لما تغيبى..

أنا بتلخبط بين السكر والملح..
وأدور ف الدولايب
على حبة فرح..
وملاقيتش..
أنا والبيت بنتوه من بعض
وبابص فى وشه مايعرفنيش
وبخاف م القطة لما تنونو
ومن صوت الريح
اللى بيهرب من بين الشيش..
كل الحاجات الحلوة يا حبيبتى
بترفض تعيش.. من غيرك
بينى وبينك..
أنا بحتاس..
بنسى العناوين
وأسامى الناس
باكل..
واشرب..
واضحك..
واكتب..
لكن كده.. من غير إحساس
وانسى القهوة تفور ع النار
ويروح الطعم
ويضيع الوش..
كل المرايات يا حبيبتى بتكدب
وتغش..
أنا عن روحى بغيب
وبحس أن النفس اللى ف صدرى
غريب..
أصل الدنيا يا حبيبتى
مش على طول بتروح وتجيب..
قلوب طيبة..
أرجوكى.. خليكى قريبة
حتى لما تغيبى..