كنباوي وكنباوية.. حلقة رقم (75).. مرسي واخدها مقاولة

كنباوية منهمكة في قراءة ما تكتبه المواقع الإخبارية الإلكترونية عن قرب يوم الانقلاب على مرسي وسحب الثقه منه في حين دخول كنباوي عليها زاعقا
كنباوي: أنا جعان، أنا جعان، أنا سقطان من الجوع وإنتي لسه قاعدة على المدعوق ده؟
كنباوية: المدعوق ده هو اللي منورنا ومعرفنا راسنا من رجلينا ومفهمنا البلد ماشية إزاي ورايحة على فين
كنباوي: سيبك من البلد دلوقتي وخليكي في بطني ومعدتي وقوليلي بطني حتروح على فين وهي جعانة كده؟
كنباوية: بطنك حتروح على اللي موجود في التلاجة
كنباوي: وإيه بقى إن شاء الله اللي موجود في التلاجة؟
كنباوية: فضلة خيرك بفتيك، وصينية مكرونة بشاميل وححمرلك جنبها بطاطس والحلو كريم كراميل وجيلي بالموز وعندنا عصير رمان كمان
كنباوي: بقى يا وليه عندنا الأكل ده كله وساكته وسيباني أزعق وأجعر بالشكل ده وأنا ميت من الجوع؟!
كنباوية: هو إنت إدتني فرصة حتى أتكلم وأفهمك؟! ما إنت اللي داخل عليّ بزعابيبك وشخطك وزعيقك
كنباوي: ما أنا اتغظت لما لقيتك قاعدة على اللاب توب بتاعك ولا على بالك بأكلي
كنباوية: ومن إمتى أنا بنسى أكلك؟
كنباوي: ما هو الغربال الجديد له شدة، وأنا قلت اللاب توب الجديد واخدك ومنسيكي الأكل
كنباوية: ولا ألف لاب توب ينسوني أكلك يا كنباوي
كنباوي: بس أفهم إمتي عملتي الأكل ده؟
كنباوية: من ساعة لما إنت نزلت وأنا واقفة في المطبخ بجهز الاكل وبعد ما خلصت قلت أقعد ع النت أشوف الدنيا فيها إيه؟
كنباوي: ولقيتي فيها إيه يا كنباوية؟
كنباوية: تاكل الأول ولا تعرف الدنيا فيها إيه؟
كنباوي: أعرف وإنتي بتحضري الأكل
كنباوية: ماشي يا طماع اسمع يا سيدي
كنباوي: سمعيني يا ست الكل
كنباوية: المصريين خايفين على مصالحهم وأشغالهم ومش عارفين الدنيا رايحة لفين يوم 30 وعمالين يشتروا أكل ولوازم البيوت ويشيلوها والتجار مستغلين الإقبال على الشرا ده بزيادة الأسعار والناس مش طايقة نفسها من الغلو ده بس ما باليد حيلة لازم يشتروا خايفين لتقوم ثورة تانية ويقعدوا في البيوت لا يعرفوا ينزلوا ولا يطلعوا
كنباوي: غيره يا كنباوية
كنباوية: خالد مشعل ومعاه مجموعة من حماس دخلت مصر من مطار القاهرة من غير تأشيرات جية على جهة سيادية ومن غير جوازات سفر
كنباوي: جيين ينيلوا إيه؟
كنباوية: الله أعلم والنهارده الخبر بفلوس بكره يبقى ببلاش واللي غايظ الإخوان إن فيه واحد اسمه إيريك ريجر
كنباوي: مين ده مافيا؟
كنباوية: مافيا إيه يا كنباوي ما تصبر على رزقك لما أفهمك
كنباوي: حاضر حصبر بس إنتي كملي
كنباوية: إيريك ده
كنباوي: مش إيريك ده بتاع خد إيريك وخليك حرك؟
كنباوية: يا كنباوي ما تنقطنيش إيريك وحرك إيه هو فياجرا؟ ده تشابه أسماء إيريك تريجر ده زميل معهد واشنطن لدراسات الشرق الأدني وباحث متخصص في شئون تنظيم الإخوان
كنباوي: ماله المتخصص ده؟
كنباوية: بيقول إن مرسي رئيس فاشل وإنه مش رجل دولة وإن قراراته مش من دماغه وبتمليها عليه مصلحة الجماعة وبيقول إن أمريكا مع الإخوان لإن الشعب هو اللي اختارهم بإرادته وإن أمريكا مش شايفه سيناريو بديل على الساحة للإخوان لكن لو لقته والشعب اختاره حتقف مع إرادة الشعب زي ما وقفت جنبه لما شال مبارك في 25 يناير 2011
كنباوي: والله كده يبقى أمريكا عداها العيب وإحنا اللي كنا ظالمينها زي ما الإخوان فهمونا الله يقطع الإخوان ويقطع كدبهم
كنباوية: آمين يارب وطبعا الكلام ده مش عاجب الإخوان ومخليهم مش طايقين نفسهم
كنباوي: يولعوا حتى في نفسهم بجاز وسخ ونرتاح منهم ومن قرفهم وشرهم
كنباوية: يا ريت يا كنباوي يا ريت ده يحصل
كنباوي: حيحصل إن شاء الله بس إنتي غديني
كنباوية: متسربع على إيه حغديك يا كنباوي حغديك
كنباوي: أصلك فتحتي نفسي أوي على المكرونة البشاميل والبفتيك والكريم كراميل والجيلي أبو موز ده وعصير الرمان
كنباوية: حاضر يا كنباوي 5 دقايق والأكل يكون جاهز عندك
كنباوي: يطعمك ما يحرمك
كنباوية: ده غير بقى الإشاعات اللي مالية البلد وبتقول إن عائلات الإخوان ناوية تهرب تحسبا للحرب الأهلية وسقوط الإخوان
كنباوي: يغوروا في داهية ويريحونا منهم ومن بلاويهم وياخدوا الشر معاهم
كنباوية: آمين يارب آمين يلا بقى اسبقني على بره وأنا دقايق وأجهز لك الأكل
كنباوي: حاضر يا كنباوية حاضر
كنباوية: يحضرلك الخير يا كنباوي