شباك علي الثورة

ضحك أحمد القزعة بسعادة وهو يقول
شفت الأنارب؟
وضحك الحاج عبده قائلاً:
اسمها الأرانب ياجهول.
فقال أحمد القزعة:
جتها نيلة اللي عايزة خلف.. اسمها الأرانب وبعدين؟
فقال الحاج عبده شمة:
وبعدين انت؟
فقال أحمد القزعة:
أيوه صحيح أنا كنت باقول إيه؟
قلت له:
كنت بتتكلم عن الأرانب وما قلتلناش مين هم؟
قال:
هو فيه غيرهم مجموعة الانتيكات المترصصة علي العروش العربية كجزء من التاريخ القديم.
فقال شمة:
تجميد ملوك الخليج لصوص النفط العربي؟
فقال القزعة ضاحكاً.
عفارم ياغيبوبة هما مافيش غيرهم.
فقال الحاج عبده:
أيوه مالهم دول.
قال القزعة:
مفاصلهم سابت وركبهم بتلق من الثورة المصرية.
فقال شمة:
إياكش يولعوا بجاز.
وقال القزعة:
إن شاء الله حيولعوا عن قريب جداً قولوا آمين.
قلنا:
آمين يارب العالمين.
وقال أحمد القزعة:
شيخ المنسر السعودي ماكفاهوش احتلال البحرين لحماية زميله خليفة من بطش الشعب العربي البحريني اللي ساح دم شبابه في الشوارع وتساقط شهداؤه برصاص الأمن البحريني وقنابل الجيش السعودي المحتل يقوم يستفتي أبناء عمه الصهاينة فيفتوه.
وتساءل الحاج عبده:
- يفتوه كيف يعني؟
ويضحك أحمد القزعة قائلا:
- انت مش عايش في الدنيا يا غيبوبة .. يا ابني يفتوه يعني ينصحوه
قال شمه:
- أيوه أيوه فهمت عليك. ونصحوه بإيه ان شاء الله؟
فقال القزعة:
- نصحوه بأنه يخش جمعية
فقال الحاج عبده:
- ويجبضها الأول؟
ونظر لي أحمد القزعة قائلا:
- طب اعمل إيه في غباوة الشخص ده .. يا بني آدم الملوك ما يخشوش جمعيات من بتاعتنا أم خمس جنيه في الشهر
فقال شمه:
- أمال كام يعني يا واكل أبوك؟
وصرخ القزعة في وجهي.
- يا عم أحمد ارحمني يا عم أحمد ابوس رجلك تخلصني من الشخص ده
فضحك الحاج عبده قائلا:
- يخلصك مني كيف؟ هو انت علي زمتي؟
فقال القزعة:
- طب إيه رأيك بقي اني مش ح اكمل إلا بكره
قلنا:
- بإذن واحد أحد