قصيدتان

المواطن اللي نايم ع المحطه
لما ميزاني اختل في الموازين
صبحت عاقل باشتهي جناني
وقدمي زل في آخر السلم
دحرجني تاني لبسطة المجانين.
ع البسطه مش مبسوط ولا زعلان
ومعايا علبة بيره وسجاره
محشيه بانجو وبانجو يعني بعيش
من غير ما حد يشوفني وانا بحلم
من غير إهانه ف نقطة التفتيش.
والدنيا عامله زي قطر معدي
وانا ع المحطه لا جي ولا رايح
بضحك وببكي بدون إحساس
لا حد بيهمني ولا بهم الناس
- هوه الميزان امتي حيتعّدل؟
- والدنيا قاعده والا بتعزل؟
- والأخره ليه بتأخر الإنسان؟
بصيت لنفسي وقلت إيه.. حتفوق؟
هوه انت قد العقل والفوقان؟
قربعت باقي العلبه وانا مزنوق
وعملتها علي نفسي وانا قاعد
وقلت هيه قد بعضيها
ما يهمنيش مين كان ومين حيكون
يجي ابن موسي والا وريث فرعون
ما نيش معشم حاجه بالتحديد
ولا عادش عمر اصبر وأستني
يارب سيبني ع المحطه وحيد
ما تودنيش لا النار ولا الجنه
القاعده دي أحسن من المواعيد
ومن انتظار الوهم ووقوعه
كل اللي علي ضهرها مستعبِدين وعبيد
للي شبع حسرته وللجعان جوعه
فرعون مربي موسي جوه الدار
وسرهم ف البير.. والبير مالوهش قرار
دول ناس كبار.. ودورهم للأبد مرسوم
قاعد معايا لوحدنا ف حالنا
والدنيا شارده لوحدها وبعيد
ولا احنا بصين لها ولا هيه بصّالنا
باعزِم علي دماغي بآخر نفس مكتوم
تضحيه مني عشان خايف
أسيبني نايم ع المحطه وأقوم!!
ملاعِينك
ما حدش فينا ملا عينك؟
وكل لعين ملا عينك ..
وقاس روحك علي رجليه
وداس روحنا برجلينك
ما يصعبشي عليك حالك
رُخص حالك
وعاش الأغبيا غاليين ومن مالك
نزلت كتير مع الطالعين علي حبالك
ماحدش فينا كان مجنون وأوحالك
زهقنا من جحود صدك وإهمالك
شربنا الذل من كوعنا وأوحالك
..فاضلك مين؟
ما هوش فقرك ولا جوعك
أكيد السر ف خضوعك فراغة عين..
مافيش علماء ولا شعراء ولا شهداء ملت عينك
مافيش غيرهم ملاعِينك عموا عينك .