كومون سينس

■ كومون سينس.. أى التفكير السليم أو الفطرة السليمة.. وبالبلدى.. المفهومية.
■ شىء يزداد شعورى يوما بعد الآخر أننا صرنا نفتقده.. يقابل المرء منا أشخاصا يصيبونه بحالة من الهطل أمام ما يأتون به من أفعال أو تصرفات لم نعتدها من قبل.. بل إن البعض منا أصبح يقضى يومه متنقلا من خضة لخضة أخرى، من تصرفات غريبة من الناس.. والخضة جاية من إننا ماكناش بنتصرف بالشكل ده من قبل.. ما هو إحنا نفس الشعب اللى عايش فى نفس البلد بقالنا سنين.. وكنا عارفين ردود أفعالنا تجاه الأشياء وبنفكر إزاى ولينا صفات كانت تميزنا عن باقى شعوب الأرض.. يبقى إيه اللى حصل؟.. يمكن حد بدلنا وإحنا نايمين؟
■ إيه اللى غيرنا؟.. ظروف ولا أشخاص ولا أنظمة؟.. إيه اللى خلانا نفقد القدرة على التفكير المنطقى السليم.. إيه اللى قلعنا توب المفهومية ولبسنا توب الغبا؟
■ مين اللى وصلنا لأن نكون بلداً فقيراً يعانى من الكثافة السكانية العاطلة والجهل والتخلف والاحتياج، ونحن نتمتع بكل المزايا والهبات التى تجعلنا أغنى بلد فى العالم من حيث السياحة مثلا.. مفيش بلد فى العالم يتمتع بكل هذه الميزات السياحية.. كنت منذ يومين فى قاهرة المعز.. بالتحديد فى بيت السحيمى.. وكان هناك بعض السواح المذبهلين من جمال وروعة المكان.. خصوصا بعد ترميمه وتوزيع الإضاءة فيه ليلا.. فعلا مكان ساحر ورائع.. وأنا واقفة أبصلهم وأراقب حجم إذبهلالهم وأقول لنفسى.. أمال لو شافوا الأقصر وأسوان وأبوسمبل حايعملوا إيه؟!.. أمال لو راحوا شواطئ سينا والبحر الأحمر حايجرالهم إيه؟!.. أمال لو اتمشوا عالساحل الشمالى بطوله.. أمال لو طلعوا سانت كاترين حايتعبطوا إزاى؟!.. لا حول ولا قوة إلا بالله..
■ لما إحنا بنشوفهم مذبهلين كده.. إزاى ما بنتحولش كلنا لرعاة لهذه الثروة اللانهائية عشان على الأقل نشتغل ونفتح بيوتنا.. إزاى ما بننظرش للبلاد اللى حوالينا اللى ماحيلتهاش واحد على مليون من ثروتنا ونشوف بيخدموا بلدهم وسياحتها إزاى.. إزاى عندنا ناس بتشتغل فعلا فى السياحة لكن ما بيتطوروش مللى واحد عن كونهم مقلباتية ومهلباتية وبيقدموا خدمة زى الهباب؟!
■ برنامج إنجليزى أنتجه ثلاثة من الشبان قائم على فكرة أن بطلهم بيقوم برحلة يزور فيها عجائب الدنيا السبع وهما يصحبوه بالكاميرا عشان يسجلوا انفعالاته وسط هذه المعجزات اللى صنعها الإنسان.. ولكن كمان عشان يرصدوا العجائب دى موجودة فى أنهى مجتمعات والناس حاسة بقيمتها ولّا لأ.. زار منطقة الأهرامات وطبعا الكاميرا رصدت بلاوى.. وبعدين نزل عالحسين يتجول بغرض الوصول إلى قهوة تاريخية مشهورة يقعد يريح فيها ويبل ريقه.. البشر اللى اتلموا عليه أكتر من الهاموش.. والكاميرا بتصور.. عشر أشخاص فى اللحظة الواحدة بينتشوا فيه ويتخاطفوه ويعرضوا عليه بضاعتهم كلهم فى نفس واحد.. تى كوفى كازوزة أورانج ليمون خروب كركديه عناب نسكافيه.. أول تن باوند.. طب تشترى نضارة شمس؟؟.. تشترى كلب؟؟.. منشة؟؟.. طاقية؟؟.. جلابية؟؟.. كالونيا؟؟.. طب ماما تنفع؟؟.. أى حاجة.. الراجل بقى بينشهم زى الدبان من على وشه.. رغم أنهم كلهم واقفين فى مربع متر فى متر.. ولما راح يقعد عالقهوة نطت قطة بلدى واستقرت على حجره فى هدوء ودعة والعاملين فى القهوة عادى جدا.. الظاهر بيصرفوها مع المشاريب للسواح الكفرة.. إيه اللى وصلنا لكده؟؟.. راح فين الكومون سينس بتاعنا.. فين المفهومية يعنى والحساسة؟؟.. مع إن ده أكل عيشهم..
■ إيه اللى يخللى واحدة تتصل ببرنامج تليفزيونى دينى.. وتقول فى صوت مقروح ومنهار مختلط بالدموع والأسى والحسرة والشحتفة: أنا عايزة أنبهكم لنبات خطير بيموت الناس ويخليهم يبقوا مدمنين.. يسألها المذيع اللى اشرأب عنقه تحفزا للبلاغ الخطير: نبات إيه يا فندم؟.. تقوله وهى تتشحتف وتنهنه: مش قادرة أقول اسمه.. بس قالوا فى إذاعة الشرق الأوسط إنه بيموت ويضر البشر.. ولازم تعملوا عليه أبحاث.. إذا ما طلعش بيموت أنا اللى اتسئل عن كده.. قالها وهو فى شدة الشوق لتحقيق سبق تليفزيونى بقى.. إمتى قالوا الكلام ده؟.. قالتله 68.. قالها هو إيه ده اللى 68؟!.. قالتله سنة 68 أول ما طلع.. مين اللى طلع؟؟ النبات كان طالع جديد.. يعنى من 42 سنة.. قالها والإثارة تكاد تطيح بيه لازم تقولى اسمه.
وتلاقيه فى عقل باله كان بيقول نبات إيه ياخويا اللى طلع فجأة ده سنة 68؟؟.. ودى إيه اللى خلاها صارة ف قلبها وساكتة 42 سنة؟؟.. وليه جاية تقول النهاردة؟؟.. قالتله بيعملوا منه سمنة وزيت وداخل فى كل المنتجات.. ثم اتشحتفت موت واختلجت نبرات صوتها مما أوحى أنها خلاص بتطلع فى الروح.. وقالتله خايفة أقول اسمه الناس تزعل منى.. وتحت إصرار المذيع.. باحت بالسر بقى.. نبات كافر مش بيعبد الخالق.. اسمه عباد الشمس!!!!!!.. الراجل الحقيقة بلّم للحظات قبل ما يستجمع شتات عقله ويواصل الحلقة متجاوزا عن وصلة الهطل اللى حصلت من شوية دى.. لكن أنا فضلت مبلمة.. إيه اللى وصلنا لكده؟!!
■ إيه اللى يخللى واحد يطلق على نفسه لقب الدكتور الشيخ وهو حاصل على بكالوريوس تجارة شعبة إدارة أعمال.. ويقعد يعمل دراسات أعلى ما فيها تمهيدى ماجستير من كلية دراسات إسلامية.. ويلقى دروس على الناس.. والمصيبة بقى إن له مريدين وناس بتقعد وتسمعله.. خصوصا إنه يفتكس الكثير من الكوميديا فى أسلوب حديثه من أجل تطرية القعدة واللطافة والخفافة.. لكن ما يقول هو العجيب فعلا.. مثلا يعنى.. يقولك لما تتاوب حط إيدك على بقك.. ما تفندقش بقك عالباهلى قوى كده.. ليه بقى؟؟..
فالجماهير المجتمعة بغرض الاستزادة من علمه تقوله ليه؟؟.. يقولهم عشان الشيطان بيقوم متبول جوه بقك.. هو بيبقى معدى كده أول ما يلاقيك فاتح بقك عالباهلى يقوم داخل مديها طراوة وخارج.. تقوم الناس تقول بمنتهى الإعجاب بالمعلومة الصاعقة.. ياااااااااسلام.. فهو يأنتخ لورا قوى كده مستجيبا لهمهمات الإعجاب ويقول أمال.. انتوا فاكرين إيه؟؟.. بدليل إن اللى بيتاوب وهو مفندق بقه لما بيقفله بيعمل تعبير بوشه كده ينم عن أنه بيستطعم حاجة مززة.. ده دليل دامغ على إن الشيطان لسه عامل بيبى فى بقه!!!!!!!!!!!
■ على رأى بنتى لما سمعت الكلام ده اذبهلت هى روخرة شوية كده وقالت بعد تأمل هادئ للموقف.. أول مرة أعرف إن الشيطان عنده تبول لا إرادى.. وعجبى..
zahqanin@gmail.com