مأساة جديدة من مآسى محكمة الأسرة.. بطلتها سيدة شابة في العقد الثالث من عمرها لجأت للمحكمة لرفع دعوى نفقة ضد زوجها بعد زواج دام 15 سنة، أثمر ولدين وبنتًا، وفى النهاية تزوج من أخرى وأهملها ورفض الإنفاق على أولاده. بسؤال الزوجة البائسة عن طبيعة قضيتها وسبب لجوئها لمحكمة الأسرة، قالت: "اسمى خضرة أحمد السيد، 34 سنة، وشهرتى عبير، جاية محكمة الأسرة علشان أرفع قضية نفقة على جوزى.. اتجوز عليا ورامينى أنا وتلات عيال بنتى الكبيرة عندها 13 سنة وابنى عنده 12 سنة ومحمد الصغير عنده 5 سنين". وتواصل خضرة كلامها: "خدنا بعض عن حب كبير أوى حصلتلى حادثة درت معاه مكسرة وكنت مخطوبة له..لكن كتر خيره وقف معايا وما سبنيش وبعد 15 سنة من الجواز بعد ما ربنا كرمنا بتلات عيال راح اتجوز عليا واحدة من عندهم من المنيا كان بيحبها من زمان بس محصلش بينهم نصيب هي اتجوزت تلات مرات وهو اتجوز، بعد كدة رجعوا لبعض تانى كان في بينهم شغل مصلحة.. يجيبوا شغل من جمعية رسالة ويبيعوه على حسابهم في المنيا، على أساس أنهم بيبعوه لجمعية لكن هما بيبعوه في السوق للناس وبيكسبوا آلاف". تلتقط الزوجة المكلومة أنفاسها لتكمل كلامها، قائلة: "هو مكنش قايللى لكن عرفت بعدها بتلات شهور..بالطبع ما فيش واحدة عبيطة عن جوزها..قلتله ياخليل أنت اتجوزت عليا في السر قاللى لا مين قالك قلتله محدش قاللى". تستكمل خضرة كلامها: "بعدها بيومين قاللى ياعبير أنا اتجوزت قلتله مين قاللى سحر قلتله طيب ليه أنا قصرت معاك في حاجة أنا عملت معاك حاجة طيب بدل ما تربى عيال غيرك ربى عيالك هي معاها تلاتة وإنت معاك تلاتة قاللى أهو اتجوزتها وخلاص". وعن حياتها مع زوجها تقول: "أنا اتجوزت جوزى على حصيرة يعنى دخلت على حصيرة ومطلبتش حاجة زى البنات عايزة وعايزة، لكن قلت خلاص طالما أبويا وافق وكتب القايمة وخلاص ودي حياتى وأنا اللى هبنيها معاه، ووقفت جنبه وتعبت معاه واشترينا دولاب وسرير وربنا كرمنا وجبنا كل حاجة حتى الكمبيوتر جبناه". وتضيف: لكنه استندل واتجوز عليا ورمانى أنا وعياله ورفض يبعت ليهم فلوس طيب أنا هتصرف إزاى وأعمل إيه أبويا مات وإخواتى ليهم بيوتهم وكل واحد يادوب بيصرف على بيته بالعافية، وأنا مش قادرة أشتغل علشان العملية مأثرة فيا". وتنهى الزوجة كلامها: أطلب من القضاء يقف جنبى قبل ما أتشرد بعيالى أو أمشى في الحرام علشان أأكلهم.
