هى البلد ما فيهاش وزير شاب يوحد الله

حكومة الباشمهندس محلب. نجحت ما شاء الله فى الخروج للنور. بعد مخاض . لم يستمر الا ساعات. او يوم كامل فى اقصى تقدير. وكأن الرجل كان مذاكر من بدرى. وحاطط الأ سامى بتاعة الوزرا الجداد فى جيبه اليمين. او لا سمح الله ادوله الاسماء من بدرى بدرى. لكى يعلنها على الناس الغلابة مثلى ومثلك .. والعجلة تمشى. وسيبونا يا جماعة نشوف شغلنا بقى. دى البلد متاخرة. وعاوزة شغل كتييير قوووووووى.
طيب يا با شمهندس: اشتغل بقى. وورينا الهمة بس وحياة ابوك بلاش نغمة البلد مفلسة. والناس ما بتشتغلش. والانتاج مفيش .واحنا على باب الله بعد ما بيعنا الحديدة اللى كانت حيلتنا. وقاعدين دلوقتى بنغنى ظلموه. ومادين ايدينا لده وده .وعشانا عليك يارب. كل ده عارفينه كويس يا با شمهندس. وبقى كتاب مفتوح لينا. فشر كتاب حياتى يا عين. وما شوفنا زيه كتاب.
بس لينا عندك ملحوظة. والله تقبلها بصدر رحب. والنبى ما تزعل والملحوظة ان من بين كل الاسماء اللى اعلنت للوزارة . مفيش اسم شاب او شابة. يوحد ربنا هو ايه يعنى ده يا يا شمهندس .. معقولة البلد ما فيهاش شباب. ورور كده. زى الكتاب ما بيقول افكارهم افكار شباب. واحلامهم احلام شباب. مش ناس جايه لغاية ما تفرج. وبتمشى ولا مؤاخذة جر رجليها من: الروما تيزم والنقرس والضغط والسكر.. والاملا ح كمان . وعمرها الا فتراضى يا دوب كام شهر. هو عمر اى وزارة فى مصر دلوقتى . و هما راحوا فين بقى الشباب . اللى طلعوا وعملوا 25 يناير. ونادوا بالحرية والعيش والعدالة الا جماعية. ولا هما شاخوا .وكبروا فى تلات سنين. وما بقوش ينفعوا بتلاتة نكلة. وكفاية عليهم: الهتافات والشعارات .والمشى فى المظاهرات.
ومفيش مانع برده. يتصاب لهم ناس هنا وهناك. ومفيش غضاضة كمان .انه يموت لهم ناس هنا وهناك. وكفاية عليك يا ابنى انت وهو كده. وقوموا روحوا : بيتك بيتك ؟ حاجة تكسف. وتياس الياس نفسه يا باش مهندس . ولا انت مش معانا ولا ايه ! عموما كل وزارة. واحنا.وانت والسامعين طيبين. مأشفرين . تعبانين. وبأمراض الدنيا مسكونين. ورغم كده صابرين. ولسه برده بنعافر ..وعايشين ؟!ه