعارات البراقة وكفاية خطب وكلام جرايد.
العضو زعيط: يا جماعة حيلكم شوية أنا مش فاهم أخونا الفلفوس عاوز يقول إيه وعاوز واحد ينورنا.
العضو النمرود: أنا أشرح لكم فأخونا الفلفوس قصده يقول أنا خايف من إن الشعب يصبح فيه قبايل وشيع وشلل وكل واحدة من دول عاوزة حتة من الكحكة زي ما بيقولوا بتوع السياسة والمطلوب أن نتفق علي كلمة سواء ولما تستقر الأحوال يبقي كل جماعة تعمل اللي هي عاوزاه فالمهم اليومين دول توحيد الصفوف.
العضومعيط: والله يا جماعة أنا أتعجب وأستغرب من اللي بيحصل ده ليه ما نقعدش مع بعض من غير ممثل للسلطة وكل واحد يقول اللي عنده ونقول أيوه ده صحيح وده غلط وده يمشي وده يتأجل شوية لغاية ما نوصل بر الأمان.
العضو نطاط الحيط: يا جماعة الخير انتبهوا وفكروا بالهداوة بلاش الزرزرة دي لأن مصر دلوقتي في حاجة للتفكير الهادي السليم لغاية ما نوصل بر الأمان زي ما قال زملائنا فبالله عليكم »لا تتنازعوا فتفشل ريحكم«.
العضو بهلول: أنا عاوز أقول كلام حلو قاله قائد عربي للعساكر بتوعه لما حب يروح يفتح بلاد الفرنجة قال إيه: »البحر أمامكم والعدو خلفكم« كان يقصد يقول علي الجنود أن يختاروا أي موتة وإحنا كمان دلوقتي قدامنا خيارين إما نتكتل كلنا يد واحدة علشان نعدي لبر الأمان أو نترك جنود الفساد يطادوننا ويستفردوا نا جماعة جماعة ولا مفر من التكتل لعبور المحنة إن كانت هناك محنة.
شيخ المجلس: صدق العضو بهلول ولازم نتحد ونتكاتف وننسي المصالح الشخصية علشان نعبر لشاطئ الأمان.
الفلاح الفصيح
عثمان أبوزيد