أحزاب بعد الثورة

من بعد الثورة يا بلادى
زادت فيكى الأحزاب
وكلها عليّا بتنادى
ولا أنا عارف الصادق م الكداب
من بعد الثورة ف كل مكان
منين ما بروح بلاقى إعلان
أو يافطة كبيرة مكتوب عليها
إشترك ف حزبنا بالمجان
أحزاب جديدة ياما كتار
ده غير ائتلافات الثوار
ورغم اختلاف الأسامى
الكل رافع نفس الشعار
الكل عايز عدده يزيد
عشان يضمن بشكل أكيد
أصوات وكراسى كتيرة
ف البرلمان الجاى الجديد
وأنا بصراحة ماليش ف السياسة
أصلى زمان ما خدتهاش ف الدراسة
وكل اللى عايزه م المسئولين
أنه يكون بحالى فيه شوية حساسة
عايز حلول تتقدم بحالى
وبأكل وتعليم وصحة عيالى
أما العضويه ف أحزاب
فبصراحة دلوقتى مش ف بالى
هتفيدنى بأيه شعارات الديمقراطية
والمساواة والعدالة الاجتماعية
وأنا بسبب الأسعار ما بقتش
بتكفينى لآخر الشهر المهية
زادت يا بلدى الأحزاب الجداد
بس يا ريتنى منها يوم استفاد
وزى ما بتهتمى يا بلدى بالسياسة
ياريتك تهتمى كمان بالاقتصاد.