أضحك

أفتح كل بيبان النور جواك
أضحك
أرسم صورة وصوت لسماك
وجوه السيرك
فكر تلعب كل الأدوار
كون بلياتشو
لو نامت شمس النهار
ف حجر الليل
أصرخ وروض ف الأسود
لو يوم عشت مابين جدارين
ومتنساش
أوضه ضلام
وكف بيحبى على الجدران
وطفل واقف بره السور
مستنى أبوه
مستنى يمكن شمس بكره
تخرج من وادى النطرون
أضحك
ومتنساش ضحكة ستك
بعد ماخدها الموت
كان ليها حلم
زى السواقى .. بيروى قلب الأرض نور
كان ليها حلم
زى السما.. طارح غنا وقمر بنور
لكنه فارق أرضها
مع أنها
سابت ضحكة ف قلب الليل
ضوت أرضك
أضحك
ومتنساش دم رصيف
نايم تحت تراب الأرض
شيله ع الكتف النحيف
واطلع فوق الأرض بشبر
أمسك أيد كروان مجروح
وادخل جوه أنين البوح
وامشي ما بين السما والأرض
بالمقلوب
يمكن تعرف سر الحب ف قلب صبيه كارها الموت
أضحك
ومتنساش ضحكة ستك
بعد ماخدها الموت