أشرف عبد الباقي: راجل وست ستات نجح بدون سامح حسين

هبة أيوب - عيون ع الفن:
أكد الفنان الكوميدي أشرف عبد الباقي أن الجزء السادس من سيت كوم "راجل وست ستات" استطاع أن يحقق نجاحاً جماهيرياً كبيراً على الرغم من أنه الموسم الأول الذي لا يظهر به الفنان سامح حسين.
حيث قال أشرف في حوار له مع جريدة "الدستور": "الحمد لله ردود الأفعال حلوة جداً وده بدا واضحاً من زيادة عدد الإعلانات، والناس مش حاسين إن غياب سامح عامل فرق في مستوي المسلسل لأني استطعت أن أعوض غيابه بزيادة جرعة الكوميديا أصل أنا عامل زي كل المصريين الزنقة بتخليني أشتغل، وطبعا "سامح" كان عامل حالة حلوة معايا من خلال العلاقة بين الغبي والآخر الغبي أيضاً اللي بيحاول يعمل نفسه ذكي لكن الحمد لله الناس مبسوطة بالحلقات الجديدة".
وعن ابتعاده عن عالم السينما قال أشرف: "مفيش منتج عرض عليّ سيناريو واحد بعد فيلم "بوبوس" وبصراحة أنا لو منتج وعندي ممثل زي أشرف عبد الباقي أفلامه بتجيب قرش، وممثل تاني زي محمد هنيدي أو كريم عبد العزيز أفلامهم بتجيب عشرة قروش أنا هنتج لهم مش هنتج لي! ده سوق وأنا مش زعلان من المنتجين لأني مقدر موقفهم، والحمد لله إن ربنا فاتح لي سكك تانية في التليفزيون وأنا مش من الناس اللي بتبص للي في إيد غيرها".
على الجانب الآخر أكد أشرف أنه سعيد للغاية بقيامه ببطولة مسلسل "مش ألف ليلة وليلة"، الذي سوف يُعرض في رمضان القادم، خاصة وأنه يتناول حكايات ما بعد الألف ليلة وليلة، بشكل عصري كوميدي.