شباك علي الثورة

القيادات فين؟

كان صوت ام كلثوم يخدش الصمت الثقيل الذي خيم علي كل مصر المحروسة بعد مجزرة رفح.
يا فتية النيل الحبيب خذوا المدي
واستأنفوا نفس الجهاد مديدا
وابنوا علي اسس الزمان وروحه
ركن الحضارة باذخا وشديد
وجه الكنانة ليس يغضب ربكم
ان تجعلوه بيتكم معبودا
إن الذي قسم البلاد حياكمو
بلداً كأوطان النجوم مجيداً
هنا قال ميشو:
- انما انا عندي سؤال فني.
فأجابه الدكتور اشرف:
- اسأل يا غتت.
قال ميشو:
- المذبحة حصلت ساعة الافطار الجماعي والشهداء كلهم مجندون وصف ضباط أمال القيادات كانت بتفطر فين؟
فقال الدكتور اشرف:
-ياااه تصور ياعم احمد ان السؤال ده مطروح من يوم 5 يونيو 1967.
ضحكت بمرارة وقلت:
- وحتي الان لم نسمع الإجابة عليه.
فقال ميشو:
- وبيتهيألي مش حنسمعها.
قلت:
- ليه يا أبو يوسف؟
قال علي الفور:
- هي القيادات اتغيرت من يومها
قال الدكتور اشرف:
- تصدق ياعم احمد ان المعفن ده بيتكلم حلو النهاردة.
قلت:
-ولكن المجلس العسكري هو والرئيس مرسي هددوا بالانتقام الشديد والرهيب.
فقال ميشو:
- من مين يا حكيم؟ من مين ياعم احمد؟
فقال الدكتور اشرف:
- مافيش قدامهم الا احنا بقي.
قلت:
- وبعدين؟
فقال الدكتور اشرف:
- وبعدين ما انت عارف بقي.
قلت:
- ما هو ده اللي مخوفني يا أشرف.
فقال ميشو:
- حتخاف علي ايه تاني بعد شهدائنا ما اترموا في الزبالة وشبابنا خزقوا عينهم وبناتنا انتهكوهم في الشوارع والميادين العامة، حتخاف علي ايه تاني يا عم احمد.
وقال الدكتور اشرف لميشو:
- انت يا واد جبت المرارة دي كلها منين وانت لسة ما طلعتش من البيضة؟
قلت:
- المثل الشعبي بيقول اللي ما يربيهوش أهله تربيه الايام والليالي.
فقال ميشو:
- واللي ماتربيهوش الايام والليالي.
قلت:
- يربوه ولاد الزواني وانتوا بقي عارفين مين ولاد الزواني واطلعوا بقي من دماغي.