كلمات ليست كالكلمات

الناس بتموت.. ما كفاية سكوت يا خلق الله.. دى كمان ح تفوت.. ولا احنا الموت اتعودناه.. دى هدية عيد.. طول ما احنا عبيد.. يا ما ح ينداس.. ويقولوا إرهاب.. يقتلوا فى شباب.. وحجر برصاص.. هللتوا لجزمة.. مافيش لازمة.. مش هاتكلم.. طاب شوفتوا.. الجثث اللى ف غزة.. حد اتألم.. أو طلع صوت.. الناس بتموت.. أسفين يا شهيد.. مش جاى جديد.. تارك هايموت.. واعذرنا ما فيش.. لا شعوب ولا جيش.. كلنا فى تابوت.. نايمين فى سلام.. للقتلى سلام.. مجزرة وتفوت!
عادل فؤاد
مش بس بالشجب ولا حتى بالإدانة.. دى الوحدة فى حد ذاتها بتساوى ألف دانة.. الحل تكون قلوبنا دايما متوحدة.. مش كل دولة تبقى بتعيش على حدة.. متقولش عمل إيه غيرى علشان أعمل أنا.. اعمل قد استطاعتك وأهو كله لربنا.. مصر الأخت الكبيرة وأهى واقفة من زمان.. بتساعد أهل غزة وتحارب الاستيطان.. وبدل ما تيجوا النهارده وعلى دورنا تزايدوا.. الأحسن مدوا إيدكوا فى إيدينا علشان تساعدوا.
معتز أحمد نور                                                                          بوالينو - محرم بك - الإسكندرية
أبتدى منين الكتابة؟.. أصلى حاسس بالخيانة خايف أحكى خايف أشكى.. لتزيد عندى الكأبة.. قلبى مات من المناظر.. كام شهيد وسط المجازر؟.. خفت أعد لأتوه وأشت.. وعقلى مش ناقص إجازة.. دم ده ولا كاكولا؟.. عربى ده ولا أنا أعمى؟.. ليه يموت كده بسهولة.. نفسى ف سجارة وشمة.. أنسى بيها كل حاجة.. أنسى بيها إنى عربى.. واترسم واحد خواجة.. وأبقى عايش ف اللذاذة.. أبتدى منين الحكاية.. أصلى خايف من القضايا.. خايف ألبس تهمة حلوة.. وأبتدى عمرى بنهاية.. هتكتم وهسكت أحسن.. ليا رب هوا أحسن.. والسكوت مش ضعف منى. السكوت أوقات كتير بيكون له عازه!
أحمد عبدالعزيز                                                                         الإسكندرية - السيوف ترام
عذراً غزة.. عذراً سيدتى.. نحن أمة أدمنا قتل الأنبياء.. والشجب والتنديد والسير إلى الوراء.. ندفن رؤوسنا فى الرمال كالنعامات.. نتلون بألف لون كالحرباء.. هربنا سيدتى كالجبناء.. تركناك تحت الحصار.. تحت النار.. تتسولين قوتك.. ألبان أطفالك.. دواءك من اللؤماء.. والخنازير يغتصبونك صبح مساء.. هربنا سيدتى وتركناك ترفعين يد الشهادة.. تركناك تموتين وحدك فى العراء.. عذراً سيدتى نحن أمة من البلهاء.. أشباه رجال كالزبد فى الماء.. فلا تنتظرى منا سوى الصراخ واللطم على الخدود كالنساء!
عبدالناصر البارودى                                                             رئيس مجلس إدارة جمعية «أمل دنقل» بقفط
تشكى وتحكى لمين غزة.. احتلال وحصار وحالة حضيض.. صقر الخليج أصبح وزة.. لعدوها فى دهب بيبيض.. لاشاف كرامة ولا عزة.. وساعة الحق جناحه مهيض.
محمود علام