أبوبكر البغدادى على قهوة الملحدين فى عابدين.. ساخرون ينصبون «السيرك» فى ساحات «تويتر»: قهوة الملحد تخرب قبل قهوة المؤمن.. صاحب أى قهوة بعد كده هيطلب من أى زبون داخل النطق بالشهادتين

نقلا عن العدد اليومى :
«تحول الأمر إلى سخرية وتهكم، عقب قيام رئيس حى عابدين بإغلاق مقهى فى شارع الفلكى، بالحى العريق، وشهدت مواقع التواصل الاجتماعى عاصفة من السخرية من قرار محافظ القاهرة بإغلاق مقهى الملحدين»، وبعد تداول الخبر دشن نشطاء مواقع التواصل الاجتماعى تويتر هاشتاجا ساخرا يحمل اسم «قهوة الملحدين»، وآخر حمل عنوان «انتفاضة الشباب الملحد»، وقد لاقى الهاشتاجان ردود أفعال ومعدل تفاعلات كبيرة من نشطاء تويتر، وأصبح متداولا بشكل كبير فى فترة صغيرة.
وجاء أبرز تعليقات النشطاء ساخرا كالتالى «صاحب أى قهوة بعد كده هيطلب من أى زبون داخل النطق بالشهادتين»، «قبل ما المشاريب تنزل لازم النطق بالشهادة»، «لو سمحت ممكن قهوة أبولهب زيادة وحجر معسل من رصة المعلمة مراته»، «لو سمحت ممكن شيشة ملحدة كده بس تكون جاية من النار فريش»، «وعندك واحد كابتشينو لعم أبولهب هنا»، «أهلا يافندم نورتنا تحب حضرتك تقعد فين ملحدين ولا؟ non ملحدين»
وفى السياق نفسه جاءت تعليقات أخرى ساخرة: «بعد القبض على بعض الملحدين، قريبا هيعملوا بوابات إلكترونية للكشف عن هوية الملحدين فى المترو والمطارات والمرافق الحكومية»، «الغلط على صاحب القهوة اللى مش مشغل عنده ناضورجية، اللى المفروض أول ما يشم ريحة كبسة يشغل قرآن ويعلق آية الكرسى»، «انتوا ازاى تدخلوا على الملحدين كده فى قهاوى الإلحاد.. بصوت محمد هنيدى فى فيلم جاءنا البيان التالى».
وأضاف آخر: «قبضوا علينا واحنا بنلحد يا بيه»، «فى قهوة الملحدين المشاريب بتنزل ببلاش عشان الملحدين مش مؤمنين بالحساب، زى داعش حرموا رياضة كمال الأجسام علشان الكمال لله وحده»، وقال آخر ساخرًا: «أنا نازل يا ماما.. على فين يابنى؟ على قهوة الملحدين.. طيب لا إله إلا الله محمد رسول الله». وكتبت الناشطة يمنى سليم: «وزير الداخلية أصدر أوامره لإدارة المرور لأخذ عينات دم وبول من السائقين لإجراء تحليل إلحاد مع تحليل المخدرات»، وأضاف خالد صيام: «يا فندم فى واحد من اللى مسكناهم على القهوة رافع إيديه وبيحسبن علينا، الظاهر مؤمن على خفيف».
بينما غرد أحد المستخدمين، على طريقة صبى المقهى بطريقة ساخرة: «يا عدمى يا عبثى يا فيزيائى يا كيميائى، استفتحنا والملك للطبيعة، بيرش مية قدام قهوة الملحدين»، وتخيل أحدهم ماهية المشروبات التى سيطلبها من قهوة الملحدين، قائلاً: «كوكتيل داروين يرجعك غوريلا وتنسى أعشاب المورينجا»، وتابع آخر: «لو سمحت ممكن قهوة أبولهب زيادة وحجر معسل من رصة المعلمة مراته».
أما مى سليم فعلقت بقولها، صاحب أى قهوة فى مصر بعد كده هيكتب عليها: «minimum charge + نطق الشهادتين»، وتخيل محمد محروس حوارا دار بين «زبون» على قهوة الملحدين و«جرسون» القهوة قائلاً: «واحد راح قعد على قهوة الملحدين ودار الحوار، واحد حشيش لو سمحت.. ماعندناش حشيش.. طيب واحد كونياك.. مافيش خمرة.. يخرب بيوتكم كفار على الفاضى».وعلق زياد محمد ساخرًا: «الغلط على صاحب القهوة اللى مش مشغل عنده ناضورجية، اللى المفروض أول ما يشم ريحة كبسة يشغل قرآن ويعلق آية الكرسى». وأضاف أمجد سعيد: «كان نفسى الأستاذة منى عراقى تكون مع القوة اللى داهمت القهوة وتصورهم وهما بيلحدوا، عشان فيه ناس مابتصدقش إلا لما تشوف بعينيها»، وكتبت سارة عاطف: بعد تحطيم رئيس حى عابدين ما أطلق عليه «قهوة الملحدين».. مصر انتهت من الحرب على الإرهاب لتبدا الحرب الأخطر والأقوى فى حروب الجيل ال18 «مصر تحارب الإلحاد»، معقبة: «من مذكرات مؤرخ بعنوان مصر فى عصر الحلبسة».
وعلى غرار انتفاضة الشباب المسلم، دشن النشطاء، بطريقة ساخرة، هاشتاجا حمل عنوان انتفاضة الشباب الملحد، وجاء فيه تعليقات ساخرة منها: «المهانة المهانة.. مش هنفرط فى الغرقانة»، وقدم أحد النشطاء نصيحة لمن يريد الجلوس على مثل هذا المقهى مرة أخرى قائلاً: «ربى دقنك وانضم لداعش والمرة الجاية ربى دقنك واعمل من داعش ولما يخشوا عليك قول الله أكبر هيسيبوك»، واحد تانى كتب: «أبوبكر البغدادى بيقعد معانا على نفس القهوة، أنا كدا مطمن إنى مش هتاخد إلحاد». وعلق أحمد محرم: «وزير الداخلية أصدر أوامره بأخذ عينات دم وبول المترددين على قهوة الملحدين لإجراء تحليل إلحاد مع تحليل المخدرات»، فيما قالت رانيا: «القهوة أساسا عاملة إشغالات فواحد أهبل قالك نضيف (قهوة الملحدين) عشان تعجب الجمهور وتسمّع»، وتساءلت أمانى زكى، قائلة: «ويا ترى بقى الملحدين هيقعدوا فين بعد ما حطّموا قهوة الملحدين؟ هينتشروا على القهاوى يبثّوا إلحادهم فى عقول البشر».
وواصل محمد حفظى: يقال إن رئيس حى عابدين صرح بأنه حطم قهوة الملحدين، حاسس إنى عايش فى فيلم «وإسلاماه»، وسخر إبراهيم قائلًا: «بعد كده اللى يروح يشيش، يبقى ياخد معاه قسيس وشيخ ومحامى». وقال على مدحت: بعد تحطيم قهوة الملحدين صرَّح أحد الشباب الملحد: «للأسف كده خلاص مش هنلاقى حتة نلحد فيها، هنرجع مؤمنين بقى وأمرنا لله». وتابع النشطاء سخريتهم: «وإيه المشروب الرسمى فى القهوة دى يا عماد؟»، « الرفاق غاضبون.. يبصقون.. يبرقون ويرعدون.. يتساءلون عن مصير الجارسون بعد قفل قهوتهم الملعونة»، «مشروب ملحدينا.. زى فخفخينا كده»، « رئيس حى عابدين قفل قهوة الملحدين عشان كانو بياخدوا مشاريب ببلاش لأنهم مش مؤمنين بالحساب».