أيوة رجعت

زى مارحت
عارف انى خالفت وعودى
بس سيبونى أقول أعذارى
وانا متأكد رغم وجودى
هتسامحونى
ايوة انا عارف
فاكر وعدى يا بنتى يا نور
انى هرجع بعد سنين
شايل ليكى لعبة جديدة
والفستان الوردى ابو بورينيطة
وانت يا عامر
عارف يا بنى
انك كنت يوميها مستنى
ارجع شايل عجلة وكورة
وانت يا عيشة يام عيالى
هارجع اقول
بس سيبونى اقول اعذاري
وانا متأكد هتسامحوني
يوم وصلت بلاد الغربة
شفت شوارع وسط مبانى
زى فروع الشجر الحانى
شفت حضارة
فردى جناحها للعمران
واللى زمان
كان فى خيالى
اصبح مرأى بقى قدامي
ومهما وصفت العز هناك
ومهما حكيت او غنيت
تفضل صورة المادة غريبة
من غير الوان
بس فى لحظة
و فى وسط العز
حسيت يومها بالحرمان
هتقولوا ازاى
ارد عليكوا بألف سؤال
ازاى اغمض عينى فى لحظة
وآجاى انام
على فرشة
حضنت ارض غريبة
ارض فى قلبى
ملهاش عنوان
لما ودانى تسمع صوتكوا
تجرى عنى وتدمع لي
عايزة تشوفكوا
يبقى دى صورة من الحرمان
ولما بدأت الشغل لاقيت
انى بعمر ارض الغير
انى هكبر وابنى واعلى
وسايب ارضى وفيها الخير
حسيت انى بخون فى ضميرى
حسيت ان القرش فى جيبى اصبح غاية
شيلت هدومى وقلت يا بلدى
لو تعريفة فى ارضك راجع
بس ياريت
تنسى
انى فى يوم هجيت
تنسي
نظرة غضبى عليكى
نتسي
قسوة قلبى الظالم
يوم ما هويت
ارض غريبة
دى اعذاري
يمكن مش تشفع لى اليوم
بس اكيد
اللى يحس مرارة الغربة
صحيح يتمنى
يشرب من حنية ارضه