رباعيات عباد الشمس

اهمس اغنيه بصوت.. مكبوت
عن احلام الرمان.. والتوت
وباسجل كل كلام العشق
جايز اعرف احبك.. بعد ما اموت
***
اروع ما في العقل فنونه
وابدع ما في الفن جنونه
وشفايفه النونو صحيح بتجنن
بس الاخطر منها.. عيونه
***
يا حبيبتي انا نفسي في مرّه تدوقي
نبضات العشق ازاي في عروقي
تسهري تسكري زيي انا..واكتر
هتلاقي نفسك.. مش عايزه تفوقي
***
مين يمنع عصفور بيغنّي
او يحرمني امارس فنّي
او يقدر يمنعني احبك
او يتجرّأ.. ياخدك منّي
***
خربشتي في قلبي لاقيتي النار
وبتطلع وياها الاشعار
ابعدي ايدك بقي يا حبيبتي
وكفايه واحد مننا.. محتار
***
بتباني في اي زمان.. ومكان
يتبعتر في عينيه المرجان
خليكي صريحه معايا بقي
وقولي لي انك واحده من الجان!
***
حبك مش نزوه.. ولا موضه
دي حكايه مكتوبه.. ومفروضه
طبعا كان لازم اغرق فيه
وكإنه مثلث برمودا