أن تقفلي أوضتك عليكي وتشغلي مزيكا عالية وتتحزمي

وتتقمصي شخصية «دينا» وتديها رقص.. ولا عزاء للمكبوتين!
مزيكا.. مزيكا.. مزيكا.. والسيدة المبجلة دينا تبدع وتبدع بحيث اجتاحتني نوبة جنان أصلي.. وفجأة تجمعت طاقات الكون جميعها في أطرافي بحيث أدرت ظهري لشاشة التليفزيون وتأملتني في المرآة وهاتك يا رقص (محدش يبص بقا).. تنقض النوبة علي تقاسيمي فتنزع منها أي تيبس وترسم لها طريقا ممهدا بالانسيابية والتحرر من أي قيد أو فكرة جبانة خائفة.. أنتفض وأدور.. تخبط نسمة هوا قوية الأثر في أنفي وتتسرسب لروحي في جزء من الثانية، تنطلق صرخة مكبوتة مدوية توقظ هذا الكون النائم.آآآآآآآآه لو أقدر فعلا أرقص في الشارع من غير ما أعمل حساب لحد؟
آآآآآآآآه لو أروح وأجي وأسافر كل مكان من غير مواعيد ولا باب يتسد؟؟
آآآآآآآآآآآآه.. لو أقدر أبص للي بيعاكسني ببجاحة زي ما بيبصلي ويا سلام بقا لو أديته شلوت محترم يعملله عاهة مستديمة زي ما عملت رغدة في فيلم استاكوزا؟؟ آه لو أقدر أمسح مصطلحات وتعبيرات غبية في لغة مجتمعنا عني وعن كل بنت.. ااه لو أقدر اطلع من حصاري في خانة الميك أب والموضة والطبيخ وبحبك يا تامر وبحبك يا كاظم..
الريتم يثور وتتبعه ثورة رغبتي في الاستعباط.. المزيكا حلوة وبترقص.. ما ارقصش ليه؟؟
آآآآآآه لو اقدر أحضنك أول ما أشوفك من غير مقدمات لا سلام ولا كلام ولا عيب وما تستهبلش.. آآآآآآآه لو اعرف ارقص زي الست دينا
«الله!!.. طب والله أنا بقيت اجدع من مليون دينا.. حتي لو كذبتوني.. مرايتي بقا مش ممكن تكذبني.. أنا مصدقة أني بعرف ارقص أحسن من دينا يبقي مفيش مخلوق ممكن يقنعني بعكس كده»..
ومع احمرار وجهي ولمعة عينيا في المرآة قلت «طيب ما أنا اتجننت اهو.. أو جايز وصلت لأقصي درجات التعقل وصدقت فعلا أني بعرف ارقص أحسن من دينا مع أني من شوية كنت بحقد عليها.. ليه كمان ما اصدقش أني اقدر اعمل كل الحاجات اللي شايفة أني محرومة منها دي.. بقي معقول اصدق أني برقص أحسن من دينا وما اصدقش أني اقدر أسافر في كل مكان.. أني اقدر أدي للواد اللي بيعاكسني شلوت زي بتاع رغدة واقدر انفض لكل العبارات اللي بتنرفزني أو اسمعها وما تفرقش معايا لأني ساعتها فعلا حكون لغيتها من قاموسي.. وطبعا اقدر اثبت نفسي في الخانات اللي شايفينني بعيدة عنها واللي استحق أكون فيها بجدارتي ومجهودي وإصراري ومفيش مانع أبقي مهتمة بالميك أب والموضة والطبيخ وطبعا مش ممكن أحب تامر.. أنا حرة.. وأقدر أصدق أني اخترت أن اليوم اللي حقدر أحضنك فيه من غير ما أخاف جاي أكيد بإذن الله.. أقدر أتقري باللغة اللي أنا اختارها مش اللي حد عايز يقراني بيها».
وأنتي.. تخيلي بقا تقدري تعملي إيه؟.. وما تقلقيش كل اللي ممكن تعمليه عشان تعرفي أنتي تقدري تعملي إيه.. مش اكتر من اودة مقفولة عليكي وإضاءة علي مزاجك.. مزيكا عالية وايشارب ومراية.. واتفرجي علي القدرات اللي حتكتشفيها في نفسك وما تنسيش تفتحي الشباك أو البلكونة عشان الهوا يلطشك وتبدعي.. حقيقي إحنا كائن عبقري.. عبقري جدا.. بس يا تري كم واحدة مننا تقدر تقفش اللحظات دي وتحوشها عشان تكون وقود يشعل ثقتها في نفسها ويزيل طبقات الكبت من فوق روحها ويقوي إيمانها بقدسية وجودها؟
انتي مش محتاجة ترقصي زي دينا عشان تثبتي لنفسك إنك حره.. كفاية أوي تصدقي انك بترقصي أحسن من دينا.. تصديقك في حد ذاته كفاية!