شباك على الثورة

محاكمة الإخوان

مين قال سالم يادكتور؟ ولا انت تقصد صلاح سالم؟
قلت له:
تصدق انك غتت؟
قال لى:
أصدق.. لكن ليه؟
قلت:
لأنك عامل فيها عبيط وما عندكش أى فكرة عن عسكر يوليو وانت عارف صلاح سالم اللى هو أخو جمال سالم اللى انت مش عارفه وبتسأل عمه.
ضحك وقال:
ياعم أحمد صلاح سالم عاملين له شارع على اسمه وعشان كده أنا عارفه إنما جمال سالم ده مش عاملين له أى حاجة.. أعرفه إزاى بقى!
قال الدكتور أشرف:
دول ياابنى كانوا حداشر بالتمام والكمال اللى قاموا بالحركة اللى شالت الملك فاروق من على عرش مصر.
فقال ميشو.
واشمعنى يعنى ؟؟ بالتحديد.
قلت له:
دول هما اخوات سيدنا يوسف اللى حلم بيهم «قال يا أبتِ انى رأيت أحد عشر كوكبا والشمس والقمر رأيتهم لى ساجدين قال يابنى لا تقصص رؤياك على إخوتك فيكيدوا لك كيداً إن الشيطان للإنسان عدو مبين»، وماسمعتهاش ولا مرة؟
قال:
سمعتها عشرين ثلاثين مرة من عم الشيخ مصطفى إسماعيل فضحك الدكتور أشرف قائلاً:
طيب ما انت بتفهم أهه أمال إيه الإشاعات دى؟
قلت:
إشاعات يادكتور.
فقال ميشيل:
انتو كده هتضيعوا منى جمال سالم وأنا مصمم أعرفه بشدة.
قلت له:
لا ماتخافش بكره تعرفه لحد ماتطفحه وعموماً هو كان رئيس المحكمة اللى بتحاكم الإخوان.
فقال الدكتور أشرف:
وكانوا مختارينه باعتباره البرم اللى فيهم وهو ساق الهبل ع الشيطنة طول المحاكمة فبقى حتة دين فرجة تموت م الضحك.
فقال ميشو:
تموت من الضحك إزاى يادكتور دا حكم على كام واحد بالإعدام واتنفذ فيهم الحكم.
قلت له:
مرة وهو بيستجوب يوسف طلعت قال له:
تعرف تقرأ قل هو الله أحد بالمقلوب؟
فقال ميشيل:
بس دا يبقى كفر ياعم أحمد.
فقال الدكتور أشرف:
وهو حد قال لك عنه إنه الحاج جمال سالم؟
فقال ميشيل:
وكان إيه رد فعل الشارع على الكلام ده؟
قلت:
الشارع ماكانش لسه بقى له ردود أفعال زى ما حصل فى ثورة 25 يناير المجيدة.
فقال ميشو:
يعنى الكلام ده كان ما قبل التاريخ؟
قلت:
هو كده تمام.
أحمد فؤاد نجم