لسة محتارة وهتفضلي محتارة يا مصر !!!

ها خلصت الثورة ولا لسة ؟؟ يعني هننزل الكلية عادي بقي ولا هنأخد أسبوع كمان علي ذمة الثورة طب ما يدونا إعدام بقي ويلغوا الترم ويريحونا بس لو لغوه كدا هنضيع ولا العيال بتوع ثانوية عامة كدا هيعملوا أية يا لهوييييس ..... يعني هو كان لازم الواد بتاع خالد سعيد يعمل ثورة دلوقتي ما كان أستني في الصيف !!! .....
أية دة أيفينت تاني جمعة أيية ؟؟ يالهوي عاوزين يشيلوا شفيق ...
ألحق يا ظاظا بيقولك في جمعة هيشيلوا فيها شفيق . أة ياعم أنت مشفتش كلامه مع الأسواني دة بيقولك قاتلت وأتقتلت وبعدين دة شكلوا خربان وفي ناس بتقول أن مبارك هو اللي مشغله . طب وأنت أية نازل الجمعة؟؟ لا يا عم الموضوع مش مستاهل هو طالما قلع البلوفر يبقي مش هيقعد للجمعة وهتشوف ....
طب واد يا زولا أخبارك أية ؟؟ بيقولك عاوزين يشيلوا شفيق . يا عم دية ناس خربانة مفروض يستنوا علي الحكومة لغاية ما تثبت وجودها وبعدين البلد كدا هتخرب وهتخسر ودة بصراحة أسمه هبل ... يعني مش هتنزل؟؟ . لا يا عم أنزل أية .....
كوكو باشا كيفك ؟؟ أنا تمام أوي وعال العال بيقولك شفيق هيتشال ياض .. شفيق مين ؟؟ رئيس الوزراء يا عم بتاع البلوفر . أة سمعت بس مش عارف . طب روح كمل اللي كنت بتعمله
جوجو هو اللي هيحلها . واد يا جوجو هيشيلوا شفيق يوم الجمعة . بصراحة أة الحق لازم يتشال هو وبتاع الداخلية طب أشطاااا يعني نازل المظاهرات ؟؟ لا يا عم مظاهرات أية وأنا بتاع كدا بردو وبعدين دية يوم الجمعة وأنت عارفني يا دوب بقوم علي الصلاة والدنيا بتبقي بايظة !!! ....
الله يخرب بيتكو لغبطوني أكتر ما أنا متلخبط .. طب أنا هنزل عند فيكم بقي !!!
بس هنزل ليه هو فعلا مفروض شفيق يمشي ولا نديله فرصة ؟؟
يوووووه هو أنا هفضل حيران كدا علي طول طب لية كل واحد فينا شايف أن هو بس اللي صح والباقي غلط هو أحنا مصريين ولا أحنا فين ولا هي أزاي ....
حبيب قلبي دية بيدج ضد عمرو موسي . حلاوتك البرادعي طلع عميل . عاوزين علاء مبارك !!! . محمد محي الدين هندسة إسكندرية .. عم دهب بتاع بطوط .. علاء الدين المصباح السحري ... أوبااا دية جديدة هيبعتوا يجيبوا رئيس من برا إحتراف بقي !!!!!
بعد معاناة كبيرة مع الحيرة قررت أعمل كوباية شاي وأطلع البلكونة ولسة بأخد أول بوء من الكوباية لقيت العنوان دة في دماغي ....
" الثورة القادمة ومستقبل مصر " أية دة دة المقال اللي كتبته أيام إنتخابات مجلس الشعب الأخيرة وقلت هتحصل ثورة وأديها حصلت أنزل تحت كدا ... أية دة " ومازلنا مغيبون " تصدق صح أدي حل اللغز أهو . الحيرة دية شكلها بسبب أثار 30 سنة بعد عن السياسة . الحكومة كانت بتحطلنا ترمادول بس الحمد لله الوضع أتحسن وبطلنا تيمو أومال أية المشكلة ؟؟؟؟
المشكلة هاجس خوف جوايا أننا نفضل مغيبون فرغم أنهيار الأمن وترابط الأحزاب " الظاهري " لسة في ناس بتضرب ترمادول حتي بعد إزالة أثار 30 سنة من النوم لسة مش قادرين يفكروا صح والأسوء أن في ناس كتير برا اللعبة كل شأنهم مصالحهم الشخصية الناس دول ممكن يكونوا بينزلوا بينا يدهنوا وينظفوا الشوارع بطاقة إيجابية زيادة نتيجة للجو وفي الأخر هيرجعوا للترمادول طب ولية بينا ؟؟؟ الناس دول ممكن يكونوا أحنا !!!! .....
للأسف مصر أنقسمت عدة أنقسامات لا حصر لها ناس عايزة ترد الجميل للرئيس المخلوع وناس بتلعن أبوه وناس هتموت والشرطة تنزل وناس مستنياهم بالسيوف وناس في وسط كل دة بيسرقوا في بعض وبيقتلوا بعض...
كل يوم الإنقسامات بتزيد وكل إنقسام شايف أن هو الصح المطلق ومحدش عارف بكرة رايح فين
التاريخ بيتكتب ميصحش أننا نكون لسة بنفكر غلط واللي مبيفكرش خالص لازم نبتدي نفكر أحنا فين في مصر وهنعمل أية عشانها ومنخليش الوقت يسرقنا في حيرتنا ودماغنا العالية ....
سواء كنت مؤيد أو معارض مش دية المشكلة الأهم تكون فكرت صح بوجهة نظرك وهتعمل اللي مقتنع بيه والأهم أنك تضرب تعظيم سلام لأخوك اللي فكر ضد تفكيرك ...
في النهاية حابب أقول حاجتين .... بدعي ربنا أن يقتص من حسني مبارك في الدنيا قبل الأخرة لأن بأي صورة من الصور هو مسئول عن تغييب العقول والدمار اللي أحنا عايشين فيه والحاجة التانية نداء بوجهه ليه ولمصر كلها اللي هيحدد مستقبل مصر الجاي أكبر فئة فكرت صح وأشتغلت صح في حب مصر دة لأن في النهاية ربنا عاوز يحفظ مصر أمنه زي ما قال في كتابه العزيز فأحرص إنك تكون منهم .....وأتمني أن ربنا يهدي الشعب المصري للخير ويبعده عن الحيرة ويكذب عنوان المقال .....
ولتعيشي يا مصر أمنة مستقرة أبد الدهر ....
بقلم : محمد مندور
5/3/2011