على المصطبة

صح النوم يا قوم

عقد مجلس برلمان المصطبة جلسته وسط جو من الحزن على فراق الأجناد من خير أبناء الأرض وهم جند مصر اللي قال عنهم الرسول الكريم انهم خير أجناد الأرض فرحمة الله عليهم وهنيئا لهم بالجنة من غير حساب.
الرئيس: حضرات الاخوة سنناقش في هذه الجلسة القرار اللي اتخذته الدولة بوقف التعامل مع المنتجات التركية.
العضو الفلفوس: عاوز أقول إن بلدنا الآن انتقلت من عصر الاهمال والكسل الى عصر النهضة فلا يعقل أبداً أن نستورد كل حاجة من المية للطاقية والفانلة والشراب والصابون الى آخره من تركيا وغيرها.
العضو النمرود: كفاية نوم لانه مش معقول ان احنا نستورد جبنة بكافة أنواعها من بلاد لا فيها زراعة ولا مواشي وإذا كان عندنا قصور في شىء نكمله ونقفل الباب نهائيا وننتج احنا حاجتنا ولازم المستثمرين يطوروا مصانعهم مقابل ان الدولة تحميهم من المنافسة بمنع الاستيراد نهائيا الا للفنادق السياحية.
العضو نطاط الحيط: أنا لما قريت القايمة اللي بنستوردها من تركيا وغيرها قلت طيب فين منتجاتنا قالوا الحاجة الغريبة أحلى من القريبة وضربت كفا بكف وقلت يا عيني عليك يا مصر يا بلد الخير أصبحت تستوردي جبنة ولبن وغيرها يعني كده حياتنا بقت استيراد.
العضو زعيط: لأ فيه حاجة كمان وهى اننا بنستورد ملابس من بلاد بره واحنا بلد القطن اللي شهد بيه العالم يا وكستنا ويا خيبتنا.
العضو معيط: عاوز نعرف لما بنستورد الحاجات دي من بلاد بره فاضل ايه عندنا غير مستورد حتى العمالة بنستوردها يا وكستنا ويا فضيحتنا.
العضو نطاط الحيط: إحنا دلوقتي المفروض اننا انتقلنا لعصر وعهد جديد فلازم ولابد نفكر في حل كل الحاجات دي وأنا أقترح اننا نقفل البلد تماما بعد عمل دراسة من الخبراء بتوعنا ونشجع شركاتنا وندعمها ونمنع استيراد البضايع اللي بننتجها وتكون احسن من المستوردة وأرخص منها كمان فلا يجوز أن نستورد جبنة ولبن وهدوم وجزم وإلا ينطبق علينا المثل اللي بيقول يا أبو زيد كأنك ما غزيت.