كنباوى وكنباوية.. حلقه رقم (67).. 30 يونيو يوم عسير لتحديد المصير

عاد كنباوي من عمله منهكا خائر القوى يتصبب عرقا حيث كان اليوم شديد الحرارة ولقد قالت هيئة الأرصاد الجوية: إن الحرارة اليوم 45 لكن كنباوي كان يشعر بها 95 واوقعه حظه العسر في ركوب مترو الأنفاق وقت الذروة حيث عودة الموظفين من أعمالهم حيث اضطرته درجة حرارة الجو إلى ترك المترو قبل مجيء محطته (البحوث ) والنزول في محطة ( الدقي ) والمشي سيرا إلى البيت وما أن وصل بيته حتى تنفس الصعداء ودخل إلى الحمام مباشرة وألقى بنفسه تحت الدش بملابسه دون أن يخلعها فهال كنباوية ما تري وقالت: إيه ده يا راجل فيه حد يستحمى بهدومه ؟
كنباوي: اللي شوفته النهارده يخليني استحمى مش بهدومي لأ استحمى بالجزمة كمان الجو نار نار يا كنباوية أنا اشتريت بطيختين حطيهم في التلاجة بسرعة أنا حتغده بطيخ وحضري شفشق ميه ساقعة بتلج يا كنباوية بتلج فاهمة
كنباوية: من عيني يا كنباوي دقايق وكل اللي انت عايزه يكون جاهز
كنباوي يخرج من الحمام يبدل ملابسه ويجلس بالبوكسر والفانلة الحمالات تحت مروحة السقف الدائرة على أقصى سرعة بها
كنباوية: هديت ياخويا ؟
كنباوي: أيوه ده البيت رحمة ونور عن الشارع ده الشارع حتة من جهنم
كنباوية: إيه اللي جابك النهارده بدري كده مش عاويدك ؟!
كنباوي: الحر، الحر يا كنباوية والشوارع زحمة أوي زي ما يكون مفيش حد قاعد في بيته
كنباوية: أيوه يا كنباوي الناس كلها عمالة تشتري حاجات وتخزنها في بيوتها من دلوقتي
كنباوي: لسه بدري على رمضان يا كنباوية
كنباوية: الحكاية مش حكاية رمضان ياخويا
كنباوي: أمال حكاية إيه ؟ هي الحرب حتقوم ؟
كنباوية: بيقولوا كده يا كنباوي
كنباوي: مين دول يا ولية اللي بيقولوا ؟
كنباوية: الناس ياخويا بيقولوا إن الثورة حتقوم من تاني يوم 30 يونيو والناس حتاكل بعضيها وعلشان كده الناس نازلة شرا في أكل وأغراض وسلع تموينية وبتخزنها من دلوقتي تحسبا لأي ظرف طارئ
كنباوي: وانتي اشتريتي زيهم ولا لسه ؟
كنباوية: ده أنا مليت المطبخ والتلاجة وتحت السراير وفي أوضة الخزين كمان أنا اشتريت بالجمعية كلها اللي قبضتها لوازمنا لمدة تكفينا تلات أربع شهور
كنباوي: الله عليكي يا كنباوية الله انتي بتصدقي الإشاعات دي ؟
كنباوية: وما صدقش ليه ما مصر كلها مصدقة تمرد داخلة على 10 مليون توقيع ولسه والشاطر بيخطط من دلوقتي للقضاء على المتظاهرين والرافضين لحكم مرسي وحتحصل اعتقالات كتيرة قبل 30 يونيو الناس مش حتقبل ده والإسلاميين حينزلوا يدافعوا عن مرسي والإخوان وحتقوم حرب أهلية
كنباوي: ما تخافيش الجيش حيلم الليلة وحتعدي زي كل مرة
كنباوية: ما اظنش ده اللي حيحصل يا كنباوي الموضوع حيبقي أكبر من الجيش
كنباوي: مفيش أكبر من الجيش يا كنباوية مفيش
كنباوية: يا ريت يا كنباوي الجيش يمسك البلد دي ويريحنا من حكم الإخوان ونفوق بقى ونشم نفسنا
كنباوية: يارب ياخويا يارب
كنباوي: أيوه كده خلي دايما عندك أمل في ربنا
كنباوية: ونعم بالله يا كنباوي ونعم بالله
كنباوي: ممكن ناكل البطيخ بقى ؟
كنباوية: ممكن يا كنباوي ممكن
كنباوي: الميه الساقعة المتلجة فين ؟
كنباوية ؟ على ايدك الشمال على طول
كنباوي: البيت نعمة وانتي كمان نعمة والبطيخ في الحر نعمة والميه السقعة نعمة ولو الإخوان غاروا في داهية يوم 30 ندر عليا لأركب لكم تكييف
كنباوية: صحيح يا كنباوي ؟
كنباوي: هو أنا من امتى قلت كلمة ومانفذتهاش ؟
كنباوية: عمرك ياخويا ماخلفت وعد معايا
كنباوي: يبقي بتسألي ليه ؟
كنباوية: زلة لسان ياخويا
كنباوي: ولا يهمك كلنا بنغلط المهم نعرف غلطنا ونعترف بيه مش نقاوح زي ولاد ستين في تسعين
كنباوية: يلا ياخويا كل البطيخ وطري على قلبك وبالهنا والشفا
كنباوي: يلا يا كنباوية كلي معايا وافتحي نفسي
كنباوية: حاضر يا كنباوي حاضر
كنباوي: يحضر لك الخير يا كنباوية