عايزة تتجوزى ليه؟ الحرية والورد.. أمنيات صادمة من وحى إجابات البنات

"الزواج" مرحلة مهمة فى حياة الكثيرات، يحلمن طويلاً بها ويخططن لها كثيرًا، وحتى إذا لم تكن مهمة بالنسبة لهن لأنها ضمن قائمة أحلامهن أو خططهن المستقبلية، تكتسب هذه الخطوة أهمية من المجتمع الذى ينتظر منها أن تقدم عليها طوال الوقت.
لهذا السبب طرحت إحدى الصفحات على "فيس بوك" سؤالاً مختصرًا يقول "اتجوز ليه؟" ويدعو الجميع للمشاركة وأن يطرحوا على أنفسهم هذا السؤال ويفكرون فى الدافع الذى قد يحركهم لاتخاذ هذه الخطوة يومًا ما، وتنوعت الإجابات والمشاركات من الفتيات والشباب أيضًا، بين الجدية والأحلام الوردية والواقعية والسخرية، ولكن بين تعليقات البنات وجدنا 8 "طموحات وأمانٍ" وأحلام وردية تدفعهن للزواج.
"الفستان الأبيض"
الفرح والفستان الأبيض دافع مشترك للزواج لدى الكثير من الفتيات من بينهن "نور جمال" التى اكتفت بكتابة "هتجوز عشان ألبس الفستان الأبيض"، وأضافت "المهندسة دعاء": "عشان ألبس الفستان الأبيض وأعمل فرح وأفرح مع أهلى وأصحابى"، وقالت "بسنت علاء": "عشان ألاقى حد يخرجنى بليل لحد الصبح ومش يكون فيها أى مشكلة عادى".
"الحرية"
"أخد حريتى وأعيش بقى" هذا هو دافع "سلمى حسام الدين" للزواج، وعبرت عنه "أمل" بطريقة أخرى: "عشان ماما ما تقعدش تقولى لما تتجوزى ابقى اعملى اللى انتى عايزاه"، أما "ندى بلال" فقالت: "هتجوز عشان أخربها مع جوزى سفر وخروج".
"الهروب من العنوسة"
بكل صراحة كتبت "نور سعفان": "هتجوز عشان أبطل أشوف النظرة المعوقة فى عين الكائنات اللى حواليا بالشفقة والتعاطف وهم بيقولولى مفيش جديد مش هنفرح بيكى بقى شدى حيلك ربنا يعدلهالك".
"الاستقرار"
ببساطة وباختصار شديد قالت "هبة قاسم": "هتجوز عشان الاستقرار والأمان"، وقالت "شيماء دياب": "لأن الجواز بيت واستقرار وأسرة".
"المشاركة"
قالت "ندى أحمد": "هتجوز عشان ما اكملش حياتى لوحدى، وعلشان ألاقى حد يشاركنى الحاجات اللى بحبها"، وكذلك قالت "مها مجدى": "هتجوز عشان أشاركه كل حاجة بنعملها".
"الأمومة"
الأمومة هى دافع قوى جدًا لكثير من الفتيات للزواج، فقالت "هدير كارم" "يمكن علشان نفسى أكون أم وأجرب إحساس الأمومة، وكمان عشان زوجى المستقبلى يكون لى أب مش مجرد زوج".
"الاستقلال"
تحلم "إيمان خليل" بأن يمنحها الزواج الاستقلال وبدء الحياة فى بيت جديد وكتبت: "هتجوز عشان أطلع من البيت وأعيش فى بيت جديد تحت مسئوليتى بشكل كامل".
"الحب"
اتفقت غالبية الفتيات، والشباب كذلك على أن السبب الذى يدفعهم للزواج هو "الحب" لأنه الطريقة الوحيدة التى تجعلهم يعيشون مع الشخص الذى يحبونه، وهى الطريقة المضمونة فى رأيهم للتمتع بالرومانسية، كما تقول "ابتسام سعيد": "هتجوز عشان عايزه حد يجيب لى ورد كتير".