عزبتي...!! عبد العزيز محمود

لم نكن نتوقع ان يصدر القرار هكذا سريعا وآخر حلاوة بعودة الحق الى اصحابه حتى اتصل بنا عمو السنتريسي المحامي..
-ألف مبروك يا ولاد اخيرا ظهر الحق!!! والعزبة رجعت لاصحابها!!
-معقولة يا عمو؟؟؟ ده احنا ملطوطين حكم نهائي بمصادرة العزبة باللي فيها!!! والموضوع ده مالوش حل ولا استئناف ولا دياولو!!!
-لااااااااااااااااااده كان زمان وجبر!!! المعجباني بيه الله يعمر بيته خلاص طلع لنا قرار بعد الرجوع للمستشارين القانونيين الملاكي بتوعه!!! اننا ممكن نشترى العزبة تاني بسعر حنين!!
-كام يعني؟؟ اوعا يا اونكل يكون ضحك عليك وضرب في العلالي !!!
-لا اااااااااااااا دول كلهم عشرة مليار ملطوش بس!!!
وهنا فوجئنا ونحن جالسون في صالون الفيللا باونكل الستاموني يهوي ساجدا على الارض وهو يقول: احمدك يارب!! اخيرا رجعت لنا العزبة وح نرجع نقسمها تاني فيلل وعمارات وشاليهات وح نرجع نحلب الجاموسة!!!
وبعد ربع ساعة اتصل المعجباني بيه شخصيا بأونكل ع الموبايل ...
-انشا الله تكون مبسوط يا ستاموني!!! انا عارف المبلغ جامد حبتين بس انتو أكيد ح تعرفوا تتصرفوا!!
-ولا جامد ولا حاجة سعادتك!!! ده احنا ح ناخد العشرة مليار من حصالة الواد بيسو ابن سوسو!! ما هو عقبال املتك كبر وبقا عنده اربع سنين وابتدا يحوش!!
-اللهم صلي ع النبي ولحق النونو ده يحوش عشرة مليار؟؟!!
-دا واد عفريت وعارف قيمة القرش!!! تصدق جنابك العكروت ده حوش العشرة مليار من مصروفه؟!!!
-ربنا يخللي يا سيدي!! المهم أشوفك الليلة في حفلة عيد ميلاد زيزي هانم!!!!عشان انا عندي كلام مهم عايز اقولهولك!!!
وفي حفلة عيد الميلاد نسي الجميع زيزي هانم مع انها كانت تغني اغنيتها المعروفة (أقوله آاااااا يقوللي لأ اااااا) والتفوا حول اونكل ..
-الف مبروك يا ستاموني بيه!! الف مليون مبروك يا عطيات هانم!!!!! اخيرا ظهر الحق!!!
-متشكرين يا جماعة !! فعلا الحلال عمره ما يضيع ابدا!! طول ما الواحد ايديه ممدودة بالخير!! وقلبه ابيض!!!
-يا سلام يا باشا لو ربنا يكمل جميله ويطلع لنا بسطويسي بيه بالسلامة!! بصراحة كفاية عليه كده وهوه قاعد يا حبة عيني في السجن حاطط ايده على خده مستنى الاستئناف!!
وفي هذه اللحظة وصل المعجباني بيه وشلته فتحولت الحفلة الى سلاطة ...
-وحياة من جمعنا من غير ميعاد ياجماعة!!! بسطويسي ح يطلع منها زي الشعرة من العجينة !! وانا بنفسي ح اعمله حفلة لوز في السراية الجديدة بتاعتي ح تنسيه الايام السودا اللي شافها!!
-يخليك لينا يا معجباني بيه!!! والله ما انا عارف من غيرك بس كنا ح نعمل ايه؟؟!
-ما تقولش كده يا ستاموني!! ده احنا اصحاب يا جدع!!! المهم ماتنساش البون بوني بتاع الواد ميزو ابن بنتي!!!
وفي المحكمة بعد أسبوع فوجئنا احنا شباب العيلة باحلي حكم سمعناه في حياتنا حتى ان اونكل الستاموني كان ح يقع من طوله..
-معقولة الكلام اللي انا سامعه ده يا متر؟؟!! معقولة اتحكم على بسطويسي ب 14 سنة بعد ماكان ح يروح فيها!! معقولة الكلام اللي أنا سامعه ياولاد!!! انا فعلا مش مصدق وداني!!!
-مش قلنالك يا باشا ربنا مابينساش حد ابدا!!! ده احنا قدمنا مستندات تنطق الحجر!!! وكنا متأكدين ان بسطويسي بيه بريء ومالوش يد في الفيلم الهندي ده!!!
-ايوه بس 14 سنة كتير!! واخويا صحته على قده ولا يمكن يستحمل أبدا!!!
-اطمن سعادتك ع الآخر!! أولا سنة السجن بعشر شهور بس!! وبسطويسي بيه ممكن ياخد افراج في نص المدة!! وممكن جنابه يقضى الكام سنة بتوعه في المستشفى ياكل كباب وكفتة ويدير اعماله ويلعب أتاري!!
وفي اليوم التالي زار اونكل عمو في السجن وهاتك يا عياط ....
-الف مبروك يا اخويا يا حتة من كبدي !!!
-الف حمد وشكر ليك يارب!! انا مش مصدق يا ستاموني اني قلعت البدلة الحمرا ولبست البدلة الزرقا!!! يا سااااتر ده كان خازوق انما ايه؟؟؟ وصاية!!!!!!
-وغلاوتك يا حبيبي لا طلعك من هنا انشا الله ابيع هدومي!!! هوه احنا عندنا كام بسطويسي في العيلة؟؟؟ده انت اللي فيهم يا غالي !!!
-يخليك ليا يا حنين يا ابن امي وابويا!!! بس قل لي الاول وريح بالي ألا صحيح المعجباني طلع لنا قرار لحس بيه حكم المصادرة والعزبة ح ترجع لنا من تاني !!!
-مظبوط يا غالي!! بس الراجل الدهل ح يخلينا نكع عشرة مليار ملطوش!! قال ايه عشان ماحدش ياخد باله!!!! مع اننا كاعين قبل كده في العزبة دم قلبنا!!!!
-معلهش يا ستاموني كله يتعوض!! المهم انك تعمل حملة اعلانية جامدة وتخبط قرض جديد من البنك وتدوس بنزين عشان تعوض لنا اللي ضاع في القضيتين الهباب دول !!!
وهكذا عقد أونكل الستاموني اجتماعا طارئا لكبار مساعديه ...
-انا عايز حملة ماحصلتش في الجرايد والقنوات الفضائية!! عايز الناس كلها تعرف ان العزبة رجعت لاصحابها بالسلامة!!! واننا ح نرجع نبيع ونشتري وندلع الناس اللي غاوية دلع !!! اما الناس الكوحيتي اللي مش لاقية تاكل فمالهاش عندنا غير الضرب على قفاها!!!!
-طيب وتحب جنابك الحملة يكون شعارها ايه؟؟!!
-اكتب عندك يا سيدي: دي مش عزبتك ولا عزبته ولا عزبة ابوهم!! دي عزبتي اللي ح اتدلع فيها على كيف كيفي!! وأبرطع فيها على مزاجي!!! وكله من خيرك يا مصر!!!!