معتقل ب «وادي النطرون» : بعد حفلة التعذيب اللواء قال «إحنا مش خايفين من بتوع حقوق الإنسان مش هينفعوكوا»

كتب المعتقل عبد الرحمن فؤاد الشهير ب «بوشكاش» أحد معتقلي جامعة القاهرة المقبوض عليهم 16 يناير الماضي من محيط الجامعة بعد تأديتهم لامتحاناتهم واتهامهم بقتل زملائهم الذين لقوا حتفهم أثناء الاشتباكات بين قوات الأمن وعدد من طلاب الجامعة رسالة قص فيها شهادته عن أحداث التعذيب بسجن وادي النطرون وجاء نص الرسالة كالتالي :
في الساعة 10 الصبح كنا بنبص من الشباك لقينا 3 عربيات أمن مركزي .. و4 ظباط قوات خاصة .. وبعدين سمعنا صوت ضرب نار عالي جدا كنا فاكرينه خرطوش وبعدنا عن الباب .. وكان رصاص صوت بعد كدا سمعنا اصوات الناس فى الزنازين التانية بتهتف وصوت ناس بتنضرب فجأة لقيناهم فتحوا علينا الزنزانة ونزلوا علينا ضرب بالعصيان والشوم في كل حته.
واحد معانا اسمه سيد الغيطاني زق الظابط كان بيحاول يحمي نفسه خد أربع غرز في وشه وحصله شرخ فى إيده ده غير إنه دخل أسبوع انفرادي تأديب ومترحلش معانا على النيابة.
بعد الضرب وتكسير الضلوع وسط صريخنا والوجع اللي بياكل فينا خدوا منا كل حاجة وقلعونا كنا بالبوكسرات بس .. خرجونا بره فى الشمس وقعدنا غموا عيونا وربطوا ادينا ..
جه لواء كده من مصلحة السجون قعد يتكلم وهددونا كتير جدا بكلام نصه مش فاهم معناه .. قال أحنا مش خايفين من بتوع حقوق الإنسان مش هينفعوكوا .. واللواء قال : “تحت العنوان ده جمل كتير فاحنا ممكن نعمل معاكوا جملة جملة “.. أنا مفهمتش يقصد إيه ؟!
طبعا كسروا كل حاجة فى الزنزانة الكاتل وسخانات الماية .. إدوا هدومنا للجنائيين والأكل والسجاير إدوها للعساكر .. وكنا بنبقا 15 واحد فى زنزانة حطونا 25 واحد فى زنزانة مع الجنائيين.
انا اضربت في كل حته لكن رجلي وضهري كانوا اكتر حاجة وشعار نفس الكلام لكن ضهره متعلم عليه جامد .. عبدالرحمن اسامة والناس إللي كانت بتمتحن معاه فى طره جم بعد الضرب إللي حصل دخلوا وكنا احنا قاعدين بره.
لما رحلونا عشان الجلسة رحنا بهدوم مقطعة على البوكسرات ولا معانا أكل ولا ماية ولا اي حاجة .. رحنا ومعانا كل التهديدات اللي سمعوهلنا وعلموا بيها على جسمنا ..
عرفنا إن التعذيب إللي اتعرضنا له كان بسبب انهم سمعوا ان في ناس هتضرب عن الطعام وده رعبهم جدا غير انهم منعوا التريض في اليوم ده فبدأ ناس كتير من الزنازين تهتف بصوت عالي وتعترض.
من ضمن التهديدات إن الزيارات اللي بنصبر نفسنا بيها وناخد أهلنا بحضن بنرمي فيه كل وجع وهم هتبقا من ورا السلك زي المجرمين او هيلغوها !! غير إنهم غربوا ناس كتير لسجون تانية زي شريف من 6 أبريل اتنقل سجن الوادي الجديد .. وفرقونا على زنازين تانية مع الجنائيين .