شباك علي الثورة

شفت الهلفوت ياعم أحمد؟
هكذا بدأ عبده شمه حديثه
قلت:
أيهم فهمو كثر؟
فقال شمه بمنتهي القرف:
الولد اللي طالع علي التليفزيون المصري يمدح إسرائيل!
قلت:
طبعا شفته
فقال:
بذمة النبي دا كلام؟ أنا عايز أعرف مين اللي سمح له
يطلع يجول الكلام ده؟
فقال أحمد القزعة:
ديمقراطية ياغيبوبة.. هي دي الديمقراطية
فقال عبده شمه:
يا أخي ملعونة الديمقراطية اللي تمدح في قتلة الأطفال والأنبياء
قلت له:
ياحاج عبده القاتل مع سبق الإصرار والترصد القاضي بيمنحه حق الدفاع عن نفسه وبيسمعه للآخر قبل ما يصدر الحكم عليه ثم ما تنساش إن الأخ المسلم اللي كان معاه في الحلقة مسح بيه الأرض واتهمه علناً بالجاسوسية والخيانة العظمي.
وقال أحمد القزعة:
عايز إيه تاني ياعم الغيبوبة
وضحك أحمد القزعة وقال:
يبقي مافيش حل غير أنك تلبدله في القصب وتطخه عيارين عشان نخلص منك ومنه.
فقال عبده شمه:
وتجعد أنت بوزك في بوز عمك أحمد راضي يبجي حرام
ثم ضحك قائلاً:
وتيجي عقوبة ياعم أحمد وأنت ما تستاهلش العقوبة.
فقال القزعة:
لأ ما تحملش هم عمك أحمد اعملها انت بس »حيكون سيد فساكه ربنا فك سجنه والقعدة مش تحتاج حد تاني.
وقال الحاج عبده شمه للقزعة:
بس ياد ياتافه أنت خلينا نعرف الدنيا رايحة فين وجاية منين
قلت له:
اطمئن ياحاج عبده، الدنيا رايحة زي محنا عيزين لأن البلد بقت بلدنا.
فقال:
طيب وفلول النظام السابق والحزب الوطني
قلت:
أهلاً بكل فلول الدنيا مادمنا نحكم بسيادة القانون والرقابة الشعبية علي المسئولين واللي حيتوب ويشتغل بما يرضي الله يبقي عفا الله عما سلف واللي حيقع مافيش رحمة.. هو دا عدل ربنا واحنا مش ناويين ننتقم من حد احنا عايزين كلنا نشتغل عشان نبني مصر المحروسة علي عجب عينينا.