في حفل السبوع كان المعلم ابو المجد سعيدا بابنه "عقب العنقود" رغم ما اثارته ولادة الاخير من جدل ... -انا فرحتى بالواد ده غير فرحتي بكل اخواته!!! شوفتوا ازاي حلو وأمور وعامل زي الملايكة!!! عليا النعمة الخالق الناطق امه!! -لااااا يا معلم!! الواد فيه شبه كبير أوي من عمته !! وهنا قالت الخالة ام لالو... -لا امه ولا عمته !! الواد طالع للمرحومة جدته الله يرحمها!!! فنظر المعلم الى الطفل وقال.... -اي والله مظبوط!!!الواد عينيه الخالق الناطق عينين المرحومة امي الله يرحمها!!! لكن الكلام لم يعجب العمة زنوبة ... -انشا الله انطس في نظرى !!! الواد مالوش علاقة بجدته !!!الواد نسخة من عمه!!! فصاح الحاضرون... -معقولة الكلام ده يا عمة؟؟؟ يعني الواد طالع لعمه وما طالعش لابوه ولا أمه؟! -زي ما باقول لكم كده!!! الواد نسخة من عمه حسونة!!! ولو مش مصدقيني بصوا لودانه!!! فتوتر المعلم ... -ايه الكلام البايخ ده اللي يحرق الدم ويسم البدن!؟؟ عايزة تقولي ايه يا زنوبة يا اختى ؟؟ يعني الواد ابن حسونة مش ابني!! فصاح الجميع ... -يا داهية دقي!! معقولة يعني الواد مش ابن المعلم ؟! وهنا صاحت الام من الغرفة المجاورة .. -يا عالم حرام عليكم!!! انتو ح تلزقوا لي تهمة !! الواد ابن ابو المجد وحتة منه!! حتى شوفوا مناخيره !! فنظر الحاضرون طويلا الى الطفل الملفوف في اللفة... -بصراحة كده يا ست الستات الموضوع فعلا يحير!!! الواد فيه شوية من ابوه وشوية من عمه!!! ففقد المعلم صوابه ... -عليا الحرام اللي ح يقول كلمة تانية على الواد عقب العنقود ح اشرحه!!! هوه ايه الموضوع ؟ انتو جايين تباركولي والا جايين تهزأوني؟! فتدخل الخال سعفان محاولا التهدئة .... -يا معلم وحد الله وصلي ع النبي !!! انت ناسي انك وحسونة فولة واتقسمت نصين!!! يا راجل ده احنا طول عمرنا بنتلخبط بينكم ومش عارفين مين الكبير ومين الصغير؟!! -حلوة اوي الحكاية دي!!ما انتو عارفين كويس ان حسونة طالع لعمه الحنش الله يرحمه!!! وانا شبه خالي ابو الليل ربنا يديله الصحة ويطول لنا في عمره!!! وهنا دخلت العمة نحمده على الخط .. -يا ابو المجد سيبك من اللت والعجن ده اللي ما يجيبش همه!! الواد فعلا شبه عمه!!! فصرخ المعلم باعلى صوته ... -عليا الطلاق بالتلاتة الواد ده ابني ومن لحمي ودمي!!! واللي ح يقول عليه ربع كلمة ح ادبحه واتاويه واشرب من دمه !! وهنا زغردت الزوجة من الغرفة المجاورة ... ايوه كده يا ابو المجد اديهم على دماغهم!!! الواد يا اخويا ابنك ومن صلبك !! الله يخرب بيت اللي عايزين يخربوا بيتي !! وفجأة وصل المعلم حسونة فصاح ابن العم شعبان ... احضرونا يا عالم!!! اهو حسونة على يميني وابو المجد على شمالي والواد عقب العنقود في النص!!!! بصوا كويس كده وحققوا فيهم همه التلاتة وقولوا لنا بما يرضي الله الواد شبه مين بالظبط؟!! فقال غالبية الحاضرين ... -بصراحة كده الواد مالوش علاقة با بو المجد ولا بحسونة !! -امال الواد شبه مين يا غجر!! الواد ابني ومن صلبي واللي ح يقول عليه غير كده ح اقطع خبره!! -يا ابو المجد اهدا وروق وماتبقاش عصبي!!! الواد فعلا الخالق الناطق عزوز ابن خالك ربنا يحميه لشبابه!! فصرخ المعلم ابو المجد ... -اللهم طولك يا روح!!! برضه ح ترجعوا تغلطوا فيا وفي الواد وأمه!!! تلاتة بالله العظيم الواد ابن حلال مصفي !!! وانا ابوه!! والولية اللي راقدة جوه ع السرير تبقا أمه!!! -يا ابو المجد اعقل وبلاش مكابرة الواد ده لا هو ابنك ولا من صلبك!!! حتى بص كويس لوشه ح تلاقيه صورة بالكربون من عزوز الله يحرقه بجاز مطرح ما راح !! ففقد المعلم صوابه تماما .. -عليا الحرام من بيتي الواد عقب العنقود ده ابني وحتة من كبدي!! ولو مش مصدقين كلامي بصوا كويس لحواجبه!!!