كنباوي وكنباوية.. حلقة (116).. جزرة وقطمها جحش!

كنباوي يحوقل لا حول ولا قوة الا بالله دول لايمكن يكونوا بني آدمين ابدا، دول اتنزعت من قلوبهم الرحمة، دول اندال، دول لا يمكن يكونوا مسلمين مفيش مسلمين بالقساوة دي ولا بالفجر ده الله يلعنهم في كل كتاب.

تسمعه كنباوية فتدهش لما يقول وتدهش أكثر لانفعاله وهو الذي يحثها دوما على عدم الانفعال فتحاول أن تستشف ما به.
كنباوية: مالك يا أبو العيال؟ ايه اللي منرفزك كده؟ فيه ايه؟ حصلت حاجة جديدة؟
كنباوي: هو طول ما ورانا الإخوان حنكسب، دول ملاعين، ولعوا في البلد، بقى ده يرضي ربنا؟ بقى ده يرضي عاقل أو حد سوي؟
كنباوية: ومين قالك ان دول عاقلين أو اسوياء؟ دول جماعة إرهابية، لازم تعي ذلك يا كنباوي انت ما شوفتش كم الأسلحة اللي اتظبطت معاهم في رابعة والنهضة؟ ما شوفتش ولعوا في البلد ازاي؟ وحرقوا كنايس قد ايه؟ دول سرقوا متحف المنيا كمان وولعوا في اكتر من 25 قسما وفي ديوان محافظة الجيزة وفي وزارة المالية وحرقوا عربيات ناس مالهاش ذنب وقتلوا ابرياء دول لازم يتبادوا يبقوا يقابلوني اللي كانوا بيقولوا مصالحة وطنية، مصالحة مع مين؟ مع ارهابيين؟ حد يآمن التعالب على الارانب؟
كنباوي: عندك حق بس انا موجوع ازاي تهون عليهم البلد انهم يحرقوها بالشكل ده واللي غايظني أن الداخلية قعدت تقول احداث 25 يناير مش حتتكرر تاني واتكررت الاقسام ولعت والضباط اتقتلوا واتمثل بجثثهم فيه ايه تاني عربيات نقل الأموال اتسرقت، المتاحف اتنهبت، الكنايس وملحقاتها اتحرقت بيوت الاقباط ولعوا فيها يبقى فيه ايه ناقص تاني عن احداث 25 يناير؟
كنباوية: وانت نسيت مباني دوواين المحافظات اللي ولعوا فيها ده لسه النهارده بيقولوا انهم حيولعوا في البلد النهارده جمعة الغضب عندهم.
كنباوي: والنبي لو مش عيب كنت عملت رد فعل صوتي اسكندراني قبيح، غضب ايه ولاد الابالسة دول الجيش لازم يلمهم، لازم الداخلية تقبض عليهم كلهم لازم يترموا في السجون دول لازم البلد تتطهر منهم دول وباء لازم القضاء عليه.
كنباوية: فين أمن الدولة؟ أمن الدولة لازم يرجع تاني افظع من الأول لازم يستقوي القلب عليهم لانهم ما يستاهلوش الا كده.
كنباوي: الله يمسيه بالخير حبيب العادلي كان لاممهم يخرجوه يلمهم ويرجع الحبس تاني لو وزير الداخلية بتاعنا مش قادر عليهم.
كنباوية: هو حيرضي محمد إبراهيم يقول انه مش قادر عليهم؟
كنباوي: لأ طبعا مفيش حد يرضيه يقول كده على نفسه بس بيني وبينك ردود افعال ولاد الهرمة دول كتيرة اوي عايزه قوة كبيرة اوي وانتشار أكبر في كل شوارع وميادين مصر.
كنباوية: والأمن المركزي راح فين؟
كنباوي: موجود بس دول عايزين قوات خاصة مدربة تدريب عالي لأن فيهم حمساوية وجهاديين مدربين.
كنباوية: وماله ينزلولهم قوات خاصة يعني لو الإخوان دول كانوا عملوا كده في إسرائيل كانت إسرائيل حتغلب فيهم دي كانت بادتهم في غمضة عين مش احنا اللي بنتدلع معاهم ايه البرود ده؟
كنباوي: ده مش برود ده تكتيك وإستراتيجيات.
كنباوية: بلا تكتيك بلا كلام فاضي جزرة وقطمها جحش ده اللي لازم يحصل معاهم شغل الطبطبة ده مش حينفع دول لازم يتسكوا على قفاهم.
كنباوي: حيحصل والصبر طيب.
كنباوية: صبر ايه يا كنباوي والبلد بتتدمر وتتحرق ربنا يستر على مصر بكره الجيش والداخلية لازم يتصدوا بكره للإخوان ويلقنوهم درس عمرهم علشان يتلموا.
كنباوي: دول اهدروا دم الجيش والشرطة يبقى الداخلية لو سكتت على الكلام ده يبقى تستاهل اللي يجرالها.
كنباوية: انا سمعت انهم بيقولوا ان الدم في الشوارع حيبقى للركب وان أي ضابط حيشوفوه في الشارع سواء جيش أو شرطة حيقتلوه.
كنباوي: دي بجاحة عيني عينك.
كنباوية: البلتاجي وحجازي لازم يتقبض عليهم والمرشد العجوز بتاعهم علشان الأمور تتلم لكن طول ما دول سايبين كده البلد حتفضل والعة وفي مشاكل وعدم استقرار.
كنباوي: عندك حق بيقولوا ان المرشد قاعد في قصر الشيخ حمد في المنصورية لازم يروحوا يقبضوا عليه ويهاجموا القصر بلا دبلوماسية بلا قرف حينفعنا بايه الشيخ حمد كفايه قناة بلده اللي عمالة تخرب في بلدنا.
كنباوية: قصدك قناة الجزيرة؟
كنباوي: ايوه يا ستي قناة الزفت الحظيرة.
كنباوية: لازم يكون فيه تصرف قوي ويهز علشان الجماعة الإرهابية دي تتلم.
كنباوي: حيحصل.
كنباوية: يسمع منك ربنا يا كنباوي!