تخاريف ....!!! عبد العزيز محمود

-سمعت يا جدو آخر خبر؟؟..بيقولوا الملكية خلاص ح ترجع تاني!!
هكذا قال الواد حمادة العفريت لجده الجالس على كرسيه الهزاز في ملكوت تاني فخرج الجد من تهويمته:
-معقولة يا وااااااد الملكية ح ترجع بعد ما لغوها وأعلنوا الجمهورية؟؟
-أهو ده الكلام اللي داير في البلد يا جدو!!! وبيقولوا النشيد الجمهوري ح يتغير ويبقا ملكي ...والعلم كمان ممكن يتغير .. وح تبقا عندنا ديمقراطية بجد بدال الملوخية اللي احنا فيها!! والسفير البريطاني ح يبقا أهم من السفير الامريكي!!!
-يا حلاوة يا ولاد!! يعني جلالة الملك ح يرجع من المنفى بعد السنين دي كلها!! أحمدك يا رب!!! فعلا كل ليل وله آخر!! واللي يصبر ينول.... واصبر على جار السو لايرحل لاتجيله مصيبة تاخده!!! يا سلام عليك يا مولانا الملك وانت راجع السرايا وكايد الأعادي!!!
فقال الواد حمادة باندهاش شديد:
-ملك مين ده اللي ح يرجع يا جدو؟ هوه انت رجعت تخرف تاني والا ايه؟؟!!!
-يا ابني مش بتقول الملكية ح ترجع !! يبقا أكيد جلالة الملك فاروق راجع من ايطاليا ع اليخت بتاعه!! واحنا كلنا ح نخرج نستقبله في قصر راس التين زي ما ودعناه من 58 سنة بالتمام والكمال!!!
-فاروق مين وبتاع مين؟؟؟ ما الراجل مات من زمان وشبع موت!! والا انت مش عايش في الدنيا ياجدو؟؟!!
-آه والله صحيح ده جلالته مات مسموم في المنفي الله يرحمه ويحسن اليه!! وبعدين جابوه ودفنوه هنا عشان محدش في بلاد بره يشرح الجثة!!! معلهش يا حمادة سامحني ما انت عارف الزهايمر مبهدلني ومخلليني بأخترف!!!
-سلامتك من الزهايمر يا جدو !!! بس أنا فعلا ما جبتش سيرة فاروق نهائي!!
-خلاص... يبقا أكيد اللي راجع سمو الامير أحمد فؤاد!! ايوه مظبوط ما الواد لازم يرجع من سويسرا بعد السنين دي كلها عشان يستلم عرش أبوه ويستلم الميراث والمخصصات الملكية!!! أحمدك يا رب انك مديت في عمري لغاية ما شفت الواد بيقعد على عرش ابوه!!!!
-لاااااااا دي المسائل عندك ضربت كلها!! يا جدو بأقولك الملكية اللي راجعة!! مش عيلة فاروق!!
-وهيه الملكية يا حبيبي تنفع ترجع من غير حد من ريحة جلالة الملك الله يرحمه؟؟!
-تاني يا جدو عايزنا نرجع لعصر فاروق؟! عايزنا نرجع لعصر الاقطاع والرأسمالية والاحتكار وسيطرة رجال المال على الحكم؟! أمال الثورة قامت ليه؟؟!! والا يعني عشان أنت بتحب الراجل عايزه يطلع من تربته ويحكمنا!!!
-خلاص يا حمادة أنا ح أقفل بقي وأنسد!! بس ريحني وقول لي مين هوه الملك الجديد؟؟!!
-لغاية دلوقتي يا جدو محدش عارف حاجة!! بس الناس بتقول الملكية راجعة وح تبقا النوبة دي مصرية صميمة مافيهاش ولا عرق ألباني ولا تركي ولا مملوكي ولا هندي!!!!!
-الله اكبر!!! اللهم صلي ع النبي!! والله عشت يا مخيمر وربنا مد في أجلك لغاية ما شفت الملكية وهيه بترجع!! أنا لازم أقوم أصلي ركعتين شكر لله!!! لأ ركعتين مش كفاية... انا لازم أصلي عشرين ركعة!!!
-للدرجة دي يا جدو بتحب الملكية!!! ؟؟؟
-وهو فيه أحلى من الملكية يا حمادة!! يا سلام يا ولاد لما نرجع لعصر النص في المية!! وعصر الباشوات والأمرا والأعيان والهوانم والمليارديرات اللي بيشكلوا الوزارات ويقيلوا الوزرا !!
-وهيه دي حاجة كويسة برضه يا جدو؟؟ يعني عايزنا نرجع تاني لعصر الأسياد والعبيد؟!!!
-فشر يا حمادة!! احنا طول عمرنا يا ابني كنا من الأسياد!! أو ع الاقل من الشماشرجية اللي حوالين الأسياد! بس الثورة هيه اللى أممتنا وأخدت مننا الأطيان والعمارات والسرايات وسابتنا ع الحديدة!! امال الزهايمر اللي جاني ده جاني من ايه؟!
وفجأة انتفض الجد من كرسيه الهزاز واتجه الى دولابه القديم وأخرج بدلة سوداء كالحة واكلاها العتة :
-ايه العفريتة السودا أم ديل دي يا جدو؟؟ انت كنت شغال زمان بلياتشو؟؟!!
-ده الردنجوت القديم بتاعي اللي ياما شاف أيام وليالي!! انا لازم أوديه الرفا يترفي، وبعدين أوديه اللاندري يتغسل ويتكوي عشان أحضر بيه حفلة تنصيب جلالة الملك، ألا قلت لي يا حمادة هوه جلالته اسمه ايه؟! معلهش أصل انا ذاكرتي اليومين دول في الطراوة!!
-يا جدو ما قلت لك ما حدش عارف حاجة بالظبط!! بس الناس بتقول الملكية راجعة راجعة!!! والعلم ح يتغير والنشيد الجمهوري ح يبقا ملكي!!
-طيب وحياتك يا ابني تطلع لي من الرف اللي فوق ..الطربوش الأحمر بتاعي والعصاية الأبنوس!! أصل أنا ركبي واجعاني ومفاصلي بتنقح عليا ومش ح أقدر أطلع ع الكرسي!!!!
-والروبابيكيا دي لازمتها ايه بس يا جدو!! هوه انت رايح حفلة تنكرية!!؟؟
-معلهش يا ابني ما انت لسه صغير ومش فاهم! ما هي الملكية لما ترجع أكيد ح يعزمونا احنا رجالة الملك فاروق عشان نبارك الليلة احنا والسفير البريطاني!! ومش ممكن ح نحضر مناسبة زي دي من غير الردنجوت والطربوش والعصاية الأبنوس!! شُفت أديك كنت ح تنسيني أهم حاجة ...الوردة البيضا البلاستيك بتاعتي!!