مالك عدلى لم يخرج من زنزانته منذ 34 يومًا

كشفت أسماء على، زوجة المحامى الحقوقى مالك عدلى، عن وضع زوجها فى السجن، وقالت فى تدوينة على حسابها بموقع التواصل الاجتماعى "فيس بوك": "اكتبوا عن مالك، مالك مبيخرجش بره زنزانته بقاله 34 يومًا، مانعين عن التريض نهائى يعنى حرفيًا قاعد فى زنزانة اتنين فى تلاتة متر مبيخرجش براها نهائى مبيشوفش شمس".
وأضافت: "دا بدأ يأثر على صحته بشكل سلبي جدًا، بدأ يشتكى من تيبس في المفاصل في رجليه مبقاش بيحركهم كويس، بقى عنده مشاكل في ضهره من النوم على الأرض من غير سرير ولا حتى مرتبة".
وتابعت: "مش عايزين حاجة أكتر من إن مالك يتعامل زي باقي المساجين، يتطبق عليه لايحة السجن، مالك جدع وفاهم وراضي إنه بيدفع تمن، أنا مش عايزة مالك يخرج من الحبس عيان".
واختتمت: "مش عايزين أكتر من تطبيق اللايحة، الداخلية طول عمرها ند خسيس مقدروش على مالك بالحجة وبالمنطق وبالقانون، مصدقوه وقع تحت إيديهم أسير وبينكلوا بيه، اكتبوا عن مالك كتير".
يذكر أن مالك عدلى قبض عليه كمتهم في القضية رقم 4016 لسنة 2016 إداري قسم ثان شبرا الخيمة، بتهم محاولة قلب نظام وتغيير دستور الدولة ونظامها الجمهوري وشكل الحكومة، والانضمام إلى إحدى الجمعيات والهيئات والمنظمات التي تبغي إلي تعطيل أحكام دستور الدولة والقانون ومنع مؤسسات الدولة وسلطاتها العامة من ممارسة عملها والإضرار بالوحدة الوطنية والسلام الإجتماعي، فضلا عن الترويج بالقول والكتابة للأغراض محل الإتهام الأول وذلك بأحد الطرق المعدة للتوزيع والطباعة.