شباك علي الثورة

الثوار لهم رأي تاني

قبل ما أقول لك حمدآً لله ع السلامة من مرسي مطروح عايز أقول لك بقين محشورين في زوري.
قلت للدكتور أشرف:
وساكت من يومها ياحكيم!! يا أخي ياقلبك.
وقال ميشو للدكتور أشرف:
سمعنا يا عندليب.
فقال الدكتور أشرف:
انت مش ملاحظ انك كل ما بتخرج من القاهرة في أي اتجاه الخبر بيهل علينا!
فقال ميشو:
لأ مش ملاحظ الحقيقة وياريت يا حكيم تقول لي خير ايه الله لا يقدر اللي شفتوه في غيابي.
قلت لميشو:
غيابك في حد ذاته خير ياميشو.
فقال ميشو:
تشكر ياعم أحمد.
قلت:
العفو لا شكر علي واجب ياميشو.
فقال الدكتور أشرف:
إنما أنت إيه رأيك صحيح ياعم أحمد في اللي حصل.
قلت:
ماهي حاجات كتيرة حصلت ياحكيم.
وقال ميشو:
وحاجات كتير حتحصل ياتري تقصد إيه باللي حصل في غيابي.
فقال الدكتور أشرف:
مش الريس مرسي أعفي المشير وعنان من منصبيهما؟
قلت:
ومنحهم قلادة النيل وعينهم مستشارين له ودا أعلي نوع من التقدير والتكريم.
فقال ميشو:
إيه رأيك انت ياحكيم؟
فقال الدكتور أشرف:
رأيي في إيه بالضبط.
فقال ميشو:
في التقدير والتكريم.
فقال الدكتور أشرف:
دي وجهة نظر شخصية!
قلت:
وجهة نظر شخصية ياخدهم البيت يكرمهم هناك وان كان البيت مش فاضي ياخدهم يكرمهم علي قهوة إنما القصر الجمهوري لأ وضحك الدكتور أشرف وقال:
انت ليه سماوي كده ياعم أحمد يا أخي قول عفا الله عما سلف.
قلت:
أنا عن نفسي ماعنديش مانع أقول عفا الله عما سلف لكن الثوار لهم رأي تاني.
فقال ميشو:
أيوه صحيح ياحكيم عفا الله عما سلف بالنسبة لايه بالضبط.
قلت:
بالنسبة للشباب اللي في عمر الزهور اللي قتلهم المجلس العسكري في الشوارع في وضح النهار دفاعاً عن نظام المخلوع الفاسد.
فقال ميشو:
ولا بالنسبة للعيون الشابة التي فقأها قناصة النظام المجرمون.
وقال الدكتور أشرف:
ولا بالنسبة للشهداء الذين ألقوهم علي أكوام الزبالة كنوع من التكريم.. لا لا ياعم أحمد ما عفا الله عما سلف ولابد من القصاص وضحكنا جميعا.