من يدفع المشاريب؟!

من أفضل ما يفعله الرئيس الآن لقاءات الشباب.. جلسات المصارحة مهمة للغاية.. سيكون لها مردود مستقبلاً.. معناها أن الرئيس لا يمكن أن يعمل وحده.. لا يستطيع وحده أن يدفع مشاريب العهود السابقة.. الرئيس يرفع شعار «نحن نستطيع»، لا «أنا أستطيع».. اتفقت واختلفت مع «صديقتى».. وإليكم تفاصيل الحوار:
- تفتكر كل ده وقت، يضيّعه الرئيس مع الشباب؟!
- الرئيس لا يضيع الوقت.. الرئيس يستثمر الوقت لأول مرة!
- بس هناك أمور أخرى أكثر أهمية.. تحتاج هذه الساعات!
- أيوه.. هؤلاء هم من سوف يساعدون فى حلها.. ده مستقبلهم!
- أنا شايفاك متحمس أوى.. إنت مش كنت معارض قبل كده برضه؟!
- المعارضة مش مهنة.. ده رئيس انتخبناه، وبنقف معاه عشان ينجح!
- عاوز تقول إن اللقاءات دى مش حالة فراغ يعنى؟!
- يا سيدتى: دى مش حالة فراغ.. دى حالة بناء لبُكرة!
- أنت متهيأ لك إن طرد الإخوان يكفى السيسى كده وينام؟!
- طيب وهوه طرد الهكسوس شوية.. إحنا قاعدين فى أمان أهه؟!
- بس مش كفاية.. البلد لازم تتحرك قدام.. إحنا حالنا واقف!
- الراجل مقعدش غير ستة أشهر.. ده بيجرى على آخر نفس!
- والله انتوا لما تحبّوا حد.. يالله السلامة.. بُرّيه منكم!
- خدى بالك عندك أكتر من حاجة تكفيه.. بجد!
- إييه هىّ بقى إن شاء الله؟!
- قناة السويس حاجة، والشريط الحدودى حاجة، وأسعار الطاقة حاجة!
- أيوه بس.. بس يعنى لازم السوق تشتغل، بدل ما نشحت!
- سوق إيه؟.. بطلى افتراء.. إنتوا انتخبتوا شجيع السيما؟!
- طب بذمتك ينفع كل شوية، يقعد يقول مش قادر؟!
- مش هىّ دى الحقيقة.. مش هى دى ظروفنا!
- مش لازم نقولها.. ممكن تعمل إحباط!
- الرئيس شايف إن المصلحة إنها تتقال، ويواجه بيها الشعب!
- وبعدين إيه حكاية المشاريب دى؟.. المؤسسة العسكرية كانت مسؤولة!
- مسؤولة فى إيه؟.. يمكن زمان كانت مسؤولة.. دلوقتى لأ!
- أهو حكم عسكرى واحد.. مش لسه برضه عسكرى؟!
- حرام عليكى يا مفترية؟.. ارحمى علشان ربنا يرحمك!
- مفترية ليه.. هوه السيسى ده منين يعنى؟!
- طب كان فيه حد ينفع، يا بتاعة البرادعى أنت؟!
- ليه لأ؟.. لو ساعدوه ينفع ونص!
- كان زمانك فى سوق النخاسة.. إوعى «داااعش»!
اشترك الآن لتصلك أهم الأخبار لحظة بلحظة