كنباوي وكنباوية.. حلقة (72).. مرسي الكبير يلوح بنبوت الغفير

كنباوية تعد تورتة شوكولاتة بالمطبخ وهي في حالة انسجام وتقول: يا مرسي انفخ البلالين علشان عيد الميلاد
يسمعها كنباوي فيذهب إليها باسما ضاحكا
كنباوي: انفخ البلالين علشان عيد الميلاد! عيد ميلاد مين؟ ومرسي مين؟ وبلالين مين؟ وإيه التورتة دي كمان من إمته واحنا بنعمل تورت؟ فين الأكل؟ فين المحمر والمشمر؟ فين الصواني؟
كنباوية: النهاردة لا فيه محمر ولا مشمر ولا فيه حتى صواني النهارده الغدا بفتيك وكباب حلة ومكرونة اسباكتي وبوم فريت
كنباوي: واحدة واحدة عليه بوم إيه؟
كنباوية: بوم فريت يعني بطاطس محمرة يا كنباوي
كنباوي: مالك يا كنباوية؟ إيه اللي عوج لسانك؟ ما طول عمرنا بنقول على البطاطس بطاطس إيه اللي خلاها النهارده بوم فريت؟
كنباوية: بوم فريت انطقها صح يا كنباوي وبعدين فيها إيه يعني لما نتكلم زي الناس الأرستقراط وولاد الذوات وبتوع الإتيكيت ومدارس اللغات؟
كنباوي: الله يرحم أمك وأبوكي اللي كانوا بيتخانقوا مع بعض كان بيسمعهم القاصي والداني ولما أمك كانت بتتخانق في الحارة كانت بتفرد الملاية لجارتها دلوقتي بنتهم جايه تقول على البطاطس بوم فريت سبحان مغير الأحوال
كنباوية: ما قلنا كل وقت وله أدان وأمي وأبويا ماتوا وراحوا لرب كريم وإحنا عايشين وعلشان عايشين لازم نتغير ونتطور الحياة تطور يا كنباوي
كنباوي: يعني أنا لما حد من زمايلي أو صحابي على القهوة يقولي إنت اتغديت إيه؟ أقوله اتغديت بوم فريت؟ ده كان يشتمني
كنباوية: يا كنباوي كبر دماغك وماكانتش دي كلمة أنا قلتها خلاص يا كنباوي حغديك بطاطس محمرة كده ارتحت؟
كنباوي: أيوه يا ستي كده ارتحت، أهه ده الكلام وده الأكل اللي أنا أعرفه وأعرف أكله مش تقوليلي بوم فريت ناقص كمان بكره أرجع أسألك على الأكل تقوليلي عملالك ستيك وبيكاتا بالشامبنيون
كنباوي: إنت عرفت الحاجات دي منين؟ وعرفت تنطقهم إزاي؟ انت متجوز عليا خوجايه؟ نهار أمك مطين يا كنباوي ويومك مش فايت
كنباوي: خوجايه إيه اللي حتجوزها ده منظر واحد يتجوز خوجايه؟ كل الحكاية إني حفظتهم من فيلم عربي اتفرجت عليه وقعدت أسأل الناس هو ده أكل ولا بلاستيك لحد ما عرفت إنه أكل ولاد الناس المتربيين دي كل الحكايه يا ستي
كنباوية: أيوه كده ريحت قلبي
كنباوي: بتغيري عليّ لسه يا كنباوية؟
كنباوية: طبعا هو أنا ليّ غيرك أغير عليه ولآخر العمر حفضل أغير عليك
كنباوي: أصيلة يا كنباوية قوليلي بقى إيه حكاية التورتة دي؟
كنباوية: النهارده عيد ميلادك يا كنباوي إنت ناسي دي كمان؟
كنباوي: عيد ميلادي ومن إمته انتي بتحتفلي بعيد ميلادي؟
كنباوية: من هنا ورايح حنحتفل بيه والغلط مردود وربنا يجعل أيامنا كلها أعياد يا حبيبي
كنباوي: وحبيبك كمان؟! لا الحكاية فيها إنة؟ ماتكونيش ليك نفس في اللي في بالي؟
كنباوية: لا إنة ولا حاجة وإن كان على اللي في بالك ما أنا على طول ليه فيه نفس ده شيء مش جديد عليّ وإنت اللي دايما تتهرب مني بحجج فاضية وأنا بطنش وأسيبك
كنباوي: بس كده أنا مش حطنشك علشان خاطر التورتة الحلوة دي حروقك النهاردة يا ستي ولا تزعلي نفسك علشان ما تقوليش إني حارمك من حاجة
كنباوية: يكرمك ربنا يا كنباوي اسمع بقى آخر الأخبار
كنباوي: إيه آخر اللي عندك؟
كنباوية: مرسي عامل فيها بطل وبيهدد إثيوبيا بالحرب لو ما بطلتش كلام عن موضوع سد النهضة بتاعها
كنباوي: طب يروح يتشطر على إسرائيل ولا أي بلد تانية مش لاقي إلا إثيوبيا وبعدين يعني هو السيسي حيطاوعه في اللي هو عاوز يعمله
كنباوية: لا طبعا مش حيطاوعه، دي كل الحكاية فنجرة بق مش أكتر من كده
كنباوي: ما أنا بقول كده برضه، عندك أخبار تانية؟
كنباوية: الإخوان بتشكك في إعداد الموقعين على تمرد خاصة بعد أحمد فؤاد نجم ما صرح بأنه مضى على 16 استمارة سحب الثقة من مرسي من استمارات تمرد وده اللي شككهم في الأعداد
كنباوي: وفيه حد عاقل يقول إنه عمل كده؟
كنباوية: السن بقى له حكمه والراجل كبر ومبقاش يوزن الأمور كويس بكره كلنا نكبر زيه ونقول أسخم من كده
كنباوي: على رأيك
كنباوية: وحمدين صباحي بيقول إن 30 يونيو يوم استكمال ثورة يناير ويوم أخذ حق الشهدا أمثال كريستي وجيكا وأبو ضيف ومينا دانيال والجندي فكرني برجب "عمر الشريف" في فيلم صراع في المينا لما زعل من أحمد رمزي علشان سمع أنه ضرب بلطة مع حبيبته وبنت خالته فاتن حمامة وهاج وقال النهارده نفكر الإسكندرية ب "أبو خطوة وحميدو والقباري فنجرة بوق برضه".
كنباوي: هي باين عليها كلها بقت فنجرية بوق
كنباوية: تقريبا زي ما إنت بتقول كده بالظبط فنجرة بق وتوسيع صدر
كنباوي: الكرسي اللي قاعد تحتيه مرسي
كنباوية: قاعد تحتيه دي مش فوقيه
كنباوي: ما هي دي فعلا الحقيقة مرسي مش قاعد فوق الكرسي مرسي مستخبي تحت الكرسي من خوفه وفشله
كنباوية: أصبت يا كنباوي أصبت يلا بقى سبني أكمل التورتة علشان ألحق أغديك وأدلعك زي ما أنت حتدلعني
كنباوي: ماشي أنا حطلع أحلق دقني طالما فيها دلع وكملي إنتي التورتة يا تورتة الكريمة يا عسل أبيض وحلاوته زيادة
كنباوية: أحبك وإنت رايق
كنباوي: وأنا أحبك وإنت ناوياها