«المصري اليوم» داخل منزل أحد ضحايا الرصاص الليبي

ترغرغت عيناها بالدموع أثناء محاولتها وصف حالها وإحساسها حين أخبروها بأن حفيدها محمد اختطفه بعض العناصر المتمردة فى ليبيا أثناء عودته إلى مصر بعدما سلم البضاعة التى كان يحملها بسيارته، وضربوه بالرصاص فى ساقه اليمنى وسرقوا نقوده وهاتفه المحمول، قائلة: «اتنزع قلبى من جوه من ساعة ما سمعت الخبر لحد دلوقت»، وبينما تملأ عيناها الدموع تبتسم وتقول: محمد ده زينة الشباب.. زينة الشباب بقى عاجز يا ناس».
بدت والدة محمد أكثر تماسكا، فبرغم حزنها على إصابة ابنها، فهى لا تعرف إن كانت إصابته هذه تسببت له فى إعاقة دائمة أم سيعود إلى طبيعته مرة أخرى، إلا أنها فى كل الأحوال تبدو سعيدة بعودته إلى أحضانها مرة أخرى.
محمد.. بطلا كان أم ضحية.. هو شاب لم يكمل ربع قرن من العمر وأصيب برصاص فى الساق قد يسبب إعاقة دائمة له ويصبح عاجزا عن المشى، وبينما يجلس على فراش المرض فى منزله بمركز دكرنس بمحافظة الدقهلية متحملا ألما نفسيا وجسديا، يروى ما تعرض له فى السطور التالية قائلا: «أنا بشتغل على سيارة نقل، يملكها مجموعة تجار بتحمل منظفات ومواد غذائية من القاهرة إلى مدينة طرابلس الليبية، يوم السبت 15 مارس 2014 سلمت البضاعة فى طرابلس وراجع على مصر ماسك يمين الطريق، لاحظت إن من أجدابيا لقبل سرت متعلق أعلام سودا لتنظيم القاعدة ولما وصلت سرت لقيت 4 رجالة واقفين وماسكين 4 رشاشات آلية وعمالين يضربوا الرصاص على العربية وعلى العجل الأمامى علشان العربية تقف، وفعلا وقفت العربية ونزلت قلت لهم: خدوا كل حاجة وسيبونى.. أخدوا عهدة البضاعة وكانت 120 دينار والموبايل وقالوا لى إحنا هنموتك وشالونى وحطونى فى شنطة العربية ومشيوا بيا عشرات الأمتار جوا الجبل وبعدها نزلونى من شنطة العربية وضربوا على رجلى رصاص.. الليبيين بيكرهوا المصريين جدا لأنهم بيعدوا أى حد من أى جنسية تانية، حتى مرة نزلوا راجل من العربية وعنفوه كده ولما عرفوا إنه أردنى قعدوا يعتذروا له كتير جدا وقالوا له معلش كنا فاكرينك مصرى..
الإخوان هما إللى مسيطرين على البلد والسواق إللى معدى بيوقفوه يسألوه إنت مرسى ولاّ سيسى، لو قال مرسى يعدوه لو قال سيسى يتهان ويتضرب وممكن يموتوه، ثم عاد محمد لاستكمال قصته قائلا: «المهم فضلت أزحف ورجلى تنزف لحد ما وصلت على الطريق، فضلت مرمى على الأرض بنزف حوالى ساعة ونص لحد ما شافنى راجل ليبى وأخذنى لمستشفى سرت والدكاترة هناك قالوا لى إن الرصاصة تسببت فى إحداث كسر فى العضم، وركبوا لى جهاز كده وقالوا لى تيجى بعد 20 يوم نشوف هنعمل العملية والا هنعمل إيه، لكن بعد 3 أيام من اللى حصل لى ده رجعت مصر وطبعا على حسابى الخاص بسيارة إسعاف من سرت إلى السلوم ب750 دينار وبسيارة إسعاف أخرى من السلوم إلى البيت ب1000 جنيه».
وبلهجة سلمية قال:« لم أشتك لأى أحد، فالشكوى لغير الله مذلة.. لكن اتعمل محضر بأن وصل مصاب بطلق نارى فى دايرة جمارك السلوم واتقيد المحضر ضد مجهول». وضحك قائلا: «عمرى ما هروح هناك تانى ولو هموت من الجوع.. اللى عايز يموت يروح هناك.. الحقيقة أنا كنت بقبض فى السفرية اللى بتقعد 20 يوم 2500 مش بيتبقى منهم غير 1000 جنيه لأن ال1500 بيتصرفوا فى ليبيا خلال ال20 يوم إللى بقعدهم هناك.. فالحكاية مش مستاهلة كل البهدلة دى».