والريق - الأرض الشرقانة - بيبقى بضحكة ، عيدان / عناقيد . وجناين تطرح قبل ادان الفجر العيد . نتقابل تنكتب المواعيد . مرسوم على وشك ضحكة لغلبان ، بيصوم رمضان . وبيفطر لما تعدى عليه، ترمي له “مساء الخير”. دوبني هواكِ نسيم . وبقيت النفس الداخل قلبك فرحان . ما عرفتش ليه محروق وانا طالع لكن باسأل نفسى لو ضحكة وشكِ قلبك أمال الهم المتكوم جواك دا إيه ؟ يا سميحة حرام نتغرب عن نفسينا ، ونشيل ف همومنا هموم الناس . مين خلق الناس يبسطها يا ست الناس . يبسطها يعيطها ويغنيها ويفقرها يضحكها وينبح صوتها آهات ودموع خلقه يخسفهم ... ينسفهم كون وجعل له نظام لا ح نعدل حال الكون ولا نملك غير الضحكة الدمعة الأحلام . خلينا نعيش فيها إيه لو نحلم زى بقيت الخلق ؟ تقاسيم الدنيا يا بنت الناس ولا نملك غير ان احنا نعيط نضرب كف بكف فيه حب وهجر ... وليل - والفجر ؟ - الفجر دا صوت جوانا ما لهش قرار الصبر وحتى الصبر ماهوش بإدينا، دي نعمة بتيجى ساعات يا سميحة يا ست الناس يا هوايا وأهلي ومالي باحبك والله بحبك بس البيت مش قد مقامك قُلّة وكنبة وكام ملطوش ف اليوم ينفع ؟ وللا ما نيش من توبك؟ همك همى ودمك دمى وعمى وعمك ماتوا ف نفس اليوم الدنيا ف وشك ليل ونهار وحمام بيطير وف قلبك هم كبير ؟ والدنيا ف وشى سميحة وبس ف قلبى سميحة وبس ونفسي أشوفك ضحكة وفرحة و .... بس . وهمي الدمعة اللي ما نشفتش بتعيطي ليه ؟ دا قدر مقسوم ووعينا عليه وح ننكر ليه ؟ ياما ناس قبلينا عاشوه ياما ناس بعدينا ح تغرق فيه وح نعمل إيه دا نصيب يا حبيبتي تعالى نخش البيت نتدفا بعود كبريت ؟ القعدة ف وسط الناس مش ليك مش فرض عليك نشارك خلق الله الهم / السم / الدم / القدس / الجوع . خليني أعيش جواكِ . وعيشي ف قلبي وعقلي وروحي وخطي واجري وعدي نجاتك هى نجاتي بس اشرب ريقك اضمك ادوب همك اشمك وقت الصبح الضحكة الغنوة بس اسرح احسك فيا دقيقة واموت . وان غابت عني الشمس ورحتي بعيد سهران فاذا يوم حسيتي الخوف ف العتمة أنا ح ابعت قلبي غفير ونامي يا ست الكل ف حضني دا انا حضني أمان وسلام . يا سميحة العمر بيجرى ما لهش محطة ارمينى ف بحرك أعوم اتطهر أبقى الفارس أجَمَع خلق الله وارقيهم انيم جفن الهم الصاحي دى عيونك هى الفَرشَة الدافية ف طوبة . هجينى حروف جواكِ وانا اطلع غنوة تروق / تشفى الهم . أفرد جناحاتي واطير ف سماكِ ، تشوف الدنيا حروفك ضل ونور يا حبيبتي علينا الدور ودي فرصة وان ضاعت مش ح تعود بقى يعني اليوم بيعدي بفرحه وجرحه لا ح يرجع ولا ننساه ؟ وايامنا الحلوة دى ابرة ف كومة قش “ كل دا والوش ف نفس الوش عنيها ف نن عنيّا “سميحة ردى عليّا دا الحلم ف قلبي حبيس وهواكِ ونيس “ قطعتني دموعها ولقيت ف إيديها أساور قالت : البارح... جانى عريس “