بنات * بنات

عالم البنات مليء بالأسرار ولا يعرف تفاصيله سوى البنات لذا قررنا منح هذه المساحة للبنات ليعبرن فيها عن أنفسهن وللحديث عن المشكلات والهموم والقضايا التى تشغل بالهن ويرفض المجتمع فى كثير من الأحيان الاستماع إليها. ويمكن التواصل والمشاركة فى هذا الباب عبر البريد الإلكترونى: banatXbanatrosa@yahoo.com

■ ما تتجوزيش علشان اهلك ضاغطين عليكى و عايزين يفرحوا بيكي.. ما ينفعش تدفعى تمن فرحتهم تعاسة تعشيها طول عمرك!!
■ ما تتجوزيش علشان متقدملك عريس من اللى بيقولوا عليهم «كما قال الكتاب» ومافيهوش غلطة وتبقى عبيطة لو رفضتيه.. حتبقى عبيطة بجد لو وافقتى وأنت مش مرتاحة من جواكى!!

■ ما تتجوزيش لو سنك قرب على ال 30 وبيقلولك: القطر خلاص حيفوتك «حتعنسى» لا فى قطر من اساسه علشان يفوتك ولا فى كلمة اسمها عانس ده مجرد مجتمع مريض خلق حاجات علشان ينقلك مرضه بيها.

■ ما تتجوزيش لو فشلتى فى علاقات كتير فى حياتك وفكيتى خطوبتك مرتين وخايفة تفكى المرة دى كمان على اساس ان صعب بعد كده تلاقى حد يتجوزك.

■ ما تتجوزيش عشان المجتمع و طنط فلانة وطنط علانة كلوّ اوشك من كتر الكلام على الجواز والعرسان علشان مافيش حاجة اسمها « شدى حيلك بقى واتجوزى « ولا انت فيكى عيب ولا مريضة انت بس انسانة لسة مالقتيش اللى يريحك.

■ ما تتجوزيش لو لسة مش لاقية الراجل اللى يملا عينك وقلبك وحياتك وتصدقى انه ممكن يكون حماية وأمان وسند ليكى فى الدنيا.. لو معاه ولسة حاسة ان فى لسة كتير نقصك حتى فى وجوده جنبك.. الايام مش حتجبلك الامان ولا الفلوس ممكن تغير كتير!!

■ ما تتجوزيش واحد معندوش طموح.. بكرة طموحك يدبحك وهو بيدفن فيكى كل حلم جميل فى الحياة.. ومش بس كده حيقتل فى عيالك احلامهم.. حتبقى بتشاركى فى صناعة جيل فقد الحلم ..فقد المستقبل.. فقد الحياة ولذتها:)

■ ما تتجوزيش اللى بيحب فيكى حاجات.. اتجوزى اللى لسة ماعرفش بيحبك ليه.

■ ما تتجوزيش علشان الفستان الابيض والكوشة والمزيكا ولا علشان الزيطة دى بتزوقك تتجوزى.. ولا علشان الصور اللى حتحطيها على الفيس بوك وكلمة اتجوزتى او اتخطبتى لفلان الفولانى فى خانة الحالة الاجتماعية.. ولا علشان شوية التعليقات اللى حتتحط على صورتك الجديدة.. كل ده بلاستك وأغلب التعليقات مش حقيقية.. يا حد غيران ونفسه يبقى مكانه.. يا واحدة غيرانة ونفسها تبقى مكانك.

■ اتجوزى.. اتجوزى.. اتجوزى.. لما تبقى مرتاحة.. متقبلة.. اتجوزى لما تحبى بجد.. لما تتمنى.. اتجوزى لما تبقى مستعدة.. مش محتاجة!!

مارى مرقص هى صاحبة أشهر نوت على موقع الفيس بوك ماتجوزيش.. نصيحة» والتى تناولت من خلالها ما تعانى منه الفتاة من ضغوط مجتمعية من أجل الزواج.. مارى طالبة فى الفرقة الثالثة بكلية التجارة قسم اللغة الانجليزية جامعة الإسكندرية وتهدى كل ما وصلت إليه من نجاح فى حياتها إلى روح والدها الراحل.