قال ربيع عربى قال

■ طب هابى فالانتاين يا مصريين.. أى عيد حب وانتوا طيبين.. مجرد محاولة لزغزغة بقايا الآدمية التى تحتضر داخلنا ياكش تصحى وتفوق..
■ زمان من كام سنة.. كانت تعرض مسرحية اسمها خشب الورد.. مسرحية جميلة لم يتم تصويرها للأسف مثلها مثل أعمال كثيرة لم تسجل للتاريخ.. كانت بطولة محمود عبدالعزيز وإلهام شاهين ومدبولى.. والوجه الجديد لنج أشرف عبدالباقى.. الذى انطلق من هذه المسرحية بسرعة الصاروخ بعد ماكان جاى يقول كلمة واحدة..
■ المهم إن فى المسرحية دى كان مدبولى، الله يرحمه، رئيس مدينة.. على ما أتذكر كان فيه تشريفة واستقبال لشخصية هامة.. ومن عساكر التشريفة أشرف عبدالباقى اللى كان عامل عسكرى أمن مركزى قروى بسيط للغاية مش فاهم ولا كلمة فى الدنيا.. ترتسم على ملامحه بدائية الإنسان الأول.. ضايع ضايع يعنى.. وكان رئيس المدينة قد حصل من هذا الزائر المهم على منحة أو اتفاقية أو حاجة كويسة يعنى، فأراد أن يكافئ الناس وأخذ يسألهم واحدا تلو الآخر «انت عايز إيه؟».. اللى يقوله عايز شقة واللى عايز كشك واللى عايزة حتتين قماش.. طلبات عادية تحقق أحلام ممكنة لهؤلاء الناس.. وصل للعسكرى البسيط ده وسأله «وانت عايز إيه؟».. متخيلا إن آخر طموحه حايبقى شانجاوتش طعمية والا ورك فرخة.. ولكن العسكرى قطب جبينه فى غباوة شديدة وإصرار أشد وقاله «أنا عايز لوا !!!!!!!»..
■ اندهش مدبولى.. عسكرى أمن مركزى عايز لوا إزاى؟؟.. ودار بينهما حوار طويل كان من إبداع اللحظة لأشرف الذى أصر على جملة واحدة إنه عايز لوا.. يقوله انت عارف اللوا ده إيه؟؟.. يقوله مش مهم أنا عايز لوا.. طب قول صول.. قول شريطة.. قول بيادة جديدة.. يقوله عايز لوا.. طب لو جبتلك لوا حاتعمل بيه إيه؟؟.. حاتأكله إيه؟؟.. يقوله حأكله عساكر صغيرين بس ماليش دعوة أنا عايز لوا.. واتضح من الحديث ان العسكرى عايز يبقى لوا.. هو مالوش دعوة إيه اللوا ده.. لكن هو شايف بيه كبير كده بيتمشى ويشخط وياكل فراخ والكل بيعظمله واسمه لوا.. يبقى هو عايز لوا.. شالله عنه ماعرف إيه شغلة اللوا ده.. هما بس يمسكوه الرتبة وهو حايشرخ..
■ يبدو أن أشرف أسس فى هذه الرواية مبدأ هاما جدا لدرجة أنه أصبح علامة المرحلة ونبراس الحكم..
■ سؤال برئ.. هو لو واحد اتهاجم من مجهول معاه رشاش آلى غير مرخص طبعا.. وراح مطلع سلاحه المرخص أو غير المرخص حتى ودافع عن نفسه وقتله.. هل يتحاكم عشان معاه سلاح غير مرخص والا عشان الدولة ما وفرتلوش حماية من أى نوع وطالقة عليه الكلاب فاضطر يمارس الجزاء من جنس العمل.. والا يسيبوه عشان وفر عليهم وجع الدماغ.. ودع الكلاب تأكل بعضها وخلاص؟؟..
■ يا أخى ده إحنا ناس هجاصين هجص.. الواحد كبر على أفلام السيما الآكشم.. ولما أنتج عمله كام فيلم آكشم برضه.. أفلام م اللى فيها البطل واد مخلص ودقرم وقرد ولما يصوب مسدسه يجيب الناموسة قبل ما تزن.. قال والواد بقى يدخل عالعصابة م الشباك ويتسحب ويستخبى ورا العواميد ويقوم طالع بنص وشه كده ويصوب المسدس وهو زارر عينه قال بينشن من باب البرمجة الأوفر ويقوم طاخ طاخ مسقط العصابة كلها واحد ورا التانى.. وتفانين بقى فى رجال العصابة وهما بيموتوا.. اللى يندلق من على سلم واللى يلبس فى الحيط واللى ياخد الطلقة ويقعد يموت بتاع ربع ساعة عشان دوره مهم شوية.. كل ده والبطل عمال يفادى فى طلقات كل العصابة.. فيتدارى ورا برميل فاضى قوم الرصاصة ما تجيش فيه.. ويتعوج كده تقوم معدية من جنب حلمة ودنه.. وبعدين يفضل بقى رئيس العصابة اللى هو بطل مشترك طبعا.. قوم يتواجهوا الاتنين وإمعانا فى الأفورة يرموا مسدساتهم ويقرروا يتعاركوا بالإيدين.. عشان مدرب الكاراتيه اللى جاى من جيم القللى يحط التاتش بتاعه.. وخد بقى لكاكيم ومقصات حرامية وشقلباظات لحد ما الاتنين يشلبوا دم والبطل ينتصر فى البونية الآخرانيه.. وتقوم سارينة البوليس مزيطة والظباط داخلين مفتوقين قوى وسلم نفسك المكان محاصر.. فالبطل يقولهم اتأخرتوا يا أساتذة.. يقولوله أصل المحور كان واقف.. بس برافو عليك خلصت على الخمسة واربعين مجرم لوحدك.. بوس واحضان ويخلص الفيلم.
■ ننتقل بقى الى الواقع المرير.. شوية عيال سن اربعتاشر ماسكين آلى صوت أو حقيقى ويعتدوا على منشآت سياحية كاملة وشركات وبنوك ومحطات بنزين مليانة بشر ويكسروها ويسرقوها ويثبتوا الكل ويثيروا الفزع ويمشوا فى سلام بينما الستات بتصوت والرجالة بيتنطوروا قفزاً يمين وشمال ودمتم.. إيه ده؟؟.. حدش راضع السقا أو مبلبع كريم عبدالعزيز؟؟.. طب يوسف منصور طيب.. كله بيقلب على عبدالمنعم ابراهيم فى السفيرة عزيزة وهوف هوف.. النجدة الغوث وحتى من غير صوت.. طب مافيش القلة دى اللى بيمسكوها ويدشوها على دماغ المجرم من ورا يقوم موغمن عليه؟؟.. طب مقلب حرامية طيب.. يالهوى.. ياخسارة الفلوس اللى عملنا بيها الأفلام.. دانتوا ماوصلتوش لعنتر ولبلب يا راجل..
■ الظاهر إن حادثة عضو المجلس الموقر اللى اصطحب ابنه الطفل معاه فى جلسة المناقشة الهامة لموضوع حيوى يتعلق بالنيلة الدولة أو الزفت المواطنين مش حادثة فردية.. ده سلو الجماعة.. كل واحد بيروح الشغل عندهم بيسحب ف إيده حد قريبه.. ممكن يكون ابنه الطفل او الشحط الكبير.. وممكن يكون عديل أو سلف أو جوز عمة أو ابن خالة.. يظهر اللى بيشتغل عندهم بيصرفوله كام واحد م العيلة مالوش شغلانة ياخده معاه ويقعده جنبه.. أهو برضه يتعلم الصنعة ويصرف بدل.. فمش مشكلة لما مدام تقول لجوزها أنا عندى مشوار ومش فاضية خد الواد معاك الشغل بدل ما يلعب فى السخان او يحط صباعه فى الفيشة.. ويمكن تلاقى عضوين تلاتة جايبين العيال.. أهم يلعبوا مع بعض فى الجونينة.. وابقوا ادوهم كام ورقة م اللى بتقروا فيهم دول يعملوهم مراكب.. ومش مهم نضربله يوم فى المدرسة ماهو كده كده ناجح.. وكده كده إن شاء الله يتعين أول ما يتخرج فى منصب رفيع هام حتى لو واخد شهادة من مراجيح المولد.. وابقوا عدوا على القصر الرئاسى خدولكوا فيه لفة.. حتى لو مالكوش هناك عازة ولا لازمة ولا صفة.. فهاش حاجة يعنى.. هو الشعب الاهطل ده مش عزمنا عالبلد؟؟.. خلاص.. واحنا قبلنا العزومة.. حف يا عم ولا يهمك..
■ نجوم الأسبوع.. خالد تليمة واحمد دومة.. والمستشار أشرف البارودى..
■ شئ مشرف ومخجل فى نفس الوقت.. أن نرى المظاهرات النسائية والرجالية المتضامنة مع نساء مصر المتحرش بهن تحرشاً منظماً سياسياً ممنهجاً وذلك فى دول العالم وأمام شاشات تليفزيونات الدنيا.. اتفضحنا على الملأ الله يفضحكوا ياللى ف بالى.. ييجوا يشوفوا الشباب كمان اللى بقى بيُغتصب فى الأقسام والمعسكرات علناً وعلى عينك يا تاجر.. والسؤال: انتوا مابتعرفوش تعملوا حاجة تانية غير كده؟؟.. ما بتفكروش فى حاجة غير كده؟؟.. يمكن فهمتوا غلط وافتكرتوا إن قطونيل بيتلبس فى الدماغ؟؟..
■ هو مين الشخص الفكاهى خفيف الظل سفيه العقل اللى أطلق على ماتش الشقلطة والمرمطة المعمول فينا ده وصف «الربيع العربى»؟؟.. هل كان يقصد ذات نفسية الربيع أبو جو بديع بتاع صلاح جاهين وسعاد حسنى؟؟؟.. يا راااااااااااااااجل.. انت اهبل والا البعيد أضبش والا إيه؟؟؟؟.. قول تسونامى قول تايفون قول زلزال مدمر.. حسبنا الله ونعم الوكيل.. بس ليها آخر.. والله العظيم ليها آخر.. قولوا يا رب.
zahqanin@gmail.com