صادرات ضعيفة التكنولوجيا

* * حسنين : إيه رأيك فى صادرات مصر إللى بلغت 23 مليار دولار السنه إللى فاتت .
= = محمدين : المهم المبلغ ده حيدخل جيوب المصريين منه كام .
* * حسنين : كله طبعا .. هيه دى موش صادرات مصريه .
= = محمدين : بص .. حساب الصادرات بيكون عن طريق الجمارك . إللى بتحسب قيمة البضايع اللى خارجه من مصر . علشان كدا بنقول عليها صادرات مصريه . لكن البضاعه دى أصلا بتاعة مين ؟ ملك مين ؟ .
* * حسنين : بضاعه خارجه من مصر .. تبقى ملك المصريين سواء كانوا قطاع خاص مصرى أو شركات حكوميه مصريه .
= = محمدين : لأ ياسيدى .. أنت عرفت قبل كدا إن حوالى 42 % من قيمة الصادرات المصريه بترول وغاز . وإن حصة الشركات الأجنبيه من قيمة صادرات البترول والغاز حوالى 40 % . يعنى النسبة دى فلوسها داخله جيوب الأجانب موش جيوب المصريين .
نفس الكلام ينطبق على باقى الصادرات .. لأن فيه شركات أجنبيه موجوده فى مصر بتصدر بضايع . وبتاخذ فلوس صادراتها سواء كانت ملابس ولا أدويه أو غيرها . وطبعا الشركات دى لما بتعمل أرباح بتبعتها لبلادها الأصليه .
* * حسنين : لكن ممكن نعرف المصريين بتحصلوا على كام من ال 23 مليار دولار .
= = محمدين : للأسف موش ممكن نعرف . لأن البيانات الى بنشرها جهاز الاحصاء او البنك المركزى أو أجهزة وزارة التجاره بتجيب الرقم الاجمالى للصادرات وبس .
* * حسنين : طيب ال 23 مليار دولار إللى هيه اجمالى الصادرات مبلغ معقول يعنى ؟
= = محمدين : بالرقم دا مصر نمره 70 بين دول العالم فى قيمة الصادرات . ورقم 9 بين الدول العربيه . يعنى قطر والعراق وليبيا وسلطنة عمان أكبر منا . عارف صادرات اسرائيل كانت كام ؟ . 48 مليار دولار يعنى ضعف صادرات مصر رغم إن هما 7 مليون شخص وإحنا 80 مليون .
* * حسنين : بس رقم 70 بين دول العالم برضه ترتيب معقول .
= = محمدين : عارف بلد اسمه سنغافوره سكانها عددهم 5 مليون صادراته 270 مليار دولار . النرويج سكانها 5 مليون وصادراتها 121 مليار . الدانمرك سكانها 5ر5 مليون صادراتها 93مليار دولار . قطر سكانها أقل من مليون ونص وصادراتها 41 مليار دولار .
* * حسنين : بس إحنا والحمد لله عندنا مدن صناعيه كتيره وإن شاء الله الحاله ها تتحسن . ياراجل خليك متفائل . متبقاش سوداوى كدا .
= = محمدين : بص .. البنك الدولى لما بينشر بيانات تصدير دول العالم . بينشرها فى 3 حداول جنب بعض . الجدول الأول فيه قيمة الصادرات الاجماليه . والجدول التانى فيه نسبة الصادرات الصناعيه من اجمالى الصادرات . والجدول التالت فيه نسبة الصادرات عالية التكنولوجيا من اجمالى الصادرات الصناعيه .
* * حسنين : معلهش وضح لى شويه .
= = محمدين : يعنى العالم معدش بيبص لرقم اجمالى الصادرات . لكن عايز يشوف قد إيه من صادرات الدوله دى كانت صادرات صناعيه . موش مجرد مواد خام . يعنى بترول خام ولا قطن خام . عارف نسبة الصادرات الصناعيه عندنا كام 19 % . فى حين النسبة دى 30 % فى أوغندا و48 % زيمبباوى و70 % فى تونس و76 % فى المغرب واسرائيل .
وبعدين العالم عمل مقاس أدق شويه . فبقى يبص على نسبة الصادرات اللى فيها تكنولوجيا عاليه من الصادرات الصناعية إللى البلد صدرتها . علشان يعرف البلد دى متقدمه فى التكنولوجيا ولا لسه بدرى عليها .
عارف نسبة مصر فى التكنولوجيا العاليه فى صادراتها الصناعيه 1 % بس . فى حين النسبة دى فى تونس 5 % وفى اسرائيل 8 % وفى المغرب 9 % .
* * حسنين : ومسألة التكنولوجيا دى تفرق فى إيه ؟
= = محمدين : تفرق إن الدول بقت بتخصص فى سلع غاليه جدا وحجمها بسيط . يعنى أحسن له يصدر لك قطعة الكترونيه حجمها أد الكف بتمن طن بطاطس . علشان كدا تلاقى الدول الأوربية بطلت تنتج ثلاجات ولا تلفزيونات أومراوح أو كاسيت والحاجات اللى زى كدا وسابتها للدول الناميه .
علشان كدا ما تسمعش كتير عن تلفزيون فرنساوى . لكن تسمع عن تلفزيون ماليزى أو كورى أو أندونيسى . لأن فرنسا وإللى زيها إتخصصوا فى انتاج حاجات زى الأجهزة الطبيه والأجهزه الكترونيه والحاجات إللى فيها تكنولوجيا عاليه .
* * حسنين : بقولك إيه ما تدخلنيش فى نسب مئويه. وكلام مجعلص زى بتوع البرامج الاقتصاديه
إللى فى التلفزيون . أنا عاوز كلام أفهمه .
= = محمدين : بلاش دى . . العالم أصبح ما يهموش رقم الصادرات بقدر ما يهمه نوعيتها . علشان كدا قسم الصادرات الى 3 أنواع : الأولولانيه المواد خام زى الحبوب والحديد الخام أو أى معدن خام . والتانيه مواد وسيطه أو قول سلع نص مصنعه زى الخشب والورق والألومنيوم والمطاط . والتالته سلع تامة الصنع .
* * حسنين : واحده واحده على .
= = محمدين : مواد خام يعنى حاجات بتصدرها زى ماهى على حالتها . زرعنا رز وصدرناه . استخرجنا بترول وصدرناه . استخرجنا نحاس وصدرناه . . أما مواد وسيطه أو نص مصنعه يعنى حاجه صنعناها لكن ما ينفش نستعملها على طول لابد ليها من تصنيع تانى . يعنى قطعنا الخشب من الغابات فبقى مادة وسيطه . بعدها ممكن نعمل منه سرير ولا كرسى ولا مطبخ ولا دولاب زى ما إحنا عازين . نفس الكلام عملنا عيدان ألومنيوم ممكن نعملها بعد كدا باب أو شباك أو حاجات تانيه .
أما السلع تامة الصنع فدى ممكن نستعملها على طول . يعنى عربيه تلفزيون ثلاجه أدويه ملابس جاهزه . بتشتريها وممكن تستعملها على طول مباشرة .
* * حسنين : وليه اللفه دى كلها ؟
= = محمدين : علشان نعرف من نوع سلع التصدير الدوله متقدمه ولا لسه بدرى عليها . لأن الدول التعبانه زى معظم دول أفريقيا غالبية صادراتها مواد خام . يزرع قطن ويصدره . يستخرج حديد ويصدره . يستخرج غاز طبيعى ويصدره . لكن شوف بلد ذى الهند تلاقيها أكبر دوله بتزرع قطن وبرضه هى نفسها أكبر دوله بتستورد قطن .
* * حسنين : ليه دى فزروه ولا إيه .
= = محمدين : لأن فيه حاجه إسمها القيمه المضافه . يعنى لو كانت البلد اللى بتزرع القطن وبتصدره قطن خام . قامت بتصنيع القطن ده غزل . أكيد تمن تصدير الغزل ها يكون أعلى . . طب لو الدوله دى بدل ما تصدر الغزل راحت عملته نسيج . أكيد ها تكب أكتر . .
ولو الدوله دى بدل ما تصدر النسيج عملته قماش ها يكون تمنه أغلى . ويبقى أحسن لو الدوله دى بدل ماتصدر القماش عملته ملابس جاهزه وبعدين تصدره . لأن المكسب ها يكون أعلى .
* * حسنين : علشان كدا الهند بتصنع قطنها ملابس . وبتسورد قطن تانى علشان تعملها ملابس .
= = محمدين : الله ينور عليك .. علشان تزود القيمه المضافه . إللى هى الفرق بين تصدير القطن الخام وبين تصديره غزل . أو بين تصديره غزل وتصديره نسيج . وطبعا كل مرحله يبقى فيها تصنيع يبقى فيها تشغيل عماله . والاقتصاد بتاع البلد يستفيد أكثر . لأنه لو معملتش كدا الدول الغربيه . هى اللى بتستفيد لما تاخد القطن الخام وترجعه للدول الناميه ملابس . وتستفيد هى بفارق السعر وتشغل ولاد بلدها .
* * حسنين : يعنى البلد إللى بتصدر مواد خام بس دى دوله تعبانه . وإللى بتصدر سلع وسيطه أحسن منها شويه. وإللى بتصدر سلع تامة الصنع هى دى الأحسن .
= = محمدين : عفارم عليك كدا فهمت الفوله . وشوف بقى الفرق بين تصدير برميل بترول خام بسبعين دولار وبين تصدير برميل بنزين ولا سولار سعره أعلى بكتير . وطبق الكلام دا على تصدير حديد خام او ألومنيوم خام أو نحاس خام أو غاز طبيعى وبين تصديره منتجات . هتلاقى فرق مكسب فلوس ومكسب تشغيل الناس .
* * حسنين : الحمد لله إن بلدنا بتصدر كل النوعيات التلاته إللى قلت عليهم : مواد خام زى البطاطس والموالح . وسلع وسيطه نص مصنعه زى غزل القطن والألومنيوم . وسلع تامه الصنع زى السجاد والملابس الجاهزه .
= = محمدين : المهم يا حلو برضه النوعيه فى كل نوع .
* * حسنين : موش فاهم !
= = محمدين : يعنى لما تلاقى فى صادرات السلع تامة الصنع المصريه : أرز مقشور . يعنى كل إللى حصل إنه تم فصل حبة الرز عن السرس . لما تلاقى بصل مجفف . أو خضر مجففه . أو منسوجات قطنيه . المفروض أن النوعيه للسلع تامة الصنع . تكون عملية التصنيع فيها كبيره مع شوية تكنولوجيا علشان نستفيد أكتر .
* * حسنين : يعنى إحنا حاطين الرز المقشور ضمن الصادرات تامة الصنع . إللى طول عمرنا فى الريف بنعمله لما بندرى الرز ؟
= = محمدين : الأهم من كدا . انه مفروض تكون نسبة السلع تامة الصنع من اجمالىالصادرات أكبر من باقى النوعيات . لكن لما تلاقى السنه إللى فاتت نسبة . المواد الخام 24 % من الاجمالى والسلع النص مصنعه 7 % . و66 % تامة الصنع .
فطبعا نسبة السلع التامة الصنع إللى فيها السجاد والكليم والملابس الجاهزه والبصل المجفف محتاجه إعادة نظر . لأن اسرائيل لما بتتكلم فى صادراتها عن سلع تامة الصنع .
بتتكلم عن تصديرها مكونات الكمبيوتر والمكونات الإلكترونيه . وأجهزة المراقبه والرادار ومعدات الإتصالات وقطع غيار السيارات ومعدات النقل . علشان كدا صادراتنا لسه ضعيفة التكنولوجيا .
mamdouhec@maktoob.com