مصر.. مصر.. وبحمقة

■ ظل صاحب المنصب القيادى فى الكتلة الفنية يتحرك رايح جاى رايح جاى.. وصديقه الذى يتمتع بفتفوتة عقل طالعاله زى الزبيبة فى قبة دماغه يراقبه فى حيرة.. الراجل زى ما يكون بيهترف.. تتصرف كيف يا عبرحيم.. تتصرف كيف يا عبرحيم؟ أنا أقولك.. أنا اركّب دقن.. تركب دقن ليه؟؟.. ماتسيبها تطلع لوحدها.. ششش.. يا أخى ما تشوشرش على أفكارى.. أنا بمرح.. بقلد محمد نجم فى عش المجانين.. طب تركب دقن ليه يعنى؟؟..
■ عايزين نعمل بليكة.. بقالنا كتير بعيد عن الصورة.. كده نتنسى.. انسى الدقن.. إحنا نركب علم مصر.. حاتركب علم مصر ف دماغك.. شششش افهمنى.. إحنا نعمل اجتماع.. ونسرب الخبر للصحفيين الأولاد بتوعنا اللى بيشمشموا على أى مصيبة.. ونحلفهم كل واحد لوحده على جنب إن الاجتماع ده سرى ووحياة مامته ما يقول لحد.. طبعا هو عشان خاطر الحلفان بمامته مش حايقول لحد واحد.. ده حايقول لكل الحدات اللى يقابلها.. ونطلع بيان.. بيقول إيه بقى البيان ده؟؟.. مش عارف.. إنما مادام ركبنا علم مصر فى دماغنا يبقى أكيد البيان حايتعلق بمصر..
■ وقف فجأة منتصبا وهو يضم قبضته الشمال ويضعها على فردة صدره اليمين فى وضع من يقف احتراما لنشيد بلادى بلادى.. تلفت أبوتنتوفة عقل حواليه: إيه؟؟.. هو السلام الجمهورى بيلعب؟؟.. أومأ له برأسه فى ورع ووطنية أى نعم.. همس له العاقل.. طب بدل إيديك بدل إيديك.. قلبك فى الشمال.. المفروض إنك حاطط إيدك على قلبك من باب الإخلاص وحب الوطنطن.. بدّل الرجل إيديه وجاب اليمين عالقلب شمال وهو يقول فى عقل باله: أول مرة أعرف إن القلب فى الشمال.. أمال النغز اللى بيجيلى فى اليمين ده؟؟.. يمكن غازات بقى.. الله يقطع الفاصوليا البيضة.
■ شوف يا سيدى.. إحنا نضرب واحد تصريح ونخبط واحد بيان فى حاجة بتحصل اليومين دول.. حايعرضوا فيلم اللعبة العادلة بتاع النجم الأمريكى شون بن الأسبوع ده.. الغباء احتل معالم وجه العاقل.. الفيلم يابنى اللى مثل فيه الممثل العميل المجرم العايق المغرور ده اللى اسمه خالد النبوى.. فاكر؟؟.. اللى مسكناه سلخناه لما عرفنا إنه مثل فى الفيلم مع ممثلة إسرائيلية وطالبنا ساعتها بمحاكمته ونزع عضويات الفن وإسقاط الجنسية عنه والتفريق بينه وبين زوجته وتطريم سنانه وحلاقة شعره زلبطة.. الفيلم يا بنى اللى راح بسلامته اتمشى فى افتتاحه على الكليمة الحمرا فى كان وصوّرته جرايد الدنيا وكانت فضيحتنا بجلاجل.. ده حتى العالم كله ساعتها انقلب علينا فى الوطنطن هنا وقالك الممثل المصرى اللى خان القضية وباع التاريخ وطبّع مع اليهود.. وفوق كل ده لبس بابيونة زى الخواجات وفتق ضبه زى ما يكون فاتح بلكونة وطالع ينشر سنانه عالحبل.. فى زهق شديد قال أبوزبيبة مخ: طب ماهو ماحدش عبرنا ساعتها وعدت الحكاية.. لااااااااا.. دلوقتى بقى نعمل بيان نوقف عرض الفيلم.. توقفه إزاى؟؟.. نعمل جواب لجهاز الرقابة على المصنفات الفنية ونحط جواه كارت رعب.. نقول امنعوا عرض الفيلم لأننا ضد التطبيع والفيلم مطبّع وخالد النبوى مطبّع وشون بن مطبّع مع البت اليهودية دى.. ده حتى الفيلم اترفض من مهرجان دبى، ومهرجان القاهرة رفض عرضه لحسن يطبّع.. والسيما اللى حاتعرضه تبقى مطبعة والجمهور اللى يخشه لازم يتقبض عليه عشان كله مطبّع.. استنى بس.. هو يعنى إيه مطبع أصلا؟؟.. شششششش .. بلاش خوتة بقى.. أنا فاهم إيه هو التطبيع وما تقعدش تسألنى لأن ده موضوع يطول شرحه للأفسال من أمثالك.. فيه جريمة تطبيع وخلاص..
■ يا عم انت مش فاهم حاجة.. الفيلم ما اتعرضش فى مهرجان دبى عشان اتعرض فى أبوظبى.. وما تعرضش فى مهرجان القاهرة لأن شروط المهرجان إن الأفلام تتعرض فيه أول عرض وإلا يفقد صفته الدولية.. ششششششش.. والفيلم ده بيتكلم عن قضية احتلال العراق وبيجرّم أمريكا.. والممثلة الإسرائيلية دى ليها جملة مهمة فى الفيلم بتتهم فيها الموساد إنهم كانوا وراء اغتيال العلماء العراقيين.. ده المفروض إن إسرائيل هى اللى تشدها وتعلقها من قفاها مش إحنا.. دى كأنها عميلة بتشتغل لصالح العرب.. دا احنا لو دفعنا مال الدنيا مش حانعرف ننتج فيلم موجه زى ده.. نقوم نمنعه؟؟.. يعنى الكويت تبقى بتعرضه دلوقتى وانت ف مصر تمنعه؟؟.. مش موضوعى.. خليك معايا بس..
■ الدكتور بتاع الرقابة حايخاف طبعا ويترعب ويقولك وأنا مالى ياعم ومال القرف ده، يقوم واقف الفيلم.. نبقى كده خدنا حقنا م الواد خالد النبوى ده ولعبنا دور وطنى من أجل مصر.. وظهرنا فى الصورة وعملنا فيها فتوات وقبضايات.. حايقولوا علينا شوف الأولاد والله بيشتغلوا ومش نايمين.. كده نتثبت ومراكزنا تفضل فى حجرنا.. ونطلع فى التليفزيون بقى وخُد يا أحاديث.. بيقولك بقوا بيصرفوا فى التسجيل الواحد ييجى تلتلاف جنيه.. وحشين؟؟.. ده غير إن الجلسات بتاعتنا حاتكتر بقى ونصرف فى بدلات.. إجازة نص السنة داخلة والعيال عايزة تطلع العين السخنة.. وأى حد يكلمنا ويقولنا إيه اللى بتعكوه ده.. نتحمق ونتنفض وصوتنا يغلّق وإحنا حاطين إيدنا على قلبنا فى وضع الوطنى المخلص ونهتف بحمقة أوفر: مصر.. مصر.. سمعة مصر.. وجه مصر.. وسط مصر.. سمانة رجل مصر.. يقوموا يتهدوا ويسكتوا..
■ انت بتهجص يا عم إنت؟؟.. إنت مش من سلطتك تخاطب الرقابة أصلا.. مالكش عليها كلمة.. يا سلام؟؟.. هو يعنى الجدع المحامى اللى بيتنطط زى القرد أبوصديرى ونازل رفع قضايا على الرقابة والأفلام لمنع عرضها كان عنده سلطة ع الرقابة؟؟.. وهيه كل الأجهزة اللى بتتدخل فى عمل الرقابة ليها صفة قانونية أو سلطة عليها؟؟.. يابنى جهاز الرقابة ده بقى عامل زى حائط البطولات.. أى حد عايز يعمل دكر ويفرض وصاية ويقوّم هلولة يهاجم جهاز الرقابة ويوجهله جواب أو يرفع عليه قضية أو يفرض سلطة عليا عليه.. جت علينا إحنا؟؟..
■ والله إنك يا سينما يا مصرية مهمة.. على قولك كل ما حد يبقى عايز يعمل دكر يستقوى على السينما المصرية.. إنما ده فيلم مش مصرى.. أمريكانى.. إيش دراك كام واحد إسرائيلى بيشتغلوا فى السيما الأمريكية؟؟.. مين اللى قالك إن تلات أرباع الأفلام الأمريكية مش معبية إسرائيليين الجنسية أو الميول أو الانتماء؟؟.. تعرف منين كام فيلم اتعرضت فى مصر السنة اللى فاتت فيها يهود؟؟.. ثم هو إحنا كل ما حانطلع نجم بره عشان يبقى متنيل عالمى حانديله جهاز كشف الكدب ونقوله يفحص بطايق العالم اللى بيشتغل معاهم؟؟.. إنت عايز إيه بالظبط؟؟.. عايز تعمل بليكة فعلا ولّا بتعمل كده عشان خاطر مصر بجد.. عايز إيه؟؟
■ عايز آكل.. ماتباصيلى سندوتشين الكبدة اللى جنبك دول..
zahqanin@gmail.com