اصبروا وصابروا

عقد مجلس برلمان المصطبة جلسته الأسبوعية لمناقشة جدول الأعمال.
الرئيس: حضرات الإخوة الأعضاء معروض علي حضراتكم قضية كثرة الشكاوي والمظاهرات والمطالبات من فئات الشعب المختلفة.
العضو الفلفوس: حضرات الإخوة الأخوات من كافة فئات المجتمع إن بلدنا المحروسة مصر ولدت من جديد وأصبحت مصر غير مصر اللي فاتت يعني كده بالصلاة علي النبي يمكن نسميها مصر الجديدة يحكمها نظام غير النظام الميت وكلها أمل ونهضة ولكن للأسف الشديد تطلع علينا من وقت لآخر هبات لا معني ولا طعم لها من فئات في الواقع عندها حق ولكن هذا ليس وقت المطالب.
العضو النمرود: يا جماعة لا تلوموا الناس اللي بيطلعوا يطالبوا بحقوقهم فمعهم العذر من اللي شافوه وعاشوه طوال السنين اللي فاتت فاعذروهم.
العضو زعيط: صح كلامكم لكن فيه حاجة اسمها أصول وهي إن إحنا دولة زي ما بيقولوا مولودة من جديد فلازم ولابد إننا نراعي الظروف اللي بيعانيها الناس اللي في الحكم ولازم كمان نسيب لهم الوقت علشان الأمور تمشي في هدوء وتتحقق طلباتنا.
العضو معيط: يا جماعة ما تنسوش إن الناس اللي بتطلع في مظاهرات واعتصامات عاشت حياتها كلها تحت القهر والذل والخوف لما كانت بتطالب بحقوقها وعلشان كده كانوا أول المتقدمين في مظاهرات الملايين ولهم عذرهم فلا تلوموهم وعاملوهم بالحسني.
العضو نطاط الحيط: فعلاً الناس دي هيه أصحاب البلد اللي اتضح من التحقيقات إن حقوقهم تحولت في العهد البائد إلي مليارات من الدولارات والفلل والشقق والأراضي الزراعية والشاليهات وهمه عايشين في عشش من الصفيح وعلشان كده خايفين وبيطالبوا بحقوقهم وما عندهمش صبر.
العضو الفلحوص: أنا اللي شايفه إن الجماعة اللي في الحكم ناس وطنيين من طينة وعجينة الناس اللي بتتظاهر علشان حقوقهم، فلازم ولابد إن إحنا نصبر شوية عليهم ونعطيهم الفرصة علشان البلد اللي استلموها خرابة وإن شاء الله ربنا حايوفقهم.
الرئيس: حضرات الإخوة خلاصة الجلسة إن إحنا نوقف المظاهرات والإضرابات اللي تسبب تعطيل العمل والإصلاح ونعطي لهم فرصة التخطيط والتنفيذ حتي يتحقق ما نريده لكن كل بشرط واحد وهو ألا تغفل عيوننا عن المراقبة ولا ننام ولا نسلم رقابنا لهم.. والله الموفق واصبروا وصابروا فأنتم الأعلون.
الفلاح الفصيح
عثمان أبوزيد